Гьаркьятала къяйлизирадси
Гьаларван МяхIячкъала-лизир нешла мезлис ва литературалис хасдарибти гIяхIцад далдуцуни дурадеркIиб.
Илдала лугIилизибадлири «Дагъистанна автортала нешла мезла произведениеби бегIлара гIяхIил дучIан» ибси республикала конкурсра. Ил балбуц дураберкIибсири Дагъистан Республикала школабала бучIанти-ургаб. Илар бутIакьяндеш дариб Губданила школала 11 ибил классла ручIан Мадина Жалилованира. Губданила школализибадти цархIилти дурхIнанира илгъуна балбуцлизир мурталра бутIакьяндеш дирутири ва гьаларти мерани сархутири. Илди саби ХIялимат Расулова, Аминат МяхIяммадшапиева ва цархIилти.
Мадина Жалилова мугIяллимтала хъалибарглизирадси сари. Дудеш Арслан Жалилов физкультурала учитель сай, неш Майсарат Жалилова нешла мезла ва литературала мугIяллим сари. КIелра Губданила школализиб бузути саби.
Мадина риштIахIейчирадли мугIяллим ретаэс хьулрикIусири. Илала бегIтицун ахIи, хала нешра хала дудешра учительтили бирутири. Илдала санигIят даимбарес хьулрикIули сари Мадинара.
Илини гIяхIил иргъули сари мугIяллимла санигIят мурталра хIяжатси биъниличила. Школала программаби, учебникунала авторти, учительтачи тIалабуни дарсдикIули сари, имцIадикIули сари сагати предметуни, амма педагог улкалис ва илаб хIербирути адамтас мурталра хIяжатси адам сай.
МугIяллимличи мешутили бетаэс къайгъилизиб бирар дурхIнира. Ил багьандан мугIяллим илдас гьарра шайчив гIибратли виэсра хIяжатси саби.
2012 ибил дуслизир Мадинани школала унабурхI ахъибсири ва илхIейчирадли гIибратчерси ручIанни ретаурли сари. 11 дусла рухIнар М.Жалилова ункъли ручIули сари ва гьачамалра авла кьиматалра касибси ахIен. Илини школализир дурадуркIути лерилрара-сера далдуцуназир мурталра жигарла бутIакьяндеш диру. Муниципалитетла ва республикала олимпиадабачирра конкурсуначирра мурталра гьаларти мерани дурцу. Спортла абзаназирра ил даим чедириркуси сари.
Ишдуслизиб республикализиб бетерхурси конкурслизир муниципалитетла конкурсуначиб чедибикибтани сарри бутIакьяндеш дарибти. Мадинани, школала педколлективла игьдибар марбирули, илхIели цаибил мер буциб.
Конкурсличи хIядурриахъес чили кумекбариба или хьарбаибхIели, илини ишгъуна жаваб чарбатур:
– Ну конкурсличи хIядурриахъес халаси кумек гIеббаахъиб дила дигуси учительница, школала директорла белчIудила-бяркъла шайчирси заместитель ГIябдуряхIманова ЗулхIужат ГIябдулвагьабовнани.
ЗулхIужат ГIябдулвагьабовна гьанна 30 дус мугIяллимли рузули сари. Ил сунела ва цархIилтала бузериличи, низамличи чекаризурси сари. ДурхIнала белчIуди ахъси даражаличиб биахъесра илини халаси къайгъи биру. ЗулхIужат ГIябдулвагьабовани хIядурбирути бучIантани олимпиадабачирра конкурсуначирра мурталра цаибти мерани дурцути сари.
Нушала ихтилатла ахирличиб Мадинани сунела дигуси учительницас халаси баркалла багьахъур ва чебатур: «Баркалла, хIурматла ЗулхIужат ГIябдулвагьабовна хIела сабухъчебси бузерилис ва адаб-хIяялис».
ЗулхIужат ГIябдуряхIмановас, бучIантицунра ахIи, лебилра губдалантира мурталра баркалла бикIути саби. СенахIенну ил дебали бархьдеш дигуси ва черетаибси педагог сари. Илини тяп нешливан балкIсира бархьсира баркьудилис кьимат кабалтуси саби ва хIяжатбикалли, дурхIни маймайбиру, гIягIнихIели гапбиру.
Нушала Мадинас гьатIира дахъал чедибдешуни дулгехIе. ГIямрулизир гьарил секIал сунела уркIилис дигуливан детерхаб, талихIчерли хIерриаб!
