Диги-хIурмат сархибси
Диги-хIурмат сархибси
Ахъушала район сунезибад дурабухъунти машгьурти гIялимтачибли, тухтуртачибли, спортсментачибли, поэтуни-писательтачибли ва мугIяллимтачибли Дагъистанна дурабра машгьурси саби.
ХIера, ил районнизиб мерлабиубли саби хабарла Усишала ши. Ил халаси шилизир нунира балули, жявхIейчирад кIел урга даражала школара лерти сари. ЧеалкIуси наслулис гIяхIси багьуди ва бяркъ бедес, илди спортлашал гьалабяхI арбукес халаси хIяракат бирули саби илаб бузути хIянчизартани.
ИшбархIила дила белкIла игит Усишала шилизир акIубси Раисат Гъазиева сари. Илини школализир ручIухIелил, чIумали кьасбарибсири мугIяллимла санигIят чеббикIес. ГIяхIти кьиматуначил школара белчIи, Раисатли ДГУ-ла филологияла факультет ХIунтIена дипломличил таманаиб.
2002-ибил дусличирад рехIрихь-или, ил Лавашала районна Дитуншимахьила школализир рузули сари. Гьаланачи ил директорла белчIудила шайчирси заместительли рузиб, цазаманализир дарган мезла ва литературала дурсри кадирхьули. Гьарли-марли нешла мез дигуси ва илди гьаладяхI ардукес къайгъназирси мугIяллимли дурхIназира илди чедетаахъили дяркъяхъес халаси хIяракат бирули сари. Раисат МяхIяммадхIяжиевна мурталра сунела багьудила даража ахъбурцули, сагасилигIир умцIуси адам сари. Илини цазаманализиб социологла санигIят касиб, гIур биалли психологлара. Илала къайгъни школала хIянчизартала пикрила дурар кахIелун. Нушачиб бикIули бирар: «Дурашанра шан вирар, шантани шан варалли». ХIера, 2011 ибил дуслизир ил Дитуншимахьила школала директорла къуллукъуни дузахъес каратур. Багьудила гьели релгIули, илини дурхIназир нешла мезличи диги адилкьули сари. БучIантала хIял-хIякьикьат гIяхIил далуси ил, директорла къуллукъунира чедетаахъили дузахъули, хIялалли-залалли рузули сари.
Директорла хIянчи гьамадси хIебиалра, ил бажардириркули сари учительтала дурсрачи рашесра, жагьилти учительтас насихIятуни дуресра. Школализиб гIяхIил тIашбатурли саби методикалашалси бузерира. Халаси бузерила стажла бегIти мугIяллимтани чула устадешличи жагьилти учительти бурсибирули саби. Дурсрачир чебаъла гIягIниахълуми пайдаладиру ва дурхIнас аргъесли дурсрала темаби гьаладирхьу.
Раисат МяхIяммадхIяжиевнани «Дусла учитель» конкурслизир бутIакьяндеш дариб. Ил чебяхIси категорияла учитель сари. Районнизиб дураберкIибси «БегIлара гIяхIси дарган мезла кабинет» конкурсличиб илдани кIиибил мер сархиб, цархIилти далдуцуназирра жигарла бутIакьяндеш диру. Багьудила управлениели ва пачалихъли школа чула хIерудила дураб балтули ахIен. Багьудила Министерстволи ва районна багьудила управлениели асилси бузери ахъли кьиматлабарили, грамотабачил чуйнара шабагъатларариб. БучIанти жузачил, школала гIягIниахълумачил гIеббурцули саби.
Раисат Гъазиевас сунела хIянчи дебали дигахъу. Илис бучIантира дигахъу. Илини бурни хIясибли, илис дурхIначил бируси хIянчили халаси разидеш бихули саби. Илди диги дарсурти сари. БучIантани ва барх бузутани илала халаси хIурмат биру. Директорла къуллукъуни дузахъули ил 10 дус риубли сари. Раисат Гъазиева жавабкардешчерси мугIяллимцун ахIенну, пергер нешра сари. Илини сунела муруйчил барх урши-рурси абилкьули саби. Илдира чула хала бегIтани чебаахъибси бархьси дякькад башули, дурхIнира адамтала хIурмат сархеси, асилси бузериличи бурсибирниличи нура рирхулра. Раисат МяхIяммадхIяжиевнас бузерилизир гьатIира дахъал сархибдешуни дулгулра.
Гъазиева Раисат МяхIяммад-хIяжиевнас уркухъан, машгьурси шягIир СягIидуллагь ГIябдуллабековли багъишлабарибси назмура гьалабирхьулра.
ХIугъуна риаб хIяким
Школала бекI хIянчизар, Дарган мезла мугIяллим. Хъуличир пергер хъубзар, ХIугъуна риаб хIяким. Халкь мучлахIебирнила, Уктемдешлизир ятим. ХIянчилизир гьар даим, ХIугъуна риаб хIяким. ГIядатла адамтачил, Ралгунсири хIу даим. СанигIятлис рахъ марси, ХIугъуна риаб хIяким. Дахъал гIилму дяркъурси, ХIериадлира гIялим. Арцлис хIурмат хIесибси, ХIугъуна риаб хIяким. ХIякимдешра, хамдешра, Дирули мурткIал гьарахъ. ХIедагьурси хIярамдеш, Сарри гIяламла уртахъ. Багьудила Юртлизир, ДурхIнас гьуни ибхьули, Каленгу, хIу, Раисат, ХIякимдеш мяштIхIейрули.
