Салауат хаҡында һүҙ

Салауат хаҡында һүҙ

Халҡыбыҙҙың арҙаҡлы азаматы Салауат Юлаевтың тыуыуына 270 йыл тулыу айҡанлы республикабыҙ халҡына бик матур бүләк – «Салауат хаҡында һүҙ» исемле яңы китап донъя күрҙе.

Был кескәй энциклопедияға ғалимдар һәм әҙиптәрҙең милли батырыбыҙҙың шәхесе һәм эшмәкәрлеге тураһындағы тәрән мәғәнәле фекерҙәре, ҡаһарманыбыҙға ҡағылышлы халыҡ ижады өлгөләре – тарихи йырҙар, ҡобайырҙар, риүәйәттәр, бәйеттәр, мөнәжәттәрҙән өҙөктәр тупланған, шулай уҡ, сәсән телле Салауаттың үҙ әҫәрҙәре лә урын алған.

Йыйынтыҡты туплаусы автор, яҙыусы Факил Мырҙаҡаевтың ныҡышмалы эҙләнеүҙәре аша бөртөкләп йыйылған алтын фекерҙәргә күҙ һалайыҡ:

***

«Ул – ғилем эйәһе һәм шағир. Ул Ҡөрьәнде һәм шәриғәтте белә, үҫмер алдында ҡарттар хөрмәт күрһәтеп баш эйә, уның исеме һәр кемдең телендә, уның уҡымышлылығынан муллалар ғына түгел, хатта ахундар үҙҙәре лә ғәжәпкә ҡала. Салауат бөйөк кеше булыр, тип юрай сал сәсле аҡһаҡалдар» (Ф.Д. Нефедов, яҙыусы, археолог, этнограф).

***

«Салауат поэзияһының төп темаһы тәбиғәткә һоҡланыу, мөхәббәтте данлау ғына түгел, шағир Салауат өсөн, иң беренсе сиратта, Ватанына һөйөү, халыҡҡа тоғролоҡ характерлы» (В.В. Сидоров, тарихсы).

***

«Салауат хәрби кеше генә түгел, ә үҙ халҡының рухи юлбашсыһы ла булды» (Н.Н. Фирсов, тарихсы)

***

«Салауаттың исеме ысынлап та башҡорт халҡының йөрәгендә булырға хаҡлы» (П.С. Потемкин, генерал-майор, Крәҫтиәндәр һуғышында ҡатнашыусыларҙы эҙәрләү һәм тикшереү буйынса төҙөлгән махсус йәшерен комиссия башлығы)

***

«Ҡурайсылар араһында иң данлыҡлыһы – Салауат» (Ишмулла Дилмөхәмәтов, актер, ҡурайсы, йырсы, композитор)

***

«Салауат тоҡомдары сигенә белмәй!» (Миңлеғәли Шайморатов, генерал-майор, Рәсәй Федерацияһы Геройы)

***

«Әгәр ҙә беҙ йәшәйбеҙ икән, – тимәк, Салауат тере!» (Мостай Кәрим, Башҡортостандың халыҡ шағиры)