Ожмахта ла бергә булайыҡ!
Ожмахта ла бергә булайыҡ!
Беҙ барыбыҙ ҙа был донъяға һынау өсөн ебәрелгәнбеҙ. Кеше ошо ғүмерендә йөҙ йыл йәшәһә лә, бер яҡтан ғына сығып уйлаһаң, ул бик әҙ ваҡыт. Икенсе яҡтан, бер быуат ул күп тә һымаҡ.
Бөтә Ғаләмгә рәхмәт өсөн ебәрелгән һөйөклө Пәйғәмбәребеҙ ﷺ әйткән: «Алтмыш өс йәштән үткән һәр кешенең ғүмере ул Бөйөк Аллаһу Тәғәләнең бүләге, Рәхмәте». 63 йәште үтеп, һаман да намаҙға баҫмай, Ғаләмдәр Хужаһының Ҡушҡанын үтәмәй йөрөү ул – тәкәбберлек. Тормошта тик ике юл. Берәүһе – Ожмахҡа илтеүсе Аллаһ юлы булһа, икенсеһе – Тамуҡҡа алып барыусы иблис юлы.
Ожмах юлы күп тырышлыҡ талап итә. Аллаһу Сөбхәнәһү үә Тәғәләнең Ҡушҡанын үтәп, Берлегенә, Барлығына ышанып, намаҙ уҡып, зәкәт биреп, ураҙа тотоп, хаж ҡылып йәшәү һәр мосолмандың фарыз ғәмәле.
Ҡәҙерлеләрем! Бөйөк Илаһыбыҙ барыбыҙға ла һөйөклө Пәйғәмбәребеҙ Мөхәммәд Мостафаның ﷺ өммәтенән булып, Хаҡ юлда хәйерле, бәрәкәтле, иманлы ғүмер кисереп, Әхирәттә лә Йәннәт түрҙәрендә барлыҡ мосолмандар менән осрашырға насип әйләһен! Әмин!
