Мөхәррәм айының фазиләттәре
Мөхәррәм һижри йыл иҫәбенең беренсе айы булып тора. Аллаһу Тәғәләнең хәрәм айҙарының береһе булған мөхәррәм изге һәм бәрәкәтле айҙарҙан һанала.
Ҡөрьән Кәримдә былай тиелгән (мәғәнәһе): «Аллаһ хозурындағы китапта айҙар һаны ун ике, ерҙе һәм күктәрҙе яратҡан көндән бирле, ул ун ике айҙан дүртеһе һуғыш хәрәм булған айҙар (Зөлҡағиҙә, Зөлхизә, Мөхәррәм, Рәжәб айҙары). Был – хаҡ дин, ошо дүрт айҙа үҙегеҙгә золомлоҡ ҡылмағыҙ» («Әт-Тәүбә» сүрәһе, 36-сы аят). Ибне Ғәббәс әйткән: «Аллаһ бөтөн айҙарҙа золомлоҡ эшләүҙе тыйҙы, әммә Аллаһ дүрт ай тураһында айырымлап әйтте, насар ғәмәл ҡылһаң, гонаһтар арттырылып яҙыла, изгелек ҡылһаң, әжер-сауап арттырылып бирелә».
Усман әл-Һинди әйтеүенсә, тәҡүәле сәләфтәр өс айҙың ун көнөн айырыуса хөрмәтләгәндәр: Рамаҙан айының – һуңғы, Зөлхизә һәм Мөхәррәм айҙарының тәүге ун көнөн.
Бөгөнгө көндә лә мосолмандар Мөхәррәм айын мөмкин тиклем күберәк ураҙа тотоп, изге эштәр ҡылып үткәрергә тырыша. «Рамаҙан айынан һуң иң фазиләтле ураҙа Аллаһу Тәғәләнең айы булған Мөхәррәм айында тотолған ураҙалыр», – тиелә Пәйғәмбәребеҙ ﷺ хәҙисендә.
Был айҙа бик оло бер көн бар – Ғәшүрә көнө. Ул мөхәррәм айының унынсы көнөнә тура килә. Хәҙистәрҙә Ғәшүрә көнөндә тотолған ураҙаның йыл дауамында ҡылынған гонаһтарҙы юйыуы тураһында әйтелә.
Мосолман календарындғы сираттағы йылды ихлас ғибәҙәттәр, изге ғәмәлдәр менән ҡаршы алып, иманыбыҙҙы нығытырға һәм Хаҡ Тәғәләнең ризалығына ирешергә насип булһын!
