Зөлхизә айының тәүге ун көнө

Аллаһу Сөбхәнәһү үә Тәғәлә һөйөклө ҡолдарының игелекле ғәмәлдәрен арттырыр өсөн күп мөмкинлек бирә. Форсаттан файҙаланып, ваҡытын әрәм итмәгән кешеләр бәхетле.

Мосолман ҡәрҙәштәребеҙ был изге айҙа Раббыбыҙҙың ризалығына ирешергә ынтылып, әжер-сауаптар өмөт итеп, яҡшы эштәр башҡара. Аллаһ Рәсүле салләллаһу ғәләйһи үә сәлләм дә, ошо ваҡытты донъялағы иң шәп көндәр тип, уларҙа изгелек ҡылып ҡалырға ҡушҡан. Ҡөрьән-Кәримдә Аллаһтың ошо ун көн менән ант итеүе лә күп нәмә тураһында һөйләй.

Был көндәрҙе нисек үткәрергә кәңәш ителә?

Динле кешегә, ысын күңелдән тәүбә итеп, Аллаһу Тәғәләгә бар эштәрен тапшырып, тәүәккәл итеп йәшәй башларға кәрәк. Ошо көндәрҙе гонаһлы, шикле ғәмәлдәрҙән һаҡланып, йырағайып, файҙалы үткәрергә тырышыу зарур.

Ибне Ғәббәстән еткерелгән хәҙис: «Зөлхизә айының тәүге ун көнөндә ҡылынған яҡшылыҡты Аллаһ нығыраҡ ярата». Унан: «Хатта Аллаһ юлындағы йыһаттан да нығыраҡ яратамы?!» – тип һорағандар. Ул шулай тип яуап биргән: «Аллаһ юлында ғүмерен, мөлкәтен ҡурҡыныс аҫтына ҡуйып, аҙаҡ бер ниһеҙ ҡайтҡан кешенән башҡа, хатта йыһаттан да" (Бохари, Әбү Дауыт).

Был көндәр − Ғаләмдәр Хужаһының Рәхмәте һәм бүләге, башҡа ваҡытта өлгәшә алмаҫлыҡ әжер-сауапҡа ирешеү мөмкинлеге булып тора. Шуның өсөн дә был форсаттан файҙаланып, ошо осорҙа мөмкин тиклем күберәк ғибәҙәт ҡылып, изге эштәр башҡарып өлгөрөргә кәрәк. Тәҡүәле мөьминдәр элек-электән өс дәүерҙе − Рамаҙан айының һуңғы ун көнөн, Зөлхизә һәм Мөхәррәм айҙарының тәүге ун көнөн ҙурлаған.

Нимәгә айырыуса ныҡ иғтибар итергә кәрәк?

Ошо көндәрҙә хаж һәм ғөмрә йолаларын башҡарыу – иң яҡшыһы. Аллаһу Тәғәлә Үҙенең йортона килеп, фарыз ғәмәлде үтәгән һәр бер ҡолон Йәннәткә индерәсәк.

Ураҙа – был көндәрҙә иң яҡшы һәм сауаплы ғәмәлдәрҙең береһе. Пәйғәмбәребеҙ Мөхәммәд ғәләйһис-саләтү үә сәлләм, Ғәрәфә көнөндә ураҙа тоторға кәңәш итеп, был ғәмәлдең әһәмиәтен аңлатҡан. Имам ән-Нәүәүи, рәхимуллаһ, үҙенең китаптарында: «Был көндәрҙә ураҙа тотоу сөннәт, маҡтаулы», – тип яҙған.

Ҡәҙерле уҡыусыларыбыҙ, ошо көндәрҙең фәтеүә менән үтеүен теләһәк, Аллаһ Ризалығы өсөн намаҙҙарығыҙҙы күберәк йәмәғәт менән уҡырға, тәкбир, тәһлил, тәһмидтән өҙөлмәй, йышыраҡ зекер итеп, мохтаждарға хәйер-саҙаҡа тапшырып, Ҡөрьән-Кәрим уҡып, бихисап изгелектәр ҡылып ҡалырға тырышайыҡ. Аллаһ беҙгә ярҙам һәм мәғфирәт итһен!

Дини календарҙан,