«Уҡыған һайын күңелдә еңеллек тойҙом...»
Красноусол ҡасабаһына юлланған һуңғы автобус китергә әҙ генә ваҡыт ҡалған. Автовокзалға ике туҡталыш ҡалғас, трамвай боҙолдо. Бына-бына автобус ҡуҙғалырға торғанда барып еттем етеүен, билетһыҙ ултыртмайбыҙ, тип, кондуктор алманы.
Күптән ниәтләгән сәфәр өҙөлөп ҡалыуына, бер аҙ күңел кителеп уйланып торғандан һуң, Чесноковка ауылында йәшәгән ҡыҙыма барып ҡайтырға иҫәпләп, автобус туҡталышына йүнәлдем.
Шаулап торған ҡала ығы-зығыһынан һуң тынлыҡҡа төрөнгән ауыл урамына килеп төшкәс, фекер асылып, күңел күтәрелеп китте. Йыш ҡына сәләмләшеп, хәл-әхүәл һорашып йөрөгән Ғәлиә апайҙы осратып, «Әс-сәләм» гәзитенең бер нисә һанын тоттороп, ҡыҙымдың өйөнә табан атланым...
Күпмелер ваҡыттан һуң, ошо урамдан китеп барышлай, юлдың икенсе яғынан таныш булмаған апайҙың исемләп өндәшеүенә яуаплап, сәләм биреп эргәһенә барҙым. Ҡайғынанмы, йоҡоһоҙлоҡтанмы йонсоуы йөҙөнә сыҡҡан апайҙың. Бер-ике һүҙ алышып, танышып алғас:
– Быны һин килтергәйнеңме? – тип, һүҙ ҡушыуының сәбәбен аңлатты Разия апай, ҡулындағы «Әс-сәләм»гә күрһәтеп. Эйе, тигәнде аңлатып баш ҡаҡҡас, Разия апай үҙе тураһында һөйләп алып китте:
– Ҡайғыны күп күрергә тура килде, туғаным. Йәшләй генә ирем үлеп ҡалып, ике баланы яңғыҙ үҫтерҙем. Ниндәй ауырлыҡ, михнәт булһа ла, түҙемлек менән үткәрергә, бирешмәҫкә тырыштым. Балаларҙы башлы-күҙле итеп, тыныслап йәшәйем тигәндә, берҙән-бер улым ҡаты сирләп китте. Хәҙер инде бер аҙна комала ятҡан улымдың алдағыһын табиптар ҙа аныҡ ҡына әйтә алмай. Баштағы уйҙан, өмөтһөҙлөктән ҡотолор әмәл юҡ. Билдәһеҙлектән йоҡо ҡасты. Бала ҡайғыһы бигерәк ауыр, башҡаларға күрһәтмәһен. Кисә күршемә ингәйнем, ул миңә ошо гәзиттәрҙе тотторҙо. Уҡыған һайын күңелдә еңеллек тойҙом, уҡыған һайын тынысландым.
Һынау, бәлә-ҡаза килгәндә, күңел тыныслығына бигерәк тә мохтаж булаһың шул. Шәйех Ғатаулла әл-Искәндәриҙең: «Эй, Раббым! Һине табыусы берәй нәмә юғалтҡанмы әллә? Һине юғалтҡан берәй нәмә тапҡанмы?», – тигән һүҙҙәре иман юлында бәндәнең ауыр һынауға ла бирешмәй, сыҙамлыҡ, рухи тыныслыҡҡа эйә булыуы тураһында. Аллаһты Раббыһы тип таныған, ә үҙен Уның ҡоло тип белгән кешегә иман тәме еңеллек, ҡайғы-михнәттәрҙе тыныслыҡ менән ҡабул итергә мөмкинлек бирә.
«Әс-сәләм»де төрөп ҡулына тотҡан килеш, Разия апай тағы ла илһамланып, борсолоуҙарын онотоп, күңелендә тәьҫир ҡалдырған мәҡәләләр тураһында, башындағы һорауҙарға ошо гәзит битенән яуап таба алыуы тураһында һөйләне.
Йөрәктән сыҡҡан һүҙ генә йөрәккә барып етә, тиҙәр. Күңел йылыһы һалынған ошо баҫманың ойоштороусыларына һоҡланыу ҡатыш рәхмәттәремде уҡып, трамвай боҙолоп, автобусҡа һуңлап ҡалыуыма шатланып, юлымды дауам иттем.
