Зәйтүн - яман шештән дауа

Зәйтүн - яман шештән дауа

Белеүебеҙсә, изге Ҡөрьәндә зәйтүн ете тапҡыр иҫкә алына. Әйтелгән: “Ул һеҙгә ҡыяҡлыларҙы, зәйтүнде, финикты, виноградты һәм башҡа төрлө емештәрҙе үҫтерә. Ысынында, фекер итеүселәргә бында ишара бар” (Ән-Нәхл сүрәһе, 11-се аят).

Бөтә донъя буйынса онкология патологияһы халыҡ үлеменең сәбәптәре араһында беренсе урында тора. Һуңғы йылдарҙа медицина һиҙелерлек үҫеш кисерһә лә, яман шештән профилактика һаман да мөһим мәсьәлә булып ҡала.

Рак, йәғни яман шеш барышында күҙәнәктәр контролһеҙ рәүештә үрсей башлай һәм эргәләге туҡымаларға үтеп инеп тарала. Бөтә Донъя һаулыҡ һаҡлау ойошмаһы статисткаһы буйынса, һуңғы алты йылда был ауырыуҙан үлеүселәр һаны арта барған. Һөҙөмтәлә, планетаның һәр бишенсе кешеһе рак менән ауырый, һәр 11-се ҡатын һәм һәр 8-се иргә ошо ауырыуҙан үлеү ҡурҡынысы янай, тиелә.

Американың Нью-Джерси штатындағы Ратгер университеты ғалим-диеотологы һәм Нью-Йорктағы Хантер колледжының ике биолог-онкологы тәүге һығылған зәйтүн майында рак күҙәнәктәрен үлтерә торған ингридиентты тапҡандар. Олеокантал тип аталған был ҡушылма һау күҙәнәктәргә зыян итмәй, ә яман шеш күҙәнәген емерә, һөҙөмтәлә, ул ферменттың үлеменә килтерә. (“Ратгерс тудей” журналынан килтерелә).

Бар маҡтауҙарыбыҙ Аллаһҡа, Уға шөкөр итәбеҙ, сөнки һөйөклө Пәйғәмбәребеҙ ﷺ динебеҙ аша беҙгә бар ауырыуҙарҙың да дауаһын әйтеп биргән − тән ауырыуынан да, йән ауырыуынан да. Шуныһы йәл, беҙ уларға аҙ иғтибар итәбеҙ. Хөрмәтле, мосолмандар, зәйтүн емешен ашағыҙ, һаулығыҙҙы нығытығыҙ!