Файҙалы һабаҡтар

Һеҙ кишер, ҡыҙыл сөгөлдөр һабаҡтарының файҙалы икәнен белә инегеҙме?

Цистит булғанда, 0,5 л һыуҙа бер тотам кишер һабаҡтарын ун минут ҡайнатырға, һыуынғас, һөҙөп алырға һәм тигеҙ порцияларға бүлеп, ашар алдынан, көнөнә 3-4 тапҡыр эсергә кәрәк.

Шулай уҡ, бер стакан тигеҙ күләмдә туралған кишер һабаҡтарын һәм петрушка япраҡтарын 0,5 л ҡайнаған һыуға һалып төнәтергә, көнөнә өс тапҡыр, ашағанға тиклем 30 минут ҡала, ярты стакан эсергә мөмкин.

Һәр кис, йылы ваннанан һуң, эсегеҙгә, ҡуйы итеп кишер һабаҡтары ҡайнатылған төнәтмәгә мансып, боҫлама (компресс) ҡуйһағыҙ, бөйөрҙәге, бәүел ҡыуығындағы ҡомдан һәм таштарҙан ҡотолорһоғоҙ. Боҫламаны иртәнгә тиклем тоторға кәрәк. Полиартрит булғанда, боҫламаны ауыртҡан урынға һалалар. Дауаланыу оҙайлы, әммә һөҙөмтәле.

Сөгөлдөр япрағында аскорбин, фолий кислоталары, В1, В2, Р, РР, калий, кальций, магний, йод, тимер күп, ә С витамины тамырына ҡарағанда ла күберәк. Диабет, йөрәк-ҡан тамырҙары, ҡалҡан биҙе сирҙәре, аҙ ҡанлылыҡ (анемия) менән яфаланыусыларға даими ҡулланырға тәҡдим ителә. Баш, күҙҙәр ауыртҡанда, сөгөлдөр япрағын маңлайға бәйләп ҡуйыу ҙа хәлде еңелләштерә. Һипкелдәрҙе, биттәге таптарҙы сөгөлдөр һутын ҡулланып ағартырға була. Эс ҡатҡан ваҡытта, сөгөлдөр япраҡтарын 2-3 минут талғын утта ҡайнатып, көнөнә бер нисә тапҡыр эсергә мөмкин.