Шайтан яҙмалары
Изге эштәр байрамы
Бөгөн шул тиклем насар көн ине. Иртәнән бирле толҡа тапманым. Хәс тә ағыуланған кеүек булдым. Юҡ, юҡ, минең көн түгел был. Ә беләһегеҙме ни өсөн? Бөгөн Изге эштәр байрамы үткәрелә, был көндө бөтә кеше бер-береһенә ярҙам итергә тырыша. Уй-уй-уй, барығыҙҙы ла шайтан алғыры! Бына барығыҙ ҙа үлеп бөтһә, мин барлыҡ ыҙаларымдан ҡотолор инем. Ошо байрамығыҙ – Изге эштәр көнө юҡҡа сыҡһын ине ул!
Был көн ҡот осҡос насар булһа ла, мин барыбер хаслыҡ ҡылып өлгөрҙөм. Һа-һа-һа! Балаҫтар менән сауҙа итеүсе Фәриҙун хажиҙың башын алйотландырҙым бит. Ошо байрамға ул миллион һум хәйриә аҡсаһы бүлергә ниәтләгәйне. Ләкин мин уға был эште атҡарып сығырға ирек бирмәнем. Һа-һа-һа! Ул, яҡшы эш эшләрмен, тип уйлағайны, ләкин мин уға ҡамасаулап өлгөрҙөм. Һа-һа-һа! Ә хәҙер тарихын тыңлағыҙ.
Ул байрамға барыу ниәте менән машинаһына инеп ултырыуы булды, мин дә эргәһенә ҡунаҡланым. Яйлап ҡына уның ҡолағы эргәһенә яҡынлаштым да шыбырлай башланым: «Фәриҙун хажи! Һеҙ хәйриә өсөн бик күп сығымдар бүлдегеҙ бит. Инде хәҙер башҡаларҙың сираты». Мин был һүҙҙәрҙе әйткәс, Фәриҙун хажи: «Ләғнәт төшһөн һиңә, Шайтан!» – тине. Ләкин мин туҡтап ҡалманым. Мин уға: «Тыңла әле, Фәриҙун! Ниңә әле һин шунда уҡ шайтанды ҡарғайһың? Үткән айҙа ғына бит һин ер тетрәүенән ҡаза күргәндәргә миллион аҡса күсерҙең. Үткән айҙа яман шеш менән ауырығандарға ла ике миллион аҡса бүлдең. Теге аҙнала мәсеттә һыу эсер өсөн кулер алып ултырттың. Унан башҡа үткән айҙа ауылыңдағы мохтажлыҡ кисергән ғаиләләргә ярҙам күрһәттең».
Фәриҙун хажи телмәремдең уртаһына еткәс, ҡапыл ҡалҡынып: «Шайтан алғыры мәлғүн! Уның ҡотҡоһоноң сиге юҡ!» – тип ҡысҡырып ебәрҙе.
Һа-һа-һа! Ә бит ул хаҡлы ине. Шайтан ҡотҡоһоноң осо ла, ҡырыйы ла юҡ.
Мин яңынан уның ҡолағы эргәһенә яҡынлаштым һәм шыбырлай башланым: «Тыңла мине, Фәриҙун! Шайтанды ҡарғама. Хәйриә эштәренең дә үҙ сиге бар. Аллаһу Тәғәлә һинән бик риза. Һин мотлаҡ Йәннәткә эләгәсәкһең. Шулай булғас, аҡсаңды үҙеңә лә ҡалдыр инде».
Ошо рәүешле, мин уны шул тиклем оҙаҡ өгөтләнем, һеҙ күрһәгеҙ икән! Һа-һа-һа! Ниһайәт, Фәриҙун хажиҙы байрамға барып тормаҫҡа күндерә алдым. Эшемде бөтөргәс, ул былай тип әйтте: «Мин быйыл бик күп изге эштәр эшләнем. Етеп торор. Аллаһ бойорһа, киләһе йыл тағы хәйриә эштәре менән булашырмын».
Һа-һа-һа! Фәриҙун хажи – аҡыллы кәсепсе. Тик мин уны нисек ахмаҡландырҙым! Һа-һа-һа! Бөгөн ҡот осҡос насар, уңайһыҙ көн булһа ла, алйотландыра алдым бит. Һәм миңә был бик оҡшаны. Һа-һа-һа! Көлдәре күккә осһон был байрамығыҙҙың! Изге эштәр көнө, имеш! Һа-һа-һа!
