Ғәжәп бер хәл
Ғәжәп бер хәл
Мөхәммәд һәм Ноғман (Аллаһ уларҙан риза булһын): «Беҙ Пәйғәмбәр ғәләйһис- сәләм янында булғанда, эргәбеҙгә бер ансар егете йомош менән килде. Расүлүллаһ ғәләйһис- сәләм уның хәлен Әбү Бәкер әс- Ситдик (Аллаһ унан риза булһын) менән еңеләйтте.
Расүлүллаһ ғәләйһис- сәләм уға: «Эй Әбү Бәкер! Минең менән һинең арала был егетте ултыртыуым, бәлки, һиңә ауырҙыр?», − тине.
Әбү Бәкер (Аллаһ унан риза булһын): «Эйе, валлаһи, эй Расүлүллаһ! Миңә, ысынлап та, минең менән һинең арала берәүҙең булыуы бик ауыр», − тип әйтте.
Расүлүллаһ ғәләйһис- сәләм: «Эй Әбү Бәкер, был егет миңә салауат әйтә. Бындай салауатты миңә өммәтемдән башҡа бер кемдең дә әйткәне юҡтыр», - ти.
Әбү Бәкер (Аллаһ унан риза булһын): «Эй Расүлүллаһ, ул нисек әйтә?» - тип һорай.
Пәйғәмбәр ғәләйһис- сәләм түбәндәге салауатты килтерә: «Аллааһүммә салли ғәләә Мүхәммәдин ғәдәдә мән салләә ғәләйһи, үә салли ғәләә Мүхәммәдин биғәдәди мән ләм йүсалли ғәләйһи үә салли ғәләә Мүхәммәдин кәмәә әмәртә биссаләәти ғәләйһи үә салли Мүхәммәдин кәмәә тухиббу ән түсалләә ғәләйһи үә салли ғәләә Мүхәммәдин кәмәә йәнбәғи ән йүсалләә ғәләйһи».
Мәғәнәһе: «Эй Аллаһым! Мөхәммәдкә − уға салауат әйткән кешеләр һанынса, салауат әйт! Уға салауат әйтмәгән кешеләр һанынса ла, уға салауат әйтергә бойорғаныңса, яратҡаныңса, нисек тейеш − шулай әйт!»
Һис шикһеҙ, пәйғәмбәребеҙ Мөхәммәд ғәләйһис- сәләм ҡаршыһында, Раббыбыҙ һәм пәйғәмбәрҙәрҙән һуң, Әбү Бәкер әс- Ситдик (Аллаһ унан риза булһын) өлөшөнән дә ҙурыраҡ өлөшкә эйә булыусы юҡтыр. Унан һуң Ғүмәр, унан Ғосман, унан Ғәли (Аллаһ уларҙан риза булһын). Уларға һәм һәммә сәхәбәләргә уның салауаттары үә рәхмәте булһын!
Юғарыла аңлатып киткәнсә, Пәйғәмбәр ғәләйһис- сәләм, был егетте үҙе һәм Әбү Бәкер араһына ултыртып айырып ҡуя. Аллаһу Тәғәлә уға илһам биргәнгә, ул салауат менән Пәйғәмбәрҙе шулай хөрмәтләй. Аллаһының уға салауаттары һәм сәләмдәре булһын!
Илшат Хафизиҙың, «Салауат- шәрифтәр» китабынан
