Пәйғәмбәрҙең ﷺ күккә ашыуы
Пәйғәмбәрлектең ун икенсе йылы. Рәжәб айының 22-се төнөндә Ябраил фәрештә, Бураҡ тигән Ожмах атын алып, Пәйғәмбәр ﷺ артынан килә. Мөхәммәд ﷺ, Бураҡҡа атланып, Ябраил оҙатыуында, күҙ асып йомғансы Иерусалимда була. Улар, Мөхәммәд Пәйғәмбәргә ﷺ тиклем үк табыныу урыны булған Әл-Аҡса мәсете янына төшәләр. Бураҡты мәсеттең ҡапҡа бағанаһына бәйләп, Пәйғәмбәр ﷺ эскә инә. Унда элекке замандарҙың пәйғәмбәрҙәре йыйылған була, улар Мөхәммәдкә ﷺ сәләм бирә. Хәбибуллаһ (Аллаһтың һөйөклөһө) ﷺ имам булып, бөтә пәйғәмбәрҙәр менән бергә йәмәғәт намаҙы уҡыйҙар.
Шунан һуң Ябраил Мөхәммәдкә ﷺ ике тулы кәсә килтерә. Уларҙың береһендә – һөт, икенсеһендә шарап була. Пәйғәмбәр ﷺ һөтлө кәсәне ала, һәм Ябраил: «Һин кеше тәбиғәтенә тура килгән динде һайланың. Һин һәм һинең өммәтең хаҡ юлда буласаҡ. Әгәр һин шараплы кәсәне алған булһаң, һинең өммәтең яңылыш юлдан китер ине», – ти.
Шунан Ябраил Бураҡта ултырған Мөхәммәд ﷺ менән күктең беренсе (түбәнге) ҡатына күтәрелә һәм ҡапҡаларҙы асыуҙарын һорай. Ҡапҡалар асылғас, Хәбибуллаһ ﷺ Әҙәм пәйғәмбәрҙе күрә. Уның уң яғында – Ожмахҡа лайыҡ йәндәр (шәһиттәр), һул яғында гонаһ әһелдәренең (уларға Тамуҡ әҙерләнгән) йәндәре була. Әҙәм, бәхетле йәндәргә ҡараған саҡта, йылмайған. Ә гонаһ эйәләренә ҡарағанда, илаған. Мөхәммәд Пәйғәмбәрҙе ﷺ күргәс, бар кешелектең атаһы кешеләрҙең иң яҡшыһының сәләменә яуап бирә һәм уның пәйғәмбәрлегенең хаҡ булыуын раҫлай.
Шунан һуң Ябраил менән Хәбибуллаһ ﷺ икенсе ҡат күккә күтәреләләр. Унда Пәйғәмбәребеҙ ﷺ Зәкәриә улы Яхьяға һәм Мәрйәм улы Ғайсаға сәләм бирә. Улар Мөхәммәдтең сәләменә яуап бирә һәм уның пәйғәмбәрлегенең хаҡ икәнлеген раҫлай.
Ябраил менән Пәйғәмбәребеҙ ﷺ өсөнсө ҡат күккә менәләр. Унда Йософ пәйғәмбәрҙе күрәләр. Ул да сәләмгә яуап бирә һәм. Мөхәммәдтең ﷺ пәйғәмбәрлегенең хаҡлығын раҫлай.
Күктәрҙең дүртенсе ҡатында улар Иҙрис пәйғәмбәрҙе осраталар һәм сәләм бирәләр. Ул да сәләмгә яуап бирә, һәм ул да Хәбибуллаһтың ﷺ пәйғәмбәрлегенең ысын икәнлеген раҫлай.
Бишенсе ҡат күктә, Ғимран улы Һарунды осратып, сәләм бирәләр. Ул да, башҡа пәйғәмбәрҙәр кеүек, сәләмгә яуап бирә һәм Аллаһ Хәбибенең ﷺ пәйғәмбәрлегенең дөрөҫ икәнлеген раҫлай.
Алтынсы күккә күтәрелгәс, Һарун улы Мусаны күрәләр һәм сәләм бирәләр. Муса ла сәләмгә яуап бирә һәм Мөхәммәдтең ﷺ пәйғәмбәрлеген таный. Пәйғәмбәребеҙ ﷺ уның янынан киткәндә, Муса илай. Мөхәммәд ﷺ унан: «Ниңә илайһың?» – тип һорай. Муса уға: «Сөнки минән һуңыраҡ пәйғәмбәр итеп ебәрелгән кешенең өммәтенән Ожмахҡа инеүселәр күберәк буласаҡ, ә минең өммәтемдән түгел», – тип яуап бирә.
Етенсе күктә улар, Ибраһим ﷺ пәйғәмбәрҙе күреп, сәләм бирәләр. Ул сәләмде ала һәм Мөхәммәдтең ﷺ пәйғәмбәрлегенең ысын икәнлеген раҫлай.
Ибраһим пәйғәмбәр арҡаһы менән күктәге фәрештәләр Ҡәғбәһе – әл-Бәйт әл-Мәғмүргә һөйәлеп ултыра. Күк Ҡәғбәһен көн һайын етмеш мең фәрештә урап сыға, һәм уларҙың береһе лә ҡабат әйләнеп килмәй.
Ниһайәт, Пәйғәмбәребеҙ ﷺ менән Ябраил фәрештә күктәрҙең һуңғы сигенә – Сидрат әл-Мүнтәһәгә килеп етәләр. Ябраил фәрештә ошо урында туҡтай һәм артабан барырға уға рөхсәт юҡлығын әйтә. Һәм Пәйғәмбәребеҙ ﷺ артабан юлды яңғыҙы дауам итә. Ул һаман юғарыға күтәрелгәндән-күтәрелә. Аллаһу Тәғәләнең ҡаршыһына килеп баҫҡансы, үрләүен дауам итә. Ҡөҙрәт Эйәһе Бөйөк Аллаһ ваҡыт һәм арауыҡтан азат була (һәр саҡ шулай).
(Дауамы киләһе һанда)
