Пәйғәмбәрҙең ﷺ кейем-һалымы
Пәйғәмбәрҙең ﷺ кейем-һалымы
-Мөхәммәд Пәйғәмбәр ﷺ йөн һәм етендән тегелгән кейемдәрҙе кейергә яратҡан (Бохари; Мөслим; Тирмиҙи; Әбү Дәүд).
-Аллаһ Илсеһенең ﷺ иң яратып кейгән кейеме күлдәк (ҡамис) булған һәм кейеменең оҙонлоғо шайтан ашығына етмәгән, ә ең оҙонлоғо ҡушҡар (беләҙек) һөйәктәренә йәки бармаҡ остарына етеп торған булған (Тирмиҙи; Әбү Дәүд; Нәсәи).
-Пәйғәмбәребеҙ ﷺ сапан (бурда) кейеп йөрөгән (Бохари; Мөслим).
-Рәсүлебеҙ ﷺ шулай уҡ тегелмәгән изар (тауар киҫәге; кәүҙәне билдән түбән (ғәүрәт) урындарҙы ҡаплау өсөн билгә бәйләй торған япма) һәм ридә (еңһеҙ киң өҫ кейеме, накидка) кейгән (Бохари; Мөслим).
-Пәйғәмбәр ﷺ уңайлы булһын өсөн сирүәл (салбар, ыштан) кейеп йөрөгән (Һәйҫәми).
-Аллаһ Рәсүле ﷺ күлдәгенең төймәләрен ҡайһы берҙә элгән, ә ҡайһы берҙә эләктермәй ҙә йөрөгән (Әбү Дәүд; ибне Мәджәһ).
-Пәйғәмбәребеҙ ﷺ бер ваҡытта ла салмаһыҙ йөрөмәгән һәм бер тапҡыр ҙа ялан баш намаҙ уҡымаған (Бохари; Мөслим; Әбү Дәүд; Тирмиҙи; Нәсәи; ибне Мәджәһ; Табәрани; әл-Бәни).
-Пәйғәмбәр ﷺ башына һәр ваҡыт аҡ, ҡара, һирәк осраҡта һары төҫтәге, оҙонлоғо 2,5-3 метр булған салма кейгән. Салмаһының осон иңбаштары араһына төшөрөп һалған (Бохари; Мөслим; Әбү Дәүд).
-Аллаһ Илсеһе ﷺ салма аҫтынан түбәтәй кейгән (Мөслим).
-Рәсүлебеҙ ﷺ аяғына ике ҡайышлы һәм баулы сандали кейеп йөрөгән (Бохари; ибне Мәджәһ).
-Мөхәммәд Пәйғәмбәр ﷺ походҡа (һуғышҡа) барғанда ла, өйҙә торғанында ла аяғына йомшаҡ күндән тегелгән ситек кейгән (Бохари).
