Салауат әйтеү рәүеше
Салауат әйтеү рәүеше
Пәйғәмбәр ғәләйһис-сәләмдән риүәйәт ителгәнсә, ул бер ирҙән: «Уҙған көндө һин ниндәй хәйерле һүҙ әйттең?» – тип һорай.
Әлеге ир: «Эй Рәсүлуллаһ! Аллаһуммә салли ғәләә Мүхәммәдин үә ғәләә әәли Мүхәммәдин хәттәә ләә йәбҡаа минәс-саләүәәти шәй′ун, үәрхәм Мүхәммәдән үә ғәәлә Мүхәммәдин хәттәә ләә йәбҡаа минәр-рахмәәти шәй′ән», йәғни «Аллаһу! Мөхәммәдкә салауат әйт, салауат бөткәнсе, Мөхәммәдкә, Мөхәммәд ғаиләһенә мәрхәмәт ҡыл һәм Пәйғәмбәр Мөхәммәд ғәләйһис-сәләмдең ғаиләһе Аллаһу Тәғәләнең һис бер рәхмәтенән дә мәхрүм ҡалмаһын», тип Уға салауат әйттек», – ти.
Рәсүлүллаһ ғәләйһис-сәләм: «Шуның менән мин фәрештәләрҙең үткән көндө Мәҙинә урамдарында йөрөгәндәрен күрҙем», – тип әйтә.
Эй мосолмандар, пәйғәмбәрҙәр Хужаһына салауатты күп әйтегеҙ!
Иң яҡшы дуҫҡа, иң хөрмәтле изгегә, ҡатындар тыуҙырған иң шөһрәтле әҙәмгә һис бөтмәҫ даими салауат әйтегеҙ.
Риүәйәттә Рәсүлүллаһ ғәләйһис-сәләм: «Миңә салауатты иң күп әйтеүсе – минең иң яҡын дуҫым», – тигән (Тирмиҙи).
Эй Ислам әһеле, уға салауатты күп әйтегеҙ! Шуның менән ҡаты ғазаптан ҡотолорһоғоҙ, уның менән Малик Ғаләм ризалығын өҫтәрһегеҙ!
Илшат Хафизиҙың
«Салауат- шәрифтәр» китабынан
