Имам Малик

Имам Малик

Имам Маликка килгәндә, ул – Әнәс улы Әл-Әсхәби. Ул имамдарҙың имамы, сөннәтте яҡлаусы, Мәҙинә ҡалаһының ғалимы, өммәтте дөрөҫ юлдан алып барыусы. Бар ғалимдар ҙа берҙәм рәүештә уның бөйөк имам булыуын, заһитлығын, күп хәҙистәрҙе иҫтә тотоуын һәм Пәйғәмбәребеҙҙе ﷺ ололауын таный.

Сөнки ул берәй хәҙисте һөйләр алдынан башта тәһәрәт алған, урындығының ситенә ултырып, һаҡалын тарар булған. Шунан хушбуй һөртөп, йәтеш итеп ултырып, ҙур ихтирам һәм хөрмәт менән, тантаналы рәүештә хәҙисте һөйләй башлаған. Унан: «Ни өсөн шулай ентекле итеп әҙерләнәһең?» – тип һорағас: «Мин Аллаһ Рәсүленең ﷺ хәҙистәрен данларға яратам», – тип яуап ҡайтарған.

Бер мәл имам Шәфиғи һөйләй: «Мин уның ҡапҡаһы алдында хорасән тоҡомло аттар һәм мысыр тоҡомло мулдарҙы күрҙем. Уларҙан да матурыраҡ хайуандарҙы күргәнем юҡ ине», – ти. Мин Маликҡа: «Ҡалай улар матурҙар!» – тип өндәштем. «Улар минән һиңә бүләк», – тине имам Малик. Имам Шәфиғи: «Был аттар менән мулдарҙың берәүһен булһа ла үҙеңә йөрөр өсөн ҡалдыр», – тигәс: «Мин хайуандарҙың тояҡтары менән Аллаһтың һөйгәне ятҡан ерҙе тапарға Аллаһтан оялам», – тигән яуап ишетә. Имам Маликтың Мәҙинә ерҙәренә ҡарата булған хөрмәт тойғоһо һәм уның йомартлығы, һис шикһеҙ, иғтибарға лайыҡ.

Ул Һижри календары буйынса 95 йылда тыуа һәм 179 йылда 84 йәшендә вафат була.

(Дауамы бар. Башы гәзиттең үткән һандарында)

Әбү –Бәкр әл-Аймаҡиҙың «Фазаилүл Хәбиб» китабынан