Мосолмандарҙың Аркамдың өйөндә йыйылыуы
Пәйғәмбәрлек осоро башланыуға бишенсе йыл китә. Тәүге мосолмандарҙы йәберләү, эҙәрлекләү көндән-көн көсәйә. Айырыуса ҡорайыштарҙың ҡолдарына һәм ярлыларға ауыр була. Шуға күрә Аллаһ Рәсүле ﷺ уларға ислам ҡабул итеүҙәрен белдермәҫкә ҡуша һәм улар менән йәшерен осраша башлай.
Осрашыу өсөн Мәккәләге абруйлы һәм хөрмәтле кешеләрҙең береһе булған Арҡам ибне Әбүләрҡам әл-Мәхзүмиҙең өйөн һайлай. Арҡамдың өйө кеше күҙенән алыҫта − Мәккәнең көнсығыш яғында, Сафа ҡалҡыулығы артында, Ҡәғбә күренеп торған ерҙә − урынлашҡан була.
Арҡамдың өйөндә тәүге мосолмандар үҙҙәрен мөшриктәрҙән яҡлаулы һиҙгән. Аллаһ Рәсүле ﷺ мосолмандарға ислам тураһында тыныс һәм иркенләп һөйләй алған. Һөйөклө Пәйғәмбәребеҙҙең ﷺ ҡарамағы һәм рухи тәрбиәһе аҫтында мосолмандар араһында туғандарса мөнәсәбәт урынлаша. Кешеләр, ҡорайыштарҙан йәшеренеп, Арҡамдың өйөнә киләләр һәм ислам ҡабул итәләр.
Пәйғәмбәребеҙ ﷺ Изге Ҡөрьән аяттарын уҡый һәм аңлата. Сәхәбәләр Пәйғәмбәр ﷺ менән йыш һәм оҙаҡ итеп бергә була алғандарына ҡыуаналар, уны йотлоғоп тыңлайҙар. Аллаһ Илсеһенең ауыҙынан сыҡҡан һәр бер һүҙҙе мосолмандар ятлап ала.
Пәйғәмбәр ﷺ үҙе был ваҡытта кешеләрҙе асыҡтан-асыҡ исламға саҡырыуын дауам итә һәм мәжүсиҙәрҙең күҙ алдында Ҡәғбә янында намаҙ уҡый.
Бер ваҡыт Пәйғәмбәребеҙ ﷺ Ҡәғбә эргәһендә намаҙ ҡыла. Яҡында торған мөшриктәрҙән берәү: «Кемегеҙ, Мөхәммәд ергә эйелгәндә, уның арҡаһына малдың эс-ҡарынын ырғыта ала?» − тип һорай. Араларынан иң әшәкеһе − Ғүҡбә ибне Әбүмүғайт: «Мин!» − ти. Ул дөйә эсәктәрен алып килә. Пәйғәмбәребеҙҙең ﷺ сәждәгә киткәнен көтөп тора ла, ҡорайыштарҙың күҙ алдында Аллаһ Рәсүленең ﷺ арҡаһына малдың эсәктәрен һала. Мөшриктәр хахылдашып көлә. Ә Пәйғәмбәр ﷺ башын күтәрмәй, сәждәлә ҡала. Шул арала йүгереп килеп еткән Пәйғәмбәребеҙҙең ﷺ ҡыҙы Фатима атаһының арҡаһынан эсәктәрҙе алып ташлай.
Намаҙҙан һуң Аллаһ Рәсүле ﷺ, ҡулдарын күтәреп: «Йә Аллаһ, ҡорайыштарға яза бир!» − тип өс тапҡыр ҡабатлай. Шунан Пәйғәмбәр ﷺ исемләп һанап сыға: «Йә Аллаһ, Әбделджәһилгә, Ғүтбә ибне Рабияға, Шәйбә ибне Рабияға, Вәлид ибне Ғүтбәгә, Өмәй ибне Хәләфкә һәм Ғүҡбә ибне Әбүмүғайтҡа яза бир». Был доға мөшриктәргә бик ныҡ тәьҫир итә.
Аҙаҡ Пәйғәмбәребеҙ ﷺ сәхәбәһе Абдуллаһ ибне Мәсғүд: «Ул көндө Пәйғәмбәребеҙ ﷺ кемдәрҙең исемен атаған, бөтәһе лә Бәҙер һуғышында үлтерелде. Мин уларҙың ҡоҙоҡ эсенә ырғытылған мәйеттәрен үҙем күрҙем», − тип һөйләй.
