Сәлиәнең йөрәк һүҙе
Сәлиәнең йөрәк һүҙе
Тамашасыларҙың һөйөүен яулаған “Йөрәк һүҙе” проекты (авторы Башҡортостандың атҡаҙанған сәнғәт эшмәкәре Наилә Сәфәрғолова) быйыл да көтөлмәгән асыштары менән ҡыуандырҙы.
Намаҙ уҡып сәхнәгә күтәрелгән бәйгеселәр араһында (быйыл ундайҙар күпселекте тәшкил итте!) БСТ каналының “Йома” тапшырыуы мөхәррире һәм алып барыусыһы Сәлиә Мөхәмәтғәлинаның еңеүселәр рәтенә күтәрелеүе бик ҡыуаныслы күренеш булды. Бәйгесенең сығышында бөгөнгө көндә һәр ҡатын-ҡыҙҙы борсоған барса һорауҙар ҙа киң яҡтыртылды: ил тыныслығы, үҫтергән уландарыбыҙҙың именлеге, төҙөлөп бөтөлмәгән мәсеттәр, ҡиблаһын юғалтҡан йәштәр...
“Аҡ фәрештә кеүек, шундай нурлы ханым. Уның һәр сығышы дәғүәт булды. Һайлаған репертуары, башҡарыу оҫталығы менән генә түгел, күркәм төҫ-ҡиәфәте, тыйнаҡлығы менән дә күңелде арбаны”,– тине уның хаҡында тамашасылар.
Сәлиә Мөхәмәтғәлина Әбйәлил районы Хәлил ауылы ҡыҙы. БДУ-ның филология һәм журналистика факультетын тамамлаған. Хәләл ефете Әхмәт хәҙрәт менән ҡорған ҡорған иманлы ғаиләһендә өс ул тәрбиәләнә.
“Минең остазым – бөтөн ғаләмгә рәхмәт итеп ебәрелгән Мөхәммәд Пәйғәмбәр ﷺ. Уның ﷺ тормошо, әйткән һүҙҙәре, ҡылған ғәмәлдәре – камил үрнәк сығанағы. Ғаиләм, туғандарым, йәмғиәтем алдындағы бурыстарымды теүәл үтәп, файҙалы кеше була алһам ине”, – ти “Йөрәк һүҙе” бәйгеһендә икенсе урын яулаусы Сәлиә Мөхәмәтғәлина.
