Тәү күреүҙән ғашиҡ итте Өфө!
Тәү күреүҙән ғашиҡ итте Өфө!
Өфө менән тәү күрешеүем йәй көнө булды. «Сибай-Өфө» поезынан төшөп, әсәйем, Ләйсән апайым һәм мин өсәүләп тимер юл вокзалы алдына сыҡтыҡ.
Йәйге матур иртә, сағыу ҡояш нурҙарын йәлләмәй ҡыҙҙыра ғына! Ҡала ҡырмыҫҡа иләүендәй гөж килә: майҙан тулы халыҡ, әсәләр балаларын ашыҡтыра, кеселәре, өлкәндәрҙән ҡалышмаҫҡа тырышып, бер-бер артлы килеп туҡтаған автобус янына йүгерә, өҫтәрәк трамвайҙар сыйылдай. Ә һауала — Өфөгә генә хас еүеш асфальт еҫе. Төнгө ҡойонда йыуынған йүкәнән дә хуш еҫтәр аңҡый! Шундай яҡын һәм ҡәҙерле ул мине тәү күреүҙән үҙенә ғашиҡ иттергән ҡояшлы, шау-шыулы, гүзәл баш ҡалам!
Сәскәләй матур хыяллы йәш сағым ошонда үтте. Инде мине лә хәҙер Өфө кешеһе, өфөлө тип әйтергә ярайҙыр. Аллаһҡа мең шөкөр, Башҡортостаныбыҙҙың йөрәге булған Өфөлә йәшәлгән 32 йыл ғүмерем даланлы, емешле, аяҙ, үкенестәренә ҡарағанда шатлыҡ-һөйөнөсө, юғалтыуҙан табыш-асыштары күберәк булды! Иллегә кереп барғанда ла мин һаман гүзәл ҡалама, Өфөнө тәү күргән балалай, һоҡланып бағам! Һәр мөйөшө, һәр өйө ҡәҙерле йөрәгемә...
Артҡа боролоп ҡарайым да, Өфөбөҙҙә төпләнеп ҡалыуыма һис кенә лә үкенмәйем, сөнки тап ошо уңдырышлы, рухлы мөхиттә Раббым миңә мул итеп тормош һабағын, ғилемдәрен бирҙе, сыныҡтырҙы, һөйгән йәрем менән осраштырҙы, әсә бәхетен бүләк итте! Бәхеттең етенсе ҡатына күтәрҙе — намаҙға баҫтырҙы, мөләйем уҡытыусым янына дини дәрестәргә ашыҡтырҙы, тәҡүәле ҡолдары менән таныштырҙы, иң мөһиме – шулар янында йөрөтә, эшләтә, күҙ тейә күрмәһен, мәә шәә Аллаһ, ләә хәүлә үә ләә ҡуүүәтә иллә билләһ!
Өмөтһөҙләнеп, күҙ йәштәренә быуылған минуттарым да булды Өфөлә. Ҡәҙерле атай-әсәйем һуңғы һулышын ошонда алды. 1937 йылда репрессияға эләгеп, ҡулға алынған Бәхтиәр ҡартатайым Өфө төрмәһендә йән биргән, һуңғы төйәге лә уның һымаҡ ерләнгән меңәрләгән исемһеҙ ҡәберҙәр араһында. Аллаһтың Ҡануны шулай: беҙ беребеҙ ҙә мәңгелек түгел. Ошо ожмахтай еребеҙҙе гөрләтеп, Өфөнө шау сәскәгә күмеп, яҡташтарым, йәндәй күргән яҡындарым менән файҙалы ғәмәлдәр ҡылып, яҡшы һүҙҙәр генә әйтеп, иманлы, ғилемле тормошта йәшәтһен ине Раббыбыҙ! Илаһи әмин!
