Шәйех Зәйнулла Рәсүлевтың тыуыуына – 190 йыл

Шәйех Зәйнулла Рәсүлевтың тыуыуына – 190 йыл

Зәйнулла ишанға

КүгәрептәятҡанУралтауҙың

Даны таралғандыр бар илгә.

Шул тауҙарҙың төпкөл ауылында

Бер изге йән тыуған донъяға.

Хәбибулла һәм дә Мәлихәнең

Ҡотло нигеҙендә ул тыуған.

Тыуған саҡта "ябай бала түгел"

Тигән ишара-билге булған.

Шәрип ауылы – кендек ҡырҡҡан ере,

Ә волосы булған Туңғатар.

Тыуған ерен, ин шәә Аллаһ, шул бала

Данға күмер әле мең ҡатар.

Исемдәрең Зәйнулла булыр, тип

Аҙанлатып кескәй баланы,

Һаулыҡ, иман, бәрәкәттәр теләп,

Атҡарғандар изге йоланы.

Бишегендә малай тыңлап ятҡан

Атаһының аҙан моңдарын.

Ата-әсәһе доғаларын уҡып,

Ҡурсап торған ғәзиз улдарын.

Бишегенән төшкәс, тәпәй-тәпәй

Атлап киткән тәүге аҙымын.

Мөғжизәле тормош матурлығын

Күҙәткәндер Зәйнулла ҡыҙығып.

Үҫә төшкәс, уйҙарына батып,

Ултырған ул Уйҙың ярында.

Күҙ һалырға донъя киңлегенә

Үрмәләгән Уйташ тауына.

Бәлки, шул саҡтарҙа Хаҡ Тәғәлә

Ҡабыҙғандыр белем сатҡыһын –

Ун ике лә генә йәше тулғас,

 Эҙләп киткән ғилем асҡысын.

Өстамаҡҡа¹ барып белем алған

Хәбибулла хәлфә балаһы.

Тырышлыҡтарына яуап итеп,

Өҫтәп ғилем биргән Аллаһым.

Остаздары Әхмәт бин Хәлит һәм

Мөхәммәт Шәрбән Мирас булған.

Шәкерт Зәйнулланың саф күңеле

Ислам дине нурына тулған.

Мәҙрәсәне бөткәс, Аҡҡужаның²

Булған ул абруйлы имамы.

Ғалим һәм дауалаусы суфыйҙың

Тирә-яҡҡа таралған даны.

Башҡорт, татар, ҡаҙаҡ балалары –

Бик күп шәкерттәре имамдың.

Мөьминдәр хәҙрәттән үрнәк алып,

Йәшәгән Аллаһҡа инанып.

Билдәле бит: төрлө кеше була,

Була шәфҡәтлеһе, көнсөлө.

Йүнһеҙ генә, түбәнсел бәндәләр

Яратмай үҙенән көслөнө.

Зәйнулла ишанды, яла яғып,

Оҙатҡандар алыҫ һөргөнгә.

Шундағы мөғжизәләр хаҡында

Аптырап һөйләйбеҙ бөгөн дә.

Яҙмышына яҙылғанды күреп,

Иҫән ҡайтҡан тыуған яғына.

Бар ихласын, бөтә көсөн һалған

Дин таратыу өсөн халҡына.

Аллаһуның ихтыяры менән

Ике тапҡыр ишан хаж ҡылған.

Бер үә Барҙың ҡөҙрәт-көсө менән

Өстамаҡта мәҙрәсә һалған.

Тубыҡтарын терәп изге ергә,

Сәждә ҡылған бөйөк Аллаһҡа.

Саф күңелдән, ихласлығы менән

Зекер әйткән бөйөк Аллаһҡа.

Ауыр һынауҙарға түҙем булған,

Бер Аллаһтан һорап сабырлыҡ.

Шәйех Зәйнулла ишандың исеме

Тарихтарҙа мәңге ҡалырлыҡ.

Дин ҡәрҙәштәр, доға ебәрәйек

Рухына Зәйнулла ишандың.

Шөкөр итеп, тулы иман менән

Йәшәйек бер Аллаһҡа ышанып.

_____________________________________________________

¹ Троицк ҡалаһы

² Башҡортостандың Учалы районындағы ауыл (Аҡҡужа)

Рәсимә Харисова, Учалы районы