Сатнаған алмас
Бер эшҡыуар Көньяҡ Африкала тауыҡ йомортҡаһының һарыһы саҡлы алмас һатып алған. Тик алмастың урта өлөшө сатнаған булып сыҡҡан. Бәлки, берәй кәңәш бирер тип, эшҡыуар ташты ювелирға (зәргәргә) күрһәткән. Ювелир һоҡланып: «Был ташты икегә бүлергә мөмкин. Бүленгән һәр өлөш гәүһәр (бриллиант) алмастың үҙенә ҡарағанда ла ҡиммәтерәк буласаҡ. Тик шуныһы бар. Әгәр яҙа һуҡһаң, был алмас бер ус ваҡ гәүһәрҙәргә әйләнәсәк. Ул ваҡытта инде уның ҡиммәте лә түбән буласаҡ. Мин был аҙымға бара алмайым», – тигән.
Башҡа ювелирҙарға күрһәтеп ҡараһа ла, эшҡыуар шул уҡ кәңәште ишеткән. Һуңғы сиктә ул Амстердамда алтын ҡуллы тип танылған оло йәштәге зәргәргә (ювелирға) мөрәжәғәт иткән. Ҡарт зәргәр ҙур ҡыҙыҡһыныу менән моноколь аша алмасты тикшергән һәм был эштең ниндәй һөҙөмтәгә килтерәсәге тураһында иҫкәрткән.
Эштең хаҡын килешкәс, зәргәр бер аҙ ситтәрәк үҙ эше менән мәшғүл ултырған өйрәнсегенә өндәшкән. Егет ташты ҡулына алып, сүкеше менән бер генә һуғып, ҡиммәтле ташты икегә бүлгән һәм, күтәрелеп тә ҡарамай, алмас киҫәктәрен хужаһына һонған.
Шаҡ ҡатып ҡалған алмас хужаһы: «Был егет һеҙҙә оҙаҡ эшләйме?» – тип һораған.
«Өсөнсө көн. Ул әле был таштың ҡиммәтен белмәй. Шуға ла уның ҡулы ныҡ булды һәм ҡалтыраманы», – тигән ювелир.
Тормошта килеп тыуған барса ауырлыҡтарҙы ла күтәрә алмаҫлыҡ тип ҡурҡып, шөбһәләнеп, шикләнеп түгел, Аллаһу Тәғәләнең ярҙамына өмөт итеп, Уға таянып, еңеллек менән үткәрәйек.
