Мөнәжәт
Һәр кешелә төрлө-төрлө холоҡ барҙыр,
Бер әҙәмдең күңеле киңдер, беренең тарҙыр.
Тар күңелде утта тотоп киңәйтергә,
Әхирәттә беҙҙең өсөн тамуҡ барҙыр.
Һәр бәндәнең ҡаршыһында − һайлау тора.
Фәрештә лә, шайтаны ла ылыҡтыра.
Ни һайлауыбыҙға ҡарап, беҙҙе көтөп,
Ҡаршыбыҙҙа ожмах менән тамуҡ тора.
Болот менән ҡапланғандыр күктең йөҙө,
Донъя менән ҡапланғандыр күңел күҙе,
Шул пәрҙәне ташламаһа, бәндә үҙе −
Мәңгелеккә ҡара булыр уның йөҙө.
Изге бәндә − ниндәй бәндә? Белһәң ине!
Изгелектә яуызлыҡ бар − күрһәң ине!
Изгелектең нәтижәһе − изгелекме,
Яуызлыҡмы − шуны алдан белһәң ине!
Изгелектең кире яғы − яуызлыҡтыр.
Һәр яуызлыҡ − күңел өсөн ауырлыҡтыр.
Яуызлыҡты ауыҙлыҡлап булмағанда,
Иң яҡшыһы − түҙә белеү, сабырлыҡтыр.
Ярҙамдарын бирер Хоҙай сабырҙарға,
Насар, тайғаҡ юлға баҫып абынғанға
Бирмәһә бирмәҫтер, бәлки, башҡаларҙы
Аллаһтан олораҡ күреп, табынғанға.
