Таң атты

Таң атты, ҡояш сыҡты,

Таралды ҡараңғылыҡ.

Мәккәле Мөхәммәдкә

Бирелде пәйғәмбәрлек.

Бар әүәлге рәсүлдәр

Таныны өҫтөнлөгөн.

Ошо – иң дөрөҫ ысул

Хаҡлығын иҫбат өсөн.

Иң пак нәҫел эйәһе,

Ҙур уның дәрәжәһе.

Уны ихтирам итә

Бөтә ғәрәп донъяһы.

Йомартлыҡ хазинаһы,

Ниғмәттәрҙең олоһо.

Хаҡ шәриғәт юлында

Өммәттең етәксеһе.

Үкһеп иланы ағас,

Телгә килде хатта таш,

Ай икегә ярылды,

Бармаҡ менән ул һыҙғас.

Изге Миғраж төнөндә

Уға Ябраил килде.

Аллаһ Раббыһы уны

Хозурына саҡырҙы.

Бөйөк Раббыбыҙ Аллаһ

Өммәтте ололаны:

Элекке гонаһтарҙың

Барыһын ярлыҡаны.

Беҙҙең Мөхәммәдебеҙ −

Беҙҙең әфәндебеҙ Ул.

Иң оло хөрмәт беҙгә −

Өндәүен итеү ҡабул.

Рамаҙан Оморҙаҡов