Имам кlвенкlве аваз
Имам кlвенкlве аваз
Фадлай инихъ инсанри мискIин хуьруьн мешреб-абур яз гьисабзава. МискIинар винелай ва къенепатай акунар гьар жуьреда безетмишнавайбур, гьар жуьреда эцигнавайбур дуьшуьш жезва.
Малум тирвал, виликдай гьукуматдин патай мискIинрал кIевивални гзаф хьанай. Вахтар дегиш хьана. Гьукуматдин къурулушар, къенепатан, къецепатан крариз талукь истемишунар къвердавай дегиш, диндин рекьерни авайдалай ачух хьана. Демократиядин къанунри и кардиз таъсир авур хьиз я, инсанрин истемишунарни гьисаба кьазва. Хуьрера жемятдин тешкилатрин куьмекарни галаз мискIинрин дараматар эцигиз, бязи чкайра аваз хьайи виликанбур туьхкlуьр хъийиз, къайдадиз хкиз гатIунна гзаф йисар я.
СтIал Сулейманан райондани эхиримжи йисара са шумуд хуьре цIийи мискIинар эцигна. Курхуьрел цIийиз хуьруьн бинеяр ягъай чкадал 2002-йисуз цIийи мискIин эцигиз эгечIнай. Эцигунар, гьар чкадай са герек шей гъиз, саки 4 йисуз давам хьанай. Агалтна санал эцигунар тухудай мумкинвал а вахтунда авачир. И крарик юзун кутаз райондинни хуьруьн администрацийри, Х.Къурбанова, К.Адилова, П.Ибрагьимова, И.Ибрагьимова, А.Абдуселимова ва масабуру эцигунардай материалралди екез куьмекар ганай.
МискIин эцигна, тадаракламишна, ишлемишиз вахкай 2006-йисан мартдин варз хуьре еке межлисдиз элкъвенай. Республикадин Муфтиятди 2019-йисалай ина, имам яз, Исламдин диндин кьилин чирвилер къачунвай, крарин гъавурдик квай Баталов Шамиль тайинарнава. Ам аварви я. Амма Шамиль хуьруьнбурук акахьнава, гьа сифте йикъарилай ам вичин талукь везифайрив рикI гваз эгечIнава. Ам датIана жемятдин арада жезва, герек атай чкайрилай гъавурдик кутазва. Мис-кIиндиз агьалийрин атун-хъфинни авазва. Шамила мискIиндихъ хьун лазим тир шартIар патални зегьмет чIугвазва.
Эхиримжи вахтара ина хьанвай цIийивилерикай, аниз куьмекар гузвайбурукайни талгьана жедач. ИкI, мискIиндиз герек къвезвай куьсруьяр, шкафар, кьацIар къачунва, цлан еке сятни гъана куьрсарнава. Мадни, хуьруьн администрациядин кьил Гьажалиев Радикахъ галаз санал меслят хьуналди, мискIиндиз герекзавай къайи ва чими цин месэлаярни гьялнава. ЦIаяр кьунин вилик пад кьадай тадаракарни эцигнава. МискIиндин дараматдин лазим документар къайдада тунва. Куьмекчи майишат патал администрацияди чил ва кьилдин кIвал (5х9 кв.м. авай) чара авуна. Мадни меценатри — Эльбруса, Ибрагьима, Ашурбега махсус 10 куьсруь чкадал гъанва, кьур (навес) туькIуьрнава. Рустамов Рамидинан ва -Расулов Муслиман хизанри 100 къаб, тIурар, шишер, истиканар, катулар ва герек маса затIар чпин патай мискIиндиз багъишнава. Абурукай менфят къачузва. Хуь-руьнбуру 160 агъзур манат кIватIна, герек дердийриз гьазурнава. И карда тешкилатчияр тир Гьажиев Мудуна, Рагьимов Раула чешне къалурна. Шамиль кьиле аваз тешкиллудаказ кьве сеферда Рамазандин вацра ифтlардин мярекатарни тухвана. Вири крара имамдиз чи хуьруьн халкьди ва хуьруьн администрацияди меслятралди, пулунин такьатралдини куьмекар гузва.
Къуй дуьнья ислягь, виридан кIвалера берекат артух хьурай!
