Аялдиз вич кьена кIанзавайла
Аялдиз вич кьена кIанзавайла
«ЦIийи хабаррай» «Вили китдал» къугъвазвай аял кьилери гзаф кьадарралди чпи-чеб кьиникьикай сифте малуматар гайила, ида халкьдиз хъиткьинай бомбадин гужлу таъсир авунай. Диде-бубайрик къалабулух акатнай ва абуру чпин аялар соцсетра квел машгъул ятIа, гуьзчивал ийиз гатIумнай. Амма са шумуд йис алатна ва секинсузвал тIимил жез башламишна.
Анжах аял кьилериз кьиникьихъ галаз къугъунрихъ итиж амазма. Группайрин тIварар ва къайдаяр дегиш жезва, гьаниз килигна абурун тешкилатчийрал ва иштиракчийрал гуьзчивал тухун четин жезва. 2023-йисуз аялар рекьизвайбур «Телеграмдиз» куьч хьана. Чпи-чеб рекьизвайбурун кIватIалдик экечIзавайбурун яш генани жегьил хьанва – цIуд йис.
«Зи руш Настядиз кIелиз, вири хизандихъ галаз ял ягъиз, мугьманриз физ кIанзавайди тир. Амма лап са тIимил вахтунда адакай маса инсан хьана. Ада вахаз гьараюнар ийизвай, кIелунихъ итиж амачир. Гьиниз физ хьайитIани, телефон гваз жедай. За фикирзавай, им вири яшдивай я, ам чIехи жезва. Гатуз ял ягъиз фена, амма гьал дегиш хьанач. Гуьзгуьдин вилер. Са кардихъни итиж амач. Зи руш гьакI дуьшуьш яз хьайи карди къутармишна. За ара-бир адавай телефон къачузвай, анжах ада захъай са жуьре вичин «Телеграм» чуьнуьхзавай. Амма са сеферда телефондиз хабар атана. Заз ам шаклу яз акуна. Зун рушавай, адаз хабар авачиз, телефон къачуниз ва адаз вуч къариб хабарар хквезватIа, кьил акъудуниз мажбур хьана. «Зегьле ракъурдай кичIевал» - и гафар зи гьалдикай лугьун патал тIимил я. Чпи-чеб кьиникьикай виридалайни чIуру жуьрейра малуматар рахкурзавай телеграм-канал. Зи Настядин цIуд йис я… гъавурда акьазвани? ЦIуд! Чун психологдин патав фена. Руша лагьана хьи, ада вичи-вич кьиникай фикирзавай» (Татьяна).
Къенин юкъуз ихьтин кьиса ван татай хьтин, ажайибди туш. Амма диде-бубайри са къайгъуни авачиз аялриз смартфонар багъишиз, зур йисалай садра, абуру телефонриз вуч ийизватIа, ахтармишиз ва абурун лап хъсан аялрин фагьумдиз чпи-чеб кьиникьин фикирар гьинай къвезва лугьуз, мягьтел жез давамарзава. Жуван аялар гьикI хатасуз ийида? Телефондал диде-бубайрин гуьзчивилин программа эциг. Ида михьиз ваъ, амма са кьадар хьайитIани зиян гузвай каналрикай аял хуьда. Ада гаджетар ишлемишзавай вахтунал кьадар эциг. Куь хизанда гьикьван вахт соцсетра хьуниз акъудзаватIа, адахъ галаз икьрар кутIуна ва ам кIевиз вилив хуьх. Телефон гваз къакъатна чара жез аялдиз къадагъа ая. Ам гьамиша куь вилик хьурай, эгер куьн фидай чка аваз хьайитIа, адавай телефон къахчу.
