«Гададин гаф»
«Гададин гаф»
Бязибуру лугьузва хьи, «Гададин гаф» сериал – им адалатлувиликай хабар гун я. Ингье аялар куьчейрин кIеретIриз кIватI хьанва, маса чкада авай гьа гьахьтин хулиганри абурун кефи хан тийидайвал.
Вири гьа инсафсуз гатунар, кукIунар, викIегьбуру зайифбуруз югъ тагун, гьахьтин къалмакъалра жегьилар кьиникь – ибур вири «чун ахьтинбур ваъ, уьмуьр гьахьтинди» тирвиляй я.
Дуьз лагьайтIа, дикъетдивди килигайтIа, чаз аквада: и вири жегьилар сад ийизвай затI аватIани, ам вуч кIандатIани я, анжах адалатлувиликай хабар гун туш. Элкъвена виринра авайди таб, чIуру крар ва ягьсузвал я.
Сад лагьай сериядилай гатIумна кьилин кьве герой беябурчивилин кардал дустар жезва – абуру санал туьквендай парталар чуьнуьхзава. Абур гишила рекьизвачир, абуруз диде сагъар хъувун патал пул герекзавачир, абуру адалатсузвилелди масабурувай къакъуднавайди вахкузвачир.
Ваъ, гьакI чпин кефиниз кIан хьайи герексуз кар кьилиз акъудна ва дишегьлидивай туьквендин дезгедикай метягь чуьнуьхна, маса инсан бахтсуз авуна. Амма чарадан бахтсузвилел жуван бахт туькIуьриз жедач хьи.
Ингье кино туькIуьрай касди чаз къалурзава, гьикI гьа гадади скорыйдиз зенг ийизватIа ва живедал ахварал фенвай пияниска къутармишиз алахъзаватIа. Эхь, са тIимил вилик ада зайиф вичин таюнивай пул къакъудна, масад гатана, гила туьквендай чуьнуьхзава, амма адан эвезда, лагьайтIа жеда хьи, инсан кьиникьдикай къутармишна, ам муркIадив кьаз тунач, скорыйдиз эверна. Чаз лугьуз алахънава: ам хъсанди, анжах са тIимил вичиз хас тир тегьердинди я.
Амма чаз чизва хьи, чуьнуьхуна, артух яз ваз аксивал ийиз тежедай дишегьлидивай, халис итимвилин, игитвилин са затIни авач, хьайиди туш ва са чIавузни женни ийидач. ГьикI зурба са карни авачтIа, куьчедал ярх хьанвай инсандиз къарагъун патал куьмек гуна, гьатта ам пиянзаваз хьайитIани.
Ахьтин хулиганар са гьихьтин ятIани итимвилин лайихлувал авай, «гададин гаф» гвай инсанар хьиз къалуриз, гуя ам абуруз пак я, амма гьа са вахтунда абуру алчах ва гзаф нагьакьан крар ийидайла, анжах психика сагълам тушир инсанривай жеда, я тахьайтIа ахьтин инсанривай, низ чпикай ва я чпин мукьвабурукай ягьанатар ийидайла бегенмиш ятIа.
Кино туькIуьрайбурни, ам туькIуьрун патал пулар гайибурни бандитар ва я абуруз ухшар жез алахъзавайбур михьи ийиз, абуруз адалатлувилин кьетIен къанунрин кIватIал авайди хьиз къалуриз гьикьван алахъайтIани, гьакъикъи уьмуьрда абурал гьалтайла, абур виридалайни вилик чпин геройрилай ва абурун «акьалтIай намуслувилелай» элкъведа ва абурулай полициядиз арза кхьиз катда.
