Пак гьадисрай къачунвай насигьатар
Эвел газетдин 9-нумрада
3. Аллагь Таалади лугьузва: «Эй, иман гъанвайбур! Аллагьдихъай рикIин сидкьидай, Адаз муьтIуьгъ яз, Адан тариф ийиз ва Ам гьамиша рикIел алаз, кичIе хьухь. Рекьиз хьайитIа, Сад Аллагьдихъ рикIин сидкьидай инанмиш яз, Аллагь Сад я лагьана, йикь».
Эй, Адаман хва! Дугъри кар я, чирвилер, абурал амал тийиз хьайитIа, марф галачиз цаву ийизвай къукърумриз, ванериз ва язавай цIайлапанриз ухшар я; чирвилер авачиз ийизвай крар емиш тегъизвай тарциз ухшар я, вичин чирвилерин гуьгъуьна аваз фин тийизвай алим, гъал (еб) галачир чIемерукдиз ухшар я, вичин эменнидилай закат тагузвай кас рагарал кьел цазвайдаз ухшар я.
Ахмакь касдиз гузвай насигьат гьайванриз гевгьерар ва якъутар тайинаруниз ва я гуниз ухшар я, чирвилер авай, амма рикI къван хьанвай кас кьежей къванциз ухшар я – ламувили къванциз гьикI таъсир ийидачтIа, чирвилерини адаз гьакI таъсир ийидач.
Гъавурда гьатиз кIан тийизвай касдиз гузвай насигьат сурарал язавай кфилдиз ухшар я (мейитдиз кфилди гьикI таъсир ийидачтIа, гьакI гузвай насигьатдини, ам такIанвиляй, адаз таъсир ийидач).
Гьарам рекьел къазанмишнавай эменнидилай садакьа гузвай кас – вичин цварадалди парталдилай чирк михьзавайдаз ухшар я. Закат галачир капI-тIеат – мейитдиз ухшар я. Туба тийизвай, тахсир хиве кьан тийизвай алим – хандакIар ягъ тавуна эцигнавай дараматдиз ухшар я.
«Гьа икI хьайитIа, яраб абур Аллагьдин таъсирдикай, амалдарвиликай (макру) саламат яз амукьда жал? Анжах рекьелай алатнавай ва уьмуьрдикай умуд атIанвай инсанри чеб гьакI, Аллагьдин амалдарвиликай саламатдиз амукьдайбур хьиз, тухуда».
- Аллагь Таалади лугьузва: «Эй, Адаман хва! Вун Заз хуш хьун – и дуьньядин уьмуьрдиз вуна майилвал авунин тегьердилай ва рикIивай Зун кIан хьунилай аслу я.
Гьакъикъатда, са рикIе и дуьньядин мал ва Зун кIан хьун санал За гьич садрани кьабулдач.
Эй, Адаман хва! Аллагь рикIел алайди хьухь ва Зун ваз чир жеда, сив хуьх ва Зун ваз аквада. РикIин сидкьидай Заз ибадат ийиз хьухь ва Зи патав вун агакьда. РикIин михьивилелди жуван крар ая, За ваз Зун кIан хьун багъишда. Зун рикIел гъуниз жув бахш ая, Зани вун малаикрин вилик рикIел гъида.
Эй, Адаман хва! Ви рикIе, Аллагьдилай гъейри, вири ава ва Аллагьдик вуна умуд кутазвач. Бес гьикьван чIавалди вуна «Аллагь Виридалайни Винизди, ЧIехиди я» лугьуз, ваз Адахъай ваъ, масабурухъай кичIез жеда?
Эгер ваз гьакъикъат чир хьанайтIа, вуна, Аллагьдилай гъейри, са куьникайни фикирдачир, ваз, Аллагьдилай гъейри, садахъайни кичIе жедачир ва Аллагь рикIел гъиз ви мез акъваздачир. Дугъриданни, тапан пашманвал авуналди, къалпдаказ гунагьар хиве кьуналди, абур терг ийиз жедач.
Эгер ваз кесибвиле гьатунихъай гьикьван кичIезватIа, Жегьеннемдин цIухъайни гьакьван кичIе хьанайтIа, За вун гьич ви умудни квачир чкадай девлетдай ацIурдай.
Эй, Адаман хва! Эгер ваз и дуьньядин мал кIанзавай кьван, Женнет къазанмишизни кIанзавайтIа, За вун кьве дуьньядални бахтлу ийидай.
Эгер куьне, сада-сад рикIел гъизвайвал, Зунни рикIел гъиз хьанайтIа, малаикри квез йифизни юкъуз салам гудай. И дуьньядин мал квез гьикI кIан ятIа, Заз ибадат авунни гьакьван кIан хьанайтIа, За, пайгъамбарриз гьуьрмет авур кьван, квезни гьуьрмет ийидай. Куь рикIер и дуьньядин мал кIан хьунай ацIурмир, вучиз лагьайтIа адан (дуьньядин малдин) эхир мукьвал ала».
- Аллагь Таалади лугьузва: «Эй, Адаман хва! Ваз Жегьеннемда яргъал тир азабар эхдалди, тIимил кьадардин гунагьрикай сабурна акъвазун регьят я. «Гьакъикъатда, азабар адан кьилел къведа». Ви муьтIуьгъвилини сабурди ваз гьамишалугъ бахт авай яргъал тир ял ягъун ва секинвал (динжвал) гуда.
Эй, Адаман хва! Вал чан аламай кьван гагьди, За ви ризкьи масадаз гудач лагьана гаф гузвайдахъ вун инанмиш хьана кIанда. За вун негь ийидалди, за вун инкар ийидалди, дуьньядин малдивай яргъа хьухь. Дувандин юкъуз ви хъсан крар квахьдалди, шак алайдавай яргъа хьухь. АтIа дуьньядин уьмуьр рикIел хьунивди жуван рикI ацIура, вучиз лагьайтIа ваз суралай гъейри маса утагъ жедач.
Эй, Адаман хва! Низ Женнет гзаф кIан ятIа, ам хийирдин крар ийиз алахъда, Жегьеннемдихъай низ кичIе ятIа, ада вич писвилер, зулумар авуникай хуьда. Темягькарвилерикай ни вич хвейитIа, ам вини дережадив агакьда.
Эй, Муса ибн Имран! Эгер вун михьи тушиз, ви кьилел бедбахтвал атайтIа, и кардин гьакъиндай анжах жува-жуваз туьнбуьгь ая.
Эй, Муса! Хъсан крар бес тахьун – им виридалайни зурба кьиникь я.
Эй, Муса! Ни меслят гъизвачтIа, вуж алукьзавачтIа, ам пашман жеда. Ни Аллагьдин Регьим, Разивал тIалабнатIа, ада гьайиф чIугвадач».
Кьатl ама.
