Къуватлу мусурман
Къуватлу мусурман
Хасавюрт райондин Цlийи Къуруш хуьруьн имам Панагьов Азим гьажиди акьалтзавай несилдин руьгьдин ва бедендин сагъламвал патал хуьре спортзал эцигиз гатlумнава. Гьелбетда, ада и кlвалах хуьруьн жемятдихъ галаз санал ийизва. Шукур Аллагьдиз, къурушвияр халкьдихъ ва диндихъ рикl кузвай мусурманар я. За умуд кутазва хьи, а спортзал мукьвал гележегда эцигна акьалтlарда.
Къуватлу мусурмандиз Исламди гузвай къиметдикай ахъайиз и мукьвара чи Цlийи Къурушрин хуьруьз грэпплингдай ва джиу-джитсудай дуьньядин чемпион хьанвай Стlал-Сулейманан районда РД-дин Муфтиятдин диндиз эвер гунин хилен регьбер Рагьманов Шамил атанвай. Чемпионди сифте Аллагьдин ﷻ рекье шагьид хьайи Хидиров Мугьаммад рикlел хкана, адаз хийир-дуьаяр авуна ва ахпа спортдикай суьгьбет башламишна: «Аллагь Таалади Къуръанда лугьузвайвал, Къияматдин юкъуз гьар са касдивай ада вичин бедендин паяр гьи рекье ишлемишнатlа жузада. Чаз чи бедендин вилик гьахъ ава. Гьуьрметлубур, гьарам немир ва хъвамир, куьн Жегьеннемдин цlуз вегьезвай амалар ийимир! Чи беденар сагълам яз амукьун патал чун диндихъ галаз кьур тегьерда яшмиш хьун лазим я.
Мугьаммад Пайгъамбардин ﷺ девирда спортзалар авайни? Ваъ, амма а вахтунда яшамиш жезвай инсанар налугьуди гьамиша спортдал машгъул тир. Гьикl лагьайтlа, асгьабри гъуьрч ийизвай, абур кlвачи-кlвачи гзаф къекъвезвай, балкlанраллаз физвай. Чун герек кьадар къекъвен хъийизмач. Виликдай инсанри салара ва чуьллера гзаф зегьмет чlугвазвай, амма исятда абуруз гьич алай чкадилай юзаз кlамач. Гьавиляй чи беденар зайиф жезва. Гьакlни алай вахтунда инсанри кьадардилай артух незва.
Пайгъамбарди ﷺ лагьана: «Къуватлу (имандалди) мусурман зайифдалай хъсан я, ам Аллагьдиз ﷻ гзаф кlан я, амма кьведакни хийир ква». Гьакlни гьадисда лагьанва: «Куьне вад шей ишлемиша маса вад шей къведалди: жегьилвал – кьуьзуь жедалди; бедендин сагъламвал – начагъ жедалди; девлет – кесиб жедалди; азад вахт – машгъул жедалди; уьмуьр – кьиникь къведалди».
Гьаж къурмишун патал Мугьаммад Пайгъамбар ﷺ асгьабар галаз Мединадай Меккадиз фейила, ада абуруз тlавафдин арада (Кябедал элкъведайла) эрчlи къуьнер ачухун буйругъна. Гьа вахтунда Мекка бутпересрин гъиле авай ва и кардалди мусурманри чпихъ къуват авайди къалурна. Нагагь Пайгъамбар ﷺ ва асгьабар зайифдиз акунвайтlа, мумкин тир, имансузри абурал гьужум авун. Асгьабар викlегь ва зирекбур тир, амма кьадардилай артух недай кьван чи руфунар югъ-къандавай еке жезва.
Къуват хъсан затl я, гьа са вахтунда виридалайни зурба къуват – им имандин къуват я! Имандин къуват артухарун патал чна диндин чирвилер къачун ва абурал амал авун лазим я. Гьайиф хьи, алай аямда бязибуру спортсменриз алимрилай гзаф гьуьрметзава. Спортсмендин мецелай акъатай гаф гьасятда кьабулзава, ам гьакъикъат яни, тахьайтlа – ягъалмишвал, гьич ахтармишзавач.
Гьуьрметлу мусурманар, им гьамишалугъ дуьнья туш. Ша, чна чаз Аллагь Таалади аманат (хуьдай затl) яз ганвай беденрин ва гьамишалугъ эхиратдин чара ийин.
Къуй Аллагьди ﷻ чаз гьахъ гьахъ яз къалуррай ва адан гуьгъуьнаваз фидайвал къуват гурай. Гьакlни Аллагьди ﷻ чаз батlулвал батlулвал яз къалуррай ва чун адавай яргъа авурай!»
