Аллагь Тааладикай ﷻ хъсан фикир хьунин лазимвал
Квез чир хьухь, мусурманар, Аллагь Тааладикай хъсан фикир хьун – им инсанрин виликан ва гележегдин несилар акъваздай чка я. Аллагь Таалади пак гьадисда лугьузва (мана): «Зи лукIра Закай гьикI фикир ийизватIа, Зун адаз гьахьтинди я.
Къуй адаз Закай хъсан фикир хьурай». Маса риваятда лугьузва: «Къуй лукIра Закай вичиз кIандай фикир авурай». Акьуллу кас ам я хьи, ни вичин Раббидикай ﷻ ийизвай фикир гьар сеферда нефес къачудайла ва нефес акъуддайла хъсанарзаватIа.
Нагагь вуна, Аллагьди ﷻ вун и уьмуьрда телеф ийидач ва гьатта са легьзедани вун жуван ихтиярда твадач лагьана фикир ийиз хьайитIа, Халикьди ﷻ гьа гьакI ийида. Эгер вуна, Аллагьди ﷻ вуна маса инсанрин ихтиярар чIурай крар эвез хъийида ва ваз адай жаза гудач лагьана фикир ийиз хьайитIа, Ада гьа карни кьилиз акъудда. Нагагь вуна, Аллагьди ﷻ ваз иман гваз рекьидай бахт гуда лагьана фикир ийиз хьайитIа, Раббиди ﷻ ваз ам гуда. Эгер вуна, Аллагьди ﷻ вун Дувандин йикъан пис балайрикай хуьда лагьана фикир авуртIа, Халикьди ﷻ гьа гьакI ийида. Нагагь вуна, Халикьди ﷻ вавай гьисаб-суал тухудач ва са кардикай хабар кьадач лагьана фикир ийиз хьайитIа, Ада гьа карни кьилиз акъудда. Эгер вуна, Аллагьди ﷻ ви кIвачер СиратI муькъвел мягькемарда лагьана фикир ийиз хьайитIа, Ада гьакI ийида. Нагагь вуна Халикьди ﷻ Женнетдиз ракъурда лагьана фикир ийиз хьайитIа, Ада ваз гьамни багъишда.
