Къуръандин «аль-Ан`ам» сура
Къуръандин «аль-Ан`ам» сура
эвел алатай нумрайра ава
- Абуру (имансузри) лагьана: «Пагь, эгер адан (Мугьаммадан) патав (чаз аквадай) малаик эвичIнайтIа!» Гьатта Чна малаик ракъурнайтIани (абурун тIалабун кьилиз акъудна), (абурун) кар гьялнаваз жедай (абур терг авунин къарар акьалтIайди жедай), ва абуруз (гьеле) вахт амукьдачир (туба ийидай).
- Нагагь Чна адакай (пайгъамбардикай) малаик авунайтIа, ам гьикI авуртIани итим яз жедай (инсандин къаматда аваз, гьикI хьи инсандиз малаик адан гьакъикъи суьретда аваз аквадай алакьун авач) ва (гьа идалди) абур (гьакIани) гьавурда акьан тийизвай затIар гьакI гъавурда авачиз амукьдай (ва абуру гьикI авуртIани лугьудай хьи, ам гьа чеб хьтин инсан я).
- Вал къведалдини (я Мугьаммад) пайгъамбаррал хъуьруьнар ийизвай, амма абурал хъуьруьнар ийизвайбурал, абур квел хъуьрезватIа, ам агакьзавай (чпиз жеда лагьана гаф ганвай жаза).
- Лагь (имансузриз): «Къекъуьгъ чилел ва килиг, (пайгъамбарар) тапархъанар яз гьисабзавайбурун (инсанрин) эхир гьихьтинди тиртIа».
- Хабар яхъ (абурувай гьакIни): «Цавара авай ва чилел алай вири затIар нинбур я?» (Ва) Жаваб це: «Аллагьдинбур! Ада Вичиз регьим хкяна (лукIарин патахъай, гьавиляй Ада кафирриз жаза гуз тади ийизвач, ва эгер абуру туба авуртIа, абурулай гъил къачуда). Ада куьн гьикI авуртIани Дувандин юкъуз санал кIватIда – а карда шак авач! Чпи-чпиз зарар гайибур (пайгъамбарар кьабул тавуна) са чIавузни инанмиш жедач».
- Аданбур (Аллагь Тааладин) я вири, юкъузни, йифизни авайбур. Ам – Ван Къвезвайди, Чизвайди я.
- Лагь (я Мугьаммад): «Аллагьдилай, цаварин ва чилин Халикьдилай гъейри, за арха яз са маса кас къачудани кьван?! Ада тIуьн гузва (вири махлукьатриз), Вич тIуьнихъ (ва маса халкьнавай са шейинихъни) муьгьтеж тушиз». Лагь (гьакIни): «Заз (и умматдай) муьтIуьгъ жедай сад лагьайди хьун эмирнава». (Ва заз эмирнава:) «Са чIавузни бутперес жемир!»
- Лагь: «Эгер, гьакъикъатда, за зи Раббидиз яб тагайтIа, заз ЧIехи Юкъуз зал (гзаф пис) жаза агакьиз кичIезва».
- А (Дувандин) Юкъуз вуж хкатайтIа (жазадикай), ам Ада (Аллагь Таалади) регьимдик кутуна. Им – ачух тир агалкьун я.
- Эгер Аллагьдиз ваз зарар гуз кIан хьайитIа (руьгьдин ва я дуланажагъдин), вун адакай садани къутармишдач, Адалай гъейри. Нагагь Ада ваз хъсанвал кхьейтIа, Адалай вири алакьда хьи.
- Ам – Вичин лукIар МуьтIуьгъарзавайди я. Ам – Арифдарди (Вичин къарарра), Хабардарди (абурун вири крарикай, ниятрикай ва мурадрикай) я. (Бязи таржумачийри и аятдин сифте кьил икI таржума авуна: «Ам – Гъалибвал Къачудайди я ва Вичин лукIарин винел ала». Ихьтин таржума татугайди я, гьикI хьи кIелзавайдаз ягъалмишвилин таъсир авун мумкин я, гуя Аллагь Таала бедендалди Вичин лукIарин винел ала. Им акьулдиз ва Шариатдиз акси я. Имам аль-КъуртIубиди кхьизва: «Аллагь Вичин лукIарин винел ала» гафарин мана – им Адан Къудратдалди ва гуьзчивилелди хкаж хьун я, яни (лукIар) Адан гуьзчивилик ква, амма им алай чка къалурзавай пад туш»).
- Хабар яхъ (я Мугьаммад, бутпересривай): «Вуж я кьилин шагьид?» Жаваб це (абуруз жува): «Аллагь – зи патахъай квез шагьид я (зун – гьакъикъи пайгъамбар тирдан патахъай). Заз и Къуръан вагьйу авунва, адалди за квез ва ам агакьдайбуруз виридаз хабар гудайвал (имансузвилин ва гунагьрин хатавиликай). Яраб куьн дугъриданни инанмиш я жал, Аллагьдихъ галаз санал маса худаярни авайдахъ?!» Лагь (абуруз): «За ам тестикьарзавач!» (Ва мад) Лагь (абуруз): «Ам (Аллагь Таала) – Тек Са Рабби я. Гьакъикъатда, куьне (Адаз) барабар ийизвайбурухъ галаз зи са рафтарвални авач».
- Чна Ктаб гайибуруз (чувудрин ва хашпарайрин алимриз) ам (Аллагьдин Расул) чпин рухваяр хьиз (хъсандиз) чизва (гьикI хьи адакай Тавратда ва Инжилда лагьанвай). Чпи-чпиз зиян гайибур са чIавузни инанмиш жедач.
- Аллагьдал буьгьтен вегьезвайдалай ва я Адан аятар (Къуръандай тир) кьабул тийизвайдалай гзаф адалатсуз вуж жеда кьван?! Гьакъикъатда, пис ксариз агалкьунар жедач!
- Гьа (Дувандин) юкъуз Чна абур вири кIватIда, ахпа бутпересривай хабар кьада: «Гьинава (куь бутар, куьне) шерикар (кутазвай Аллагьдик), абурукай (абур авайдакай) куьне таб ийиз лугьузвай?»
- А вахтунда абуруз маса ахтармишун жедач (чеб гьахъарун патал), (тапан) гафарилай гъейри: «Чна Аллагьдал, чи Раббидал кьин кьазва, чун бутпересар тушир!»
- Килиг, гьикI абуру чпикай таб ийизватIа (бутпересар туш лугьуз инандирмишариз)! Амма абур вири чпи туькIуьрай (тапан худайри) гадарда.
- Абурун (бутпересрин) арадани ваз яб гузвайбур ава (вуна Къуръан кIелдайла). Амма Чна абурун рикIерал шаршавар вегьена, абур адан гъавурда акьан тийидайвал, ва Чна абурун япар биши авуна. Гьихьтин аламат абуруз акуртIани, абур адахъ агъадач. ГьакI хьайила, ви патав гьуьжет ийиз атайла, имансузри лугьузва: «Им (Къуръан) – гьакIан къадим халкьарин махар я». (Са сеферда бутпересриз Къуръан кIелзавай ван атана ва абуру сада-садавай хабар кьаз хьана: «Мугьаммада вуч лугьузва?» Сада лагьана: «Зун гъавурда акьазвач, ада вуч лугьузватIа, амма за фикирзава хьи, ада къадим халкьарин махар ахъайзава». А чIавуз Аллагь Таалади и аят ракъурна).
- Абуру (бутпересри) манийвалзава (инсанар Пайгъамбардин ﷺ гуьгъуьна аваз финиз) ва чебни адавай къерех жезва. Идалди абуру анжах чеб телефзава, амма гьатта аннамишзавач (а кар).
- Нагагь ваз акунайтIа (бутпересар), абур Жегьеннемдин вилик акъвазайла! Абуру лугьуда: «Агь, эгер чун элкъуьрна рахкурнайтIа (дуьньядин уьмуьрдиз)! Чна чи Раббидин аламатар кьулухъди элкъуьрдачир ва чна иман гъидай!»
- Абуру виликдай чуьнуьхзавай кар (чеб бутпересар туш лугьуз) ашкара хьана (абурун имансузвал ва писвал). Эгер абур (Жегьеннем акурбур) элкъуьрна рахкурнайтIа (дуьньядин уьмуьрдиз), абур гьикI авуртIани чпиз къадагъа авунвай крарихъ (имансузвилихъ ва гунагьрихъ) элкъвена хъфидай. Гьакъикъатда, абур – тапархъанар я (вири крара, гьа жергедай яз, чеб инанмиш жеда лагьана гузвай гафунани, эгер абур дуьньядин уьмуьрдиз элкъуьрна рахкурайтIа).
- Абуру лугьузвай хьи: «Маса уьмуьр авач, и чи дуьньядин уьмуьрдилай гъейри. Чал чан хкидач (кьейидалай кьулухъ)».
- Нагагь ваз акунайтIа (бутпересар), абур чпин Раббидин вилик акъвазайла! Ада (Аллагь Таалади) хабар кьада (абурувай): «Им (Дувандин юкъуз квел чан хкун) гьакъикъат тушни мегер?!» Абуру жаваб гуда: «Эхь (им гьакъикъат я)! Чи Раббидал кьин кьазва!» Ада лугьуда: «Куь имансузвиляй жаза дадмиша!»
- ГьакI (чан хкун ва) Аллагьдихъ галаз гуьруьшмиш хьун инкарзавайбуруз зарар хьана. Абур патал бейхабардиз (Дувандин) Сят алукьайла, абуру гьарайда: «Чаз бедбахтвал хьана чна ахъаяйдай (Аллагьдин эмирар тамамар тийиз) ана (дуьньядин уьмуьрда)!» Абуру (чпин гунагьрин) пар далудаллаз тухуда. Гьикьван писди я абурун пар!
- Дуьньядин уьмуьр – им анжах къугъун ва машгъулат я, гьамишалугъ кIвал (Женнет – куьтягь тежедай лезетар авай чка) лагьайтIа, хъсан я (дуьньядин уьмуьрдилай) Аллагьдихъай кичIебуруз. Яраб куьн гъавурда акьазвач жал (идан)?!
- Чаз чизва хьи, вун (я Мугьаммад) абурун гафари (Ислам дуьз туширдан патахъай) сефиларзава. Абуру вун тапархъан яз гьисабзавач (рикIяй абуруз чизва, вун гьакъикъи Пайгъамбар тирди), амма а пис ксари Аллагьдин аятар инкар ийизва (чпин терсвиляй)! (ГьакI, Абу Жагьла лугьудай: «Мугьаммад, чна вун тапархъан яз гьисабзавач, чаз вун дуьз инсан хьиз чизва, амма чна вуна гъанвайди таб яз гьисабзава» (Абу Хаян)).
- Вал къведалдини (инсанри) пайгъамбарар кьабулзавачир. Амма абуру чеб кьабул тавун ва гузвай азиятар эхзавай, та абуруз Чи куьмек къведалди. Са шейинини Аллагьди гузвай гаф дегишардач (пайгъамбарриз куьмек ва гъалибвал гуда лагьай). Вал пайгъамбаррикай бязи хабарар гьеле агакьнава (ви рикI секинарна кIанзавай).
- Эгер абуру (Ислам) инкар авуни (ва вун саймиш тавуни) ваз азият гуз хьайитIа, (гьатта) ваз чиляй фидай ара ва я цавуз хкаж жедай гурар жагъайтIани ва абуруз (аламатдин) лишан гъайитIани, абур гьикI авуртIани инанмиш жедач. Нагагь Аллагьдиз кIан хьанайтIа, абур вири дуьз рекьел эцигдай (ва абуру иман гъидай). И кар чин тийизвайдакай жемир.
- Гьакъикъатда, (ви эвер гуниз) анжах ван къвезвайбуру (ва насигьатар кьабулзавайбуру) жаваб гуда. Кьенвайбурал Аллагьди чан хкида ва абур Адан патав хкведа.
- Абуру (къурайшитрикай тир кафиррин чIехибуру, чпин имансузвал гьахъарун патал) лугьузва: «Эгер адаз вичин Раббидин патай (чаз гьеле акурбурулай гъейри) лишан (аламат) ракъурнайтIа!» Жаваб це (абуруз, я Мугьаммад): «Аллагьдивай, шаксуз, лишан (аламат) ракъуриз жезва». Амма абурун чIехи паюниз чизвач (гьар цIийи аламат абуруз телеф хьунин хабар гудай лишан хьун мумкин тир).
- Вири чилелай къекъвезвайбур ва я кьве луван куьмекдалди лув гузвай къушар, - абур вири кIапIалар я, куьн хьтин (чан алай затIар, чпин ризкьи ва уьмуьрдин вахт виликамаз кхьенвай). Чна (Хуьзвай) Ктабда са затIни ахъайнавач. Ахпа абурал (вири а кIапIалрал ва умматрал) чан хкида ва чпин Раббидин вилик кIватIда (ва а чIавуз Ада гьар садан крариз килигайвал эвез хъийида).
- Чи аламатар инкар ийизвайбур – бишибур ва лалбур я ва (авамвилин, жувавай-жув квахьайвилин ва имансузвилин) мичIивиле ава (ина-ана къекъвез гьатнава). Аллагьди Вичиз кIан хьайиди дуьз рекьелай алудда ва Вичиз кIан хьайиди дуьз рекьел эцигда.
КьатI ама.
