Сура аль-А`раф (Манийвилер)
эвел алатай нумрада
35. Эй Адаман несилар! Эгер куь патав квекай (куь халкьдикай) тир пайгъамбарар атайтIа, квез Зи аятар ахъайиз, игьтиятвал авур (ширкдикай ва абуруз муьтIуьгъ тахьуникай) ва дуьзар хъувур (вичин крар) гьар са касдиз кичIевал жедач (масабуруз кичIе жедай Юкъуз) ва пашман жедач (ахъаяй мумкинвилерай).
- За ракъурай лишанар кьабул тавурбур ва абурун патахъай такабур хьайибур, абур – жегьеннемэгьлияр я. Абур ана гьамишалугъ яз амукьда.
- 37. Аллагьдал буьгьтенар вегьезвайдалай ва (Адакай) тапарар ийизвайдалай, я тахьайтIа Адан аятар таб яз гьисабзавайдалай вуж адалатсуз я кьван? Абуруз пай гуда (уьмуьрдин вахт ва чилин няметар), абуруз (Хуьзвай) Ктабда тайин авунвай. Абурун патав (эхирки) Чи илчияр (малаикар) атайла, абур кьин патал, абурувай хабар кьада (рекьизвай гьар са бутпересдивай туьгьмет авуналди): «Аллагьдин паталай куьне ибадат ийизвайбур гьинава (вучиз абуру квез куьмек гузвач)?» Абуру (бутпересри) жаваб гуда: «Абуру чун гадарна (ва абур чаз виридалайни четин вахтунда чи патав аквазвач)!» Абуру чпи шагьидвал ийида (рекьидайла) чеб имансузар тирди.
- (Дувандин юкъуз Аллагь Таалади) Лугьуда: «Алад Жегьеннемдиз квелай вилик кьейи инсанрин ва чинеррин жемятрихъ галаз санал!» Гьар сеферда, гьаниз (Жегьеннемдиз) гьахьдайла, (имансузрин) са жемятди маса (чпин ягъалмишвилера тахсирлу яз гьисабзавай) жемят лянетламишда. Абур ана санал кIватIайла, абурукай эхиримжибуру (терефдарри) сифтебурукай (кьиле авайбурукай) лугьуда: «Рабби! Им гьабур я чун ягъалмишвиле тунвайди. Абуруз Жегьеннемда азаб кьве сеферда артухара!» (Аллагь Таалади) Жаваб гуда: «Виридаз кьве къат артух эвез хъийида (кьиле авайбурузни, абурун терефдарризни), амма квез ам чизвач (имансузрин гьар са дестедал вуч агакьдатIа)».
- А вахтунда (Аллагьдин и гафар ван хьайила) абурукай сифтебуру (кьиле авайбуру) эхиримжибуруз (терефдарриз) лугьуда: «Куьн чалай хъсан тушир (чун вири жаза гуна барабар я, ам чна масабур ягъалмишвиле туналди ва гъавурдик квачиз масабурулай чешне къачуналди къазанмишна). ГьакI хьайила дадмиша жаза куьне (квез кIан хьана чи гуьгъуьна аваз фена) къазанмишай (писвиляй)».
- Гьакъикъатда, Чи лишанар таб яз гьисабайбуруз ва абурун патахъай такабур хьайибуруз, цаварин къапуяр ахъа жедач (абурун дуьаяр ва крар ва гьакI кьейидалай кьулухъ абурун руьгьерни цаварал хкаждач). Абур Женнетдиз фидач, та деве рапунин хъуькъуьндай фидалди (им лагьайтIа са чIавузни жедач). И тегьерда Чна (имансуз) тахсиркарриз эвез хъийизва (азаб гудай жазадалди).
- Абуруз Жегьеннемда къаткидай чкаяр гьазурнава, абурун винел лагьайтIа – (цIун) винел вегьедайбур (одеялар) жеда. ГьакI Чна пис ксариз эвез хъийизва.
- Хъсан крар авур иман гъанвайбур – Чна лагьайтIа, инсандин хиве адан мумкинвилерилай артух затIар твазвач – абур Женнетэгьлияр я. Абур ана гьамишалугъ амукьда.
- Чна абурун хурай ажугъ акъудда (ва абурун рикIера кIанивилелай ва рикIин михьивилелай гъейри са затIни амукьдач, вучиз лагьайтIа Женнет гьялна кIанзавай еке месэлайрин чка туш, чпин себеб такIанвал ва ажугъвал тир), ва абурун (дворецрин ва тарарин) кIаникай (Женнетдин) вацIар авахьиз фида. Абуру (иман гъанвайбуру) лугьуда (Женнетдиз гьахьайла): «Вири шукур хьуй Аллагьдиз, чун и хъсан рекьел эцигай (чаз иман гана, ам чун и хушбахтвилин кIвализ акъатунин себеб хьайи)! Чун гьакъикъатдал жедачир, нагьагь чун Аллагьди дуьз рекьел эциг тавунайтIа. Гьакъикъатда, чи Раббидин пайгъамбарар къвезвай (чи патав) гьакъикъат гваз (ва адан гъавурда тваз)». Абуруз хабар гуда: «Ингье Женнет, куьне (дуьньядин уьмуьрда) авур (хъсан) крарай квез ганвай».
- Женнетдин агьалийри Жегьеннемдин агьалийриз лугьуда: «Чаз якъин хьана хьи, чи Раббиди чаз гаф гайи вири крар (суваб яз) – гьакъикъат я. Квез якъин хьанани, Раббиди квез гаф гайи вири крар гьакъикъат тирди?» Абуру жаваб гана: «Эхь (чаз якъин хьана чаз гаф гайи жаза гьакъикъат тирди)». А чIавуз хабар гудайда (малаикди) абурун арада малумарда (а тегьерда хьи, ам виридаз ван къведайвал, Женнетдин агьалийризни, Жегьеннемдин агьалийризни): «Аллагьдин лянет хьурай пис ксарал –
- масабур Аллагьдин рекьелай (Адан гьакъикъи диндилай) алудай, ам (дуьз рехъ) чIурувилихъди дегишариз алахъай, ва гьамишалугъ уьмуьрдихъ инанмиш тахьайбурал».
- Абурун (Женнетдин ва Жегьеннемдин агьалийрин) арада манийвал жеда. Паруйрал (Женнетдин цлал) – инсанар жеда (иман гъанвайбур, Женнетдиз фин патал чпин хъсан крар бес тахьанвайбур ва а цлал абур Аллагьдин къарардал вил алаз акъвазда). Абуруз (кьве дестедикай) гьар сад чир жеда абурун лишанралди (экуь чинралди Женнетдин агьалияр ва чIулав чинралди Жегьеннемдин агьалияр). Абуру Женнетдин агьалийриз лугьуда: «Ассаламу алайкум!» Абур гьелелиг аниз (Женнетдиз) фидач, аниз физ кIанзаватIани.
- Абуруз (хатадай) Жегьеннемдин агьалияр акурла (абурун чIулав чинар ва абурун азабар акурла), абуру лугьуда (Аллагьдивай чеб хуьн тIалабна): «Рабби! Чун (имансуз ва чеб-чпихъ галаз) адалатсуз инсанрихъ галаз санал (цIа) твамир!»
- Паруйрал алай инсанри, чпин лишанралди (чIулав чинралди, вили вилералди ва эйбежер винел патан акунралди) чир жезвайбурухъ элкъвена (абуруз) лугьуда: «Куьне кIватIай вири шейэри (девлет ва гьукум) ва куьне такабурвал авур (куьн амайбурулай вине кьаз) вири шейэри квез куьмек ганач (жазадикай къутармишнач).
- Абур (куьне абурун кесибвиляй алчахбур яз гьисабзавайбур) тушни кьван, Аллагьди са чIавузни абуруз регьим ийидач (ва а инсанар Женнетдиз тухудач) лагьана, абурун патахъай куьне кьин кьурбур?» (Парудал алай ва Женнетдиз финал вил алаз акъвазнавайбуруз лугьуда:) «Алад Женнетдиз! Квез кичIевал вуч ятIа чир жедач ва куьн пашман жедач».
- Жегьеннемдин агьалийри Женнетдин агьалийриз лугьуда: «Чал яд ва я Аллагьди квез ганвай вуч аватIа (хъвадай затIарикай) илич». Абуру лугьуда: «Гьакъикъатда, Аллагьди абур (Женнетдин тIуьн ва хъвадай затIар) имансузриз,
- чпин (гьакъикъи) дин (чеб табий хьана кIанзавай) машгъулатдиз ва къугъуниз элкъуьрай, ва дуьньядин уьмуьрдал алдатмиш хьайи, къадагъа авунва». Къе Чна абур регьим авачиз тада (гьамишалугъ яз Жегьеннемда), гьикI абуру и (чIехи) юкъуз гуьруьшмиш жедайди рикIелай алуднатIа ва Чи лишанар кьабулначтIа.
- Чна абуруз Ктаб гъана, чирвилел бинеламиш яз гъавурда тур – иман гъанвай инсанриз рехъ къалурдайди яз ва регьим яз.
- Яраб (имансузри) адан (Къуръандин) гаф гун (ва кичIеяр гун) тамамарунилай гъейри маса затI гуьзлемишзава жал? Абур кьиле фейи юкъуз виликдай ам рикIелай алатайбуру (Къуръан кьабул тавурбуру) лугьуда: «Чи Раббидин пайгъамбарри дуьз лугьузвай. Амма чи тереф хуьз экъечIдайбур чаз жагъида жал? Я тахьайтIа, белки, чун элкъвена рахкурдатIа (дуьньядал), чна виликдай авур крар тийидайвал (чна гзаф хъсан крар ийидайвал)?» Абуру чпи-чпиз зарар гана (чпин уьмуьр имансузвиле аваз тухвана) ва абуру чпиз жагъурайбуру (бутри, абуру чпин тереф хуьда лагьана гьисабай) абур гадарна.
- Гьакъикъатда, куь Рабби – Аллагь я, Ада цавар ва чил ругуд (чилин) юкъуз яратмишна ва хкаж хьана (Адан Гьакъикъатдин чIехивилиз кутугай хкаж хьуналди, санлай санал юзун авачиз ва чкада (пространствода) чка кьун тавуна). (Аллагьдикай ﷻ лугьузвай вири гафарин, чпин гафба-гаф манади беден авайди къалурзавай, гъавурда икI акьун лазим я: абур атайвал кьабулун ва абурухъ инанмиш хьун, ва беден авайди къалурзавай ва махлукьатрихъ галаз авай маса ухшарвал инкар ийиз). Ада йифелди югъ кIевзава, геж тавуна адан гуьгъуьниз физвай. Рагъ, варз ва гъетер – абур вири Адан ихтиярдиз муьтIуьгъ я. Шаксуз, Ада яратмишзава ва эмирзава (вуч кIан хьайитIани). Вине ава Аллагь (ва гьар са нукьсандикай кьадар авачир кьван яргъа я), алемрин Рабби!
- ТIалаб куь Раббидивай (дуьайралди) муьтIуьгъ яз ва чинеба (жуван рикIяй). Гьакъикъатда, адаз сергьятар чIурзавайбур кIанзавайди туш.
- Чилел кимивал (имансузвал ва писвал) чукIурмир, ам къайдадиз гъайидалай кьулухъ. Адавай тIалаб (дуьаяр ийиз) кичIе яз (куь крар абурук нукьсанар хьуниз килигна кьабулдач лагьана) ва умуд аваз (Ада Вичин регьимдалди абур кьабулда лагьана). Гьакъикъатда, Аллагьдин регьим (ва дуьайриз жаваб гун) хъсан инсанриз мукьва я.
- Ам – гарар Вичин регьимдин (марфадин) хабарар гудайбур яз Ракъурзавайди я. Абуру (гарари) залан цифер (цяй ацIанвай) гъайила, Чна абур (а цифер) кьенвай (кьурагьвиляй) чилел ракъурзава ва яд агъуз вегьезва, адалди (чиляй) жуьреба-жуьре емишар акъудзава. (ГьикI Чна кьенвай чилел чан гъизватIа) ГьакI Чна кьенвайбурал чан хкизва (абур чпин сурарай акъудна). (Чна куьн и аятрин гъавурда твазва) Куьне насигьат кьабулдайвал (ва гьакъикъатда чан хкидайдахъ инанмиш жедайвал).
- Хъсан чили Раббидин ихтиярдалди (хъсандиз ва булдиз) набататар гуда, амма пис чилел абур четиндиз экъечIда (тIимил ва хийир авачиз). (И аятда Аллагь Таалади иман гъанвай инсан гзаф бегьер гудай, яд кужумдай ва жуьреба-жуьре набататар экъечIдай накьвадихъ гекъигна. Авазва пис ва гзаф бегьер гун тийир чил, гьикьван марф къвайитIани ада я набататар, я емишар гудач. Имансузни гьахьтинди я, ада насигьатриз ва пайгъамбаррин эвер гуниз яб гузвач). ГьакI Чна (иман гъанвай, Аллагьдин ва адан регьимдин) хъсанвал чир жедай инсанар лишанрин гъавурда твазва.
КьатI ама.
