Сура ат-Тауба (гъил къачун тlалабун)
Эвел алатай нумрайра
- Вуна хабар кьуртlа (абурун ягьанатрикай), абуру шаксуз жаваб гуда: «Чна гьакl ихтилатар ва къугъунар ийизвай (вахт акъудун патал ва рикlивай гьич рахазвачир)». Вуна лагь (абуруз): «Куьне Аллагьдикай, Адан аятрикай ва Пайгъамбардикай ﷺ ягьанатар ийизвани?
- Куьне куьн гьахълу ийиз алахъмир! Куьн кафирар хьана иман гъайидалай кьулухъ» (и аятдай аквазвайвал, инсанди гьатта зарафат яз Исламдикай ягьанатар ийиз хьайитlа, ам диндай акъатзава ва кафир (муртад) жезва). Квекай бязибурулай Чна гъил къачуда (рикlин сидкьидай туба авуна михьи Исламдиз хтай, мисал яз, Жагьш ибн Хумейралай), бязибур Чна жазаламишда, вучиз лагьайтlа абурукай чlехи гунагькарар хьана.
- Мунафикь (кьве чин алай) итимар ва дишегьлияр вири садбур муькуьбуруз ухшар я (абуру чеб сад хьиз тухузва). Абуру чlуру кlвалахар (имансузвал ва гунагьар) авуниз эвер гузва ва хъсанбур (иман гъун ва ибадат авун) къадагъа ийизва. Абуру шкьакьвал ийизва (Аллагьдин рекье такьатар харж авун герек хьайила). Аллагь абурун рикlелай алатна (абур Адаз муьтlуьгъ туш) ва Ада абур Вичин регьимдикай хкудна. Гьакъикъатда, мунафикьар гунагькарар я!
- Мунафикь итимар, дишегьлияр ва гьакlни кафирар Жегьеннемдин цlа куда лагьана Аллагьди гаф гана, абур ана гьамишалугъ амукьда. Абуруз ам бес я (жаза яз). Аллагьди абур лянетламишна (Вичин регьимдикай магьрум авуналди) ва абуруз гьамишалугъ азабар жеда.
- (Куьн, мунафикьар) Квелай вилик яшамиш хьайибуруз тешпигь я. Абур квелай къуватлу тир ва абуруз квелай гзаф девлетарни веледар авай. Ва абуру (дуьньядин) уьмуьрдикай лезет хкудзавай. Куьнени уьмуьрдикай лезет хкуд, гьикl квелай вилик хьайибуру хкуднайтlа. Куьне (эй, мунафикьар, кутуг тавур) гафар гзаф лагьана, абуруни гьакl авурди тир. Абурун кlвалахар хийирсузбур хьана и дуьньяда ва гьакlни гьамишалугъ уьмуьрда (эхиратда). Абурун крар зарар гудайбур хьана. Бес абурал виликдай яшамиш хьайибурун кьисаяр агакьначни: Нуьгь пайгъамбардин халкьдин, адитрин (Гьуд пайгъамбардин халкьдин), самудрин (Салигь пайгъамбардин халкьдин), Ибрагьиман халкьдин, Мадьян (шегьердин) эгьлийрин (Шуайб пайгъамбардин халкьдин) ва кlан пад цавал авурбурун (Лутl пайгъамбардин халкьдин)? Абурун кьилив (Аллагьдин) илчияр атана делилар гваз (пайгъамбарри аламатар къалурна, амма а халкьар инанмиш хьанач, гьавиляй абур Халикьди терг авуна). Аллагь абурухъ галаз адалатсуз хьанач (терг авуналди) – абуру чпи-чпиз зарар гана (имансузвал ва гунагьар хкягъуналди).
- Иман гъанвай итимар ва дишегьлияр садбур муькуьбурун куьмекчияр я. Абуру (садбуру муькуьбуруз) хъсан кlвалахар авуниз эвер гузва ва писбур къадагъа ийизва, абуру кпlар (кутугай тегьерда) тамамарзава, закат гузва, абур Аллагьдиз ва Адан Илчидиз ﷺ муьтlуьгъ я (и краралди ва рикlин сидкьидай иман гъуналди абур мунафикьрилай тафаватлу я). Ва Аллагьди абуруз регьим ийида. Гьакъикъатда, Аллагь Къудратлу ва Арифдарди я.
- Аллагьди иман гъанвай итимризни дишегьлийриз Адндин (Женнетдин) багълар гуда лагьана гаф гана, абурун (багъларин) кlаникай вацlар физва (Абу Дардади агакьарнавай Пайгъамбардин ﷺ гьадисда лагьанва: «Адн – Женнетда авай кьетlен чка я. Ам гьич саданни вилиз акунач ва ана авай няметар са инсандинни гьич фикирдизни атанач. Ана анжах пайгъамбарар, хъсан (вали) инсанар ва шагьидар жеда. Аллагь Таалади адаз (Адн Женнетдиз) лугьуда: «Ви багълариз гьахьайбур шадара» (Тlабари)). Абур ана гьамишалугъ амукьда. Ана (Адндин багълара) гуьзел кlвалер ава. Амма Аллагьдин разивал адалай вине я (хъсан инсанриз Аллагьди Женнетдин шад хабар гузва ва гьа са вахтунда Ада Вич а ксарилай рази тирди хабар гузва, гьа и разивал, дугъриданни, виридалайни зурба нямет ва хъсанвал я. Женнет – Аллагь чпелай разибурун кlвал я. Женнетдиз гъизвай крари инсан Аллагьдин разивилел гъизва, Женнетни Аллагьдин разивал сад-садахъ галаз сихдиз алакъалу я). Гьа им виридалайни зурба агалкьун я.
- Эй, Пайгъамбар! Женг чlугу кафиррихъ ва мунафикьрихъ галаз, ва чин къалурмир абуруз (кlевивал ая жигьадда). Абур яшамиш жедай чка Жегьеннем я. Гьикьван пис чка я ам!
- (Мунафикьри) Кьин кьазва Аллагьдал (вакай, Мугьаммад) чпи гьич са шейни (пис гафар) лагьай туш лугьуз. Амма абуру кафирвилин (динсуз) гафар лагьана ва абурукай кафирар хьана, Ислам кьабулайдалай кьулухъ (абур диндай акъатна). Ва абуруз ийиз кlан хьана (са чlуру кlвалах), амма (абурун къаст) кьилиз акъатнач (Мугьаммад Пайгъамбар ﷺ Табук гъазаватдай хтай чlавуз цlикьвед мунафикьдиз адал гьужум ийиз кlан хьана. Амма Аммар ибн Ясира абурукай сад яна ва амайбур кьулухъ кат хъувуна). Абуруз квелай кьисас вахчуз кlанзава, вучиз лагьайтlа Аллагьди ва Адан Расулди куьн Вичин жумартвилелди девлетлу авуна. Эгер абуру рикlин сидкьидай гъил къачун тlалабайтlа (туба-астагъфир авуртlа чпин мунафикьвиликай ва вахъ инанмиш хьайитlа (вун кьабулайтlа)), а кар абур чеб патал хъсан жеда. Эгер инанмиш тахьайтlа, Аллагьди абуруз пис тlардай азабар гуда и дуьньядани эхиратда (Жегьеннемда). Авач (жедач) абуруз чилел къаюм ва я куьмекчи!
- Абурукай (мунафикьрикай) сада икl лагьана: «Ада (Аллагьди) чаз Вичин жумартвиликай пай (няметар) гайитlа, чна (шаксуз) садакьаяр гуда ва чун салигь (хъсан) инсанар жеда (са сеферда Саляб ибн Хатама Пайгъамбардивай ﷺ Аллагьдиз ﷻ дуьа авун тlалабна. Адаз вичин эменни артух хьана кlанзавай ва нагагь гьакl хьайитlа, ада вич низ буржлу ятlа, виридав буржар вахкуда лагьана, гаф гана. Дуьа авуна ва ам девлетлу хьана, амма Саляба закат ганач, алава яз ам кпlар ийиз мискlиндизни хтанач («Жаляляйн»)).
- Амма Ада абуруз Вичин жумартвиликай пай гайила, абур мутlлакь хьана ва Аллагьдиз муьтlуьгъ хьунихъай элкъвена (ачухдиз такlанвал къалуруналди).
- Ада абур жазаламишна рикlера тунвай мунафикьвилелди (давам жедай) абур Адахъ галаз гуьруьш жедай (Дувандин) йикъалди, вучиз лагьайтlа абуру чпи Аллагьдиз гайи гаф чlурна ва (чеб муъминар я лугьуз) тапарариз хьана (вахтар фейила Саляб закат гваз Пайгъамбардин ﷺ кьилив атана, амма ада лагьана: «Аллагьди заз вавай ам кьабулун къадагъа авунва». И арада Саляба вичин кьилел руг вегьез хьана. Гуьгъуьнлай ада закат Абу Бакр, Умар ва Усман асгьабрин кьилив тухвана, абурукай халифар хьайи чlавуз, амма абурукай гьич садани ам кьабулнач. Гьакl Саляб кечмишни хьана).
- Бес абуруз (мунафикьриз) чизвачирни Аллагьдиз чпин вири сирерикай ва чинебан рахунрикай хабар авайди ва Аллагьдиз, гьакъикъатда, вири сирер чизвайди?
- Абуру туьгьметар ийизва садакьаяр пайзавай ва четинвилелди чпиз такьатар жагъурзавай, амма гьакl ятlани абур садакьадиз гузвай инсанриз. Абуру (мунафикьри) абурукай (садакьаяр гузвайбурукай) ягьанатар ийизва, гьаниз килигна Аллагьди абур (мунафикьар) жазаламишда, абуруз пис азабар гуда.
- Вуна (Мугьаммад) абурулай гъил къачун тlалабайтlани, тlалаб тавуртlани, гьикl хьайитlани Аллагьди абурулай гъил къачудач, гьатта вуна пудкъанни цlуд сеферда тlалабайтlани. Вучиз лагьайтlа абур Аллагьдихъ ва Адан Расулдихъ инанмиш хьанач. Ва Аллагьди гунагькарар дуьз рекьел гъизвайди туш.
- Кlвале амукьайбуру (Табук гъазаватдиз фин тавуна) шадвал ийизвай чеб Аллагьдин Расулдихъ галаз санал фенач лугьуз. Абуруз чпин чанар ва эменни Аллагьдин рекье гуз кlанзавачир. Абуру лугьузвай (садбуру муькуьбуруз): «Ихьтин зегьем (пис чими) вахтунда жигьаддиз фимир». Вуна лагь (абуруз): «Жегьеннемдин цlай генани гужлуди я!» Эгер абур и кардин гъавурда акьазвайтlа… (абур кlвалера амукьдачир)!»
- Къуй абур са тlимил хъуьруьрай (шадвал авурай и дуьньяда) ва гзаф шехьрай (эхиратда) абуру авур кlвалахрай жаза яз!
- Аллагьди вун хкайтlа (Табукдай) абурукай (Мединада амукьай мунафикьрикай) бязибурун кьилив ва абуру вавай чпиз (вахъ галаз санал маса) гъазаватдиз экъечlдай ихтияр гун тlалабайтlа, вуна лагь (абуруз): «Куьн гьич садрани захъ галаз санал жигьаддиз фидач ва куьне захъ галаз санал душмандихъ галаз дявени ийидач. Куьн сад лагьай сеферда ацукьиз (кlвалера) рази хьана. Гьакl хьайила (гележегдани ацукь кlвалера), амукьзавайбурухъ (дишегьлийрихъ, нахушбурухъ, кьуьзуьбурухъ ва аялрихъ) галаз санал» (им къадагъа ваъ, анжах теклиф я).
- Гьич садрани жаназа капl элямир абурукай кьейи садалайни ва абурун сурарин кьилихъни акъвазмир (абур кучудмир ва гуьгъуьнлай абурал кьилни чlугвамир), вучиз лагьайтlа абур Аллагьдихъ ва Адан Расулдихъ инанмиш тушир. Абур гунагькарар (кафирар) яз кьена.
- Къуй абурун девлетрини веледри вун гьейранар тавурай (абур имтигьан ва ахтармишун яз ганва, регьим яз ваъ). Аллагьдиз анжах абур эменнидалди (ам къазанмишун патал кlеве туналди) ва веледралди и дуьньяда жазаламишиз кlанзава, абурун руьгьер акъатдайвал (беденрай) имансуз гьалда аваз (кафирар яз рекьидайвал).
- Аллагьдихъ инанмиш хьун ва Адан рекье жигьад тухун буйругъзавай сура ракъурайла (Халикьди), абурун жергедай тир девлетлуйри вавай чпиз кlвалера амукьдай ихтияр гун тlалабиз хьана. Абуру лугьузвай: «Ихтияр це чаз амукьдай (кlвалера) амукьзавайбурухъ галаз санал».
Кьатl ама.
