Масабур патал жув рикIелай алудун
Аэропорт Шереметьево вичин гзаф кьадар терминалар ва ара датIана къвезвай инсанар галаз, вичин уьмуьрдалди ва вичин йигинвилелди яшамиш жезвай кьилдин уьлкведиз ухшар ава.
И няниз вири кIвалахар адетдин къайдада физвай: зулун эвелдай алахьай чими йикъар хьтин гуьзел зулун нянин вахт, кьве мертебадин къулай аэроэкспресс, регистрация, самолётда ацукьун – цава сиягьат авун патал мад вуч герек я кьван? Чкадин патахъайни бахтуни гъана – салондин юкь, пилотди хъсан рехъ хьунин тIалабунар ийизвай малумат, ван алаз зарбвал къати авун, чиливай къакъатун ва са шумуд декьикьадилай, мичIивиле куькIуьрнавай лампаяр хьиз аквазвай меркездин эквери чун рекье твазва.
ЧIехи пай газет кIелзавайбуру, якъин, фикирда: романтик я, са вуж ятIани тажуб ийиз кIанзава. Амма и кьисадин манадин гъавурда куьн гьа и мукьвара акьада! Гьамиша хьиз, цавуз хкаж жедайла самолётдин вилик пад хкаж жезва ва гьа саягъда аваз ада, якъин, къанни цIуд декьикьада кьван лув гузва. Бязи вахтара и чIавуз самолёт галтад жезва. Адет тирвал, и вахтунда вири пассажирриз кIанзни-такIанз тIебии са тIимил мукъаятвилин гьисс арадал къвезва. Ингье гьа и вахтунда явашдиз акъатай куьруь сузадин ванци салонда авай виридан рикIерик зурзун кутуна. Залай вад жергедин анихъ са шумуд итим къудгъунна къарагъна ва рикIик къалабулух кутадай теспачавал башламишна. Вуч хьана? Са касни гъавурда авач. Стюардессаяр тадиз анал фена. «Ам чилел ярхара», «мез акIидайвал ийимир», «яд це», «вилин нинейриз килиг»… Зи гъиле яд авай шуьше авай ва за ам тадиз зиян хьанвай инсандал агакьарна. Са кьадар вахтунилай пилотди пассажиррикай садаз пис хьанвайди ва эгер салонда духтур аватIа, адан патав атун тIалабун малумарна. Гьа инал за ихтилат акъвазарда ва адалай кьулухъ пассажирдиз хъсан хьайидакай хабар гузва, шукур хьуй Аллагьдиз ﷻ.
И вахтунда цавуз хкаж жедайла акатзавай къалабулух пис хьайи пассажирдин патахъай хажалат чIугуниз элкъвена. И патаз, а патаз килигайла, заз хажалат чIугвазвай гзаф инсанрин чинар акуна. А чинри, чпин къайгъуяр ва къалабулухар рикIелай алатна ва а касдикай хажалат чIугваз башламишнавай инсанрин гьиссер къалурзавай. А чIавуз зи рикIел масабур патал чеб рикIелай алатзавай цIаяр хкадарзавайбур, къутармишзавайбур, дяведин къуллугъчияр ва вири девиррин маса игитар хтана!
