Зи лезги халкь, зи мусурман халкь!

Лезги вахар ама чахъ

Мержан хьтин дегьнедамай гьуьлерин,
Жейранар хьиз Шалбуз дагъдин ценерин,
Сусар хьана дагъларамай лекьерин,
Хуьрерамай лезги вахар ама чахъ.

Сувар, Цуьквер - тIварар ачух чуьл хьтин,
Дагъви Тават - чин чIугур шикил хьтин,
ТIебиатдай къилих къени къуьл хьтин,
Тегьер амай лезги вахар ама чахъ.

Экуьн чIавуз цуькведамай къвед хьтин,
ЭкъечIзамай сифте зуьгьре гъед хьтин,
Рахун-луькIуьн, ширин виртни мед хьтин,
Мецер амай лезги вахар ама чахъ.

Иер элкъвей кьур тIунутIдин чин хьтин,
Михьивал гвай акурла къизил хьтин,
Къацу, чIулав, цIару, вили гьуьл хьтин,
Вилер амай лезги вахар ама чахъ.

Кьил хкажда, вил хкаждач регъуь яз…
Нур гузамай «Женнетдамай гьуьруь» яз,
Чин - берекат, вичин ният михьи яз,
РикIер амай лезги вахар ама чахъ.

Зегьмет чIугваз куьн гьамиша вердиш хьиз,
Храз гамар халичаяр вилик хьиз,
Чешнеда тваз халкьдин къилих нехиш хьиз,
Гъилер авай лезги вахар ама чахъ.

Вуч дидедиз ухшар жеда аялар,
Ама рушар чеб дидедин хиялар,
Галуд тийиз хуьзвай багъри араяр,
Руьгьер авай лезги вахар ама чахъ.

Гьич итимдин чиниз экъечI тийидай,
ЧIалаз, халкьдиз пак дидевал ийидай,
Агъзур суваб къачуз чпи хвейидай,
Бегьер амай лезги вахар ама чахъ.

Аллагьди квез иман гурай артухна,
ШейтIан ийиз малаикри кьулухъна,
Инсан жуьре пек-партални алукIна,
Сирер амай лезги вахар ама чахъ.

Сабурлувал, такабурвал чин хьана,
Четин чIавуз ватандикай къуьн хьана,
Дидедин чIал хвейибурни куьн хьана,
Гелер амай лезги вахар ама чахъ.

Азиятар къалур тийиз рикIевай,
Кьулухъ тийиз ферз крарни хивевай,
Амал ийиз адетрални вижевай,
Мелер амай лезги вахар ама чахъ.

Вуч акъатай ери рикIел аламай,
Вуч гъурбатда, ватандихъ рикI галамай,
Халкьдин кьисмет экуь гъед хьиз цавамай,
Гьиссер амай лезги вахар ама чахъ.

Гьажи, вуна къимет гана заха яз,
Намус квайдаз халкь амукьда багьа яз,
Татугвилер акваз яддиз, чара яз,
Дердер амай лезги вахар ама чахъ.

Жезва

Кьуьзуьбурукай сусаз кIвале къуншидин верчер жезва,
Къулайвилик хьайи папан, алахьайд вилер жезва,
Хамуник пи акатайла, пин кьунар, гьерер жезва,
Пинедикни квачир итим, кIуф рахаз бетер жезва.

Дустар лугьуз агатайбур, дар чIавуз кьифер жезва,
На хъсанвал авурдакай, рикI недай зегьер жезва,
Къуьлуьн никIе, къалгъан вине, вич-вичиз иер жезва,
Мух гайи лам шеври хьана, гатайла эсер жезва.

Ягь квачирдаз гьатна сегьне, шейтIандиз мехъер жезва,
Паж хайиди верч ятIани, тум атIайд кIекер жезва,
ЧIални Ватан усал хьунивай, векилар хенцIер жезва,
Гьажи гьикьван рахайтIани, цав ягъай хьелер жезва.

Гьикьван вуна ял авуртIани датIана,
Кьисметдин югъ чуьнуьхгумбатI къугъвана.
Заз вацралай квахьай зи гьер жагъана,
Кьисметдин мал кьисметдикай хкатдач.

Дуьшуьшди заз гьяркьу рехъ дар къалурна,
Маса шикил къалурна зун ракъурна,
Ваъ лагьана элкъвей, мад зун рахкурна,
Галай дуьшуьш элкъвеналди галатдач.

Вав хъсан кьур дустунивай къакъатмир,
Берекат жеч, гьарам квайдак агатмир,
Душмандикай къурху хьана вун катмир,
КатайтIани къвери дуьшуьш алатдач.

РикIив кьамир куьлуь-шуьлуь уьмуьрдин,
ЦIуд гьарамда сад рекьева хийирдин.
Виш кьинерал батIул гьахъ я тахсирдин.
Лагълагъчидин мециз херни акъатдач.

Хьайи гъалатIар хиве твамир кьисметдин,
Яргъа амаз фикир це на къиметдин,
Таб ашкара керчек амач адетдин,
Уях хьайдав чалкечирни агатдач.

Гьажи, вуна шумуд гъалатI кьатIана,
ГъалатIар ваз тарс паталди къалана,
Шумуд меци вун аял хьиз тухвана,
ЯтIани зун регьимдивай къакъатнач.

Кьисмет хьуй!

Ватан хвейи вафалудаз, хайи дидед чIал кьисмет хьуй!
ЧIал хвейидаз Шалбуз дагъдин пак рикIерин ял кьисмет хьуй!
Диде хвейдаз, зем-земдин яд, къайи нек гьалал кьисмет хьуй!
Буба хвейдаз гайи савкьват хьиз, бубад кIвал, камал кьисмет хьуй!

Руш хвейидаз рикI секиндиз, бахтлу жери кIвал кьисмет хьуй!
Хва хвейидаз кьил виневаз, такабурдин звал кьисмет хьуй!
Лезги рушаз иер кIалуб, кьилихъ ягълух, шал кьисмет хьуй!
Лезги хциз иман кIевиз, итимвилин гьал кьисмет хьуй!

Бахтлу хьана гьар са хизан, саламат аял кьисмет хьуй!
Жумартлудан кIвализ мугьман, ачух суфра, фу кьисмет хьуй!
Етим хвейдаз эхиратда женнетдин багълар кьисмет хьуй!
Гъурбатда авай гьар лезгидиз, бубад кIвалин цал кьисмет хьуй!

Вучиз?

Вучиз садаз кьисмет гузва,
ЦIай накъварив туьхуьзвай,
Са вилер ваъ,чинни галаз
Накъвар яд жез чуьхуьзвай?

Алчахдазни паб жезва,
Папан къадир течизвай?
Бегьем итим гьалтай меци,
Вучиз тар хьиз галкIизва?

Вучиз садакай диде жезва,
Малаик яз кIвалеваз?
Вучиз садан пеше жезва,
КIвал маса гуз хуьреваз?

Язух къвезва бязи папар,
ГьакIни бязи итимар,
Иман, сабур, вуч ятIа течиз,
Аяалар жез етимар...

Миргин крчал гъил вегьейдаз,
Вучиз кицIин пац жезва?
Уьмуьрд къене гьич вик такур,
Гьалтайдини яц жезва?

Хабар кьурла

Хабар кьурла квехъ чIал амани-амачни?
Лугьуз кIан я, эхь, ама чIал, Ватанни,
Хабар кьурла квехъ дин, югъун амани?
Лугьуз кIан я, эхь, ама дин, иманни.

Хабар кьурла гам, халича, рухварни,
Кутазмани куьпдик хъенчIин къапарни?
Лугьузва зхь, гузва сабур рикIериз,
Чуьнуьх жедай чка тегъиз вилериз.

Хабар кьурла амачни квехъ мискIинар?
Лугьузва эхь, гузва сабур рикIериз.
Динни ама, чIални ама, Ватанни,
Ухшар хьана яд кумачир регъвериз.

Ама чахъ дин, иман акьван аквазмач.
Ама чахъ чIал тIвар Ватандик кумачир.
Ама лекьер, артух хьана пехъерни.
Ама хуьрер, ичIи хьана кIвалерни.

Бесрай Гьажи,гьикьван рахан дердина?
Буьркьуьдаз рехъ гьикI къалурин экуьнал?
Гьарда вичел вил вегьейтIа винелай
Дегиш жеда чи Ватанни кIанелай..

Хьурай!

Вичин тIвар гьич, халкьдин тIварни кьацIуриз.
Гьа вич физвай чIуру рехъ дуьзди яз къалуриз.
Чи бубайрин адетрин къур чукIуриз.
Гьахьтин лезги жедалди, никIе шутIран кьал хьурай!

Вич къази яз, гьахъ-дувандин векил яз,
Гьахьиз гьатна, чIуриз рушар жегьил яз.
Муьхте хьана гьалтай кесиб сефил яз.
Гьахьтин къази жедалди са акIахьай сал хьурай!

Вич кавха яз халкьдин дердер такурди.
Халкь дарда тваз, са вичин нефс акурди.
Гьахъ-дуванрин силисрик кьил кутурди.
Гьахьтин кавха жедалди, хуьре чIуру мал хьурай!

Алахънавай чал цIийи диндин чIалар тваз.
Халкьдин тарих, пIирен кIвалин цлар хаз,
Чебни чIалахъ тежер чпив гафар гваз,
Гьахьтин имам жедалди ацахьай кIвал хьурай!

Жаваб тагуз вичи лагьай гафарин.
Эверай гьай, квачиз вири таб ийиз.
Иландин мез, вахъ рикI кудай хабар ийиз.
Гьахьтин къуншид паталай аюх хьурай!

Ватандизни, хизандизни, хуьруьзни…
Чад кепекдин менфят тагуз кIвализни.
Хъвазни-чIугваз уьмуьр физвай пичIизни.
Гьахьтин хайид жедалди, сухван тIал хьурай!

Кьуд патахъай вич гуьзгуьдай аквазвай.
Вич бегьем хьиз, вав цаварай рахазвай.
Вун гьим? – лугьуз, яд чIаларал жузазвай.
Гьахьтин агьли жедалди, патахъ са цал хьурай!

Машгьур хьана алакьунриз дуьньяда.
Маканда хьуй, туштIа маса уьлкведа.
Диде, Ватан, техвей руьгьдин сегьнеда.
Гьахьтин ягъи жедалди, къвакъвад вал хьурай!

Кьамир, Гьажи, рикIик куьлуь-шуьлуьяр.
Регъуь жедач дуьздал алайдаз регъуьяр.
Дагъви рушан тIвар кьацIурзавай вагьшияр.
Гьахьтин «гуьруь» жедалди вилел цуьквед хал хьурай!

ДЖЕЛИЛОВ ГЬАЖИ, СТАВРОПОЛЬ ШЕГЬЕР.