Мусурман Аллагьдиз ﷻ муьтlуьгъ кас я
Мусурман Аллагьдиз ﷻ муьтlуьгъ кас я
>
Аллагьдивай ﷻ тӀалаб ая
Сад Аллагьдивай ﷻ тӀалаб ая,
Чи дин-иман кӀеви жедайвал.
Йикъа вад сефер кпӀар ая,
Чи агьвал хъсан жедайвал.
Сад Аллагьдивай ﷻ тӀалаб ая,
Куьмек жеда Халикьдикай ﷻ.
Сад Аллагьдивай ﷻ тӀалаб ая,
Мусурманриз куьмек хьурай.
Кьве гъил хкажна ая дуьа,
ЧIехи Аллагь ﷻ рикӀел гъваш.
Ин ша Аллагь, хъсан жеда вири,
Аллагьдиз ﷻ ибадат ийиз хьайила.
Чирвал къачуз алахъа,
Дин Ислам чириз алахъ.
Къуръан кӀелиз алахъ,
Аллагьди ﷻ дин кӀеви авурай.
Мурад Тагирбеков
Лезги чӀал
Лезги чилин къадир хьухь квез, лезгияр,
Чи накьвадин дад чир хьухь квез, лезгияр.
«Лезги» лагьай тӀвар ала чал,
Виридалай багьа я чаз хайи чӀал.
Дидед чӀалал рахуха куьн гьамиша!
Хайи чӀалаз вахтар куьне багъиша!
Чара халкьар лезги чӀалахъ танишар!
Дидедин чӀал, чан балаяр, саймиша!
Сулейманан хтулар я чун вири,
Ша, хуьн чна чӀални Ватан, чил багъри.
Къекъвезва зун лезги чилел гьамиша,
Чи балаяр чӀалал рахаз вердишар!
Муслим Идрисов
Тlебиат ва уьмуьр
Дуьнья зун ваз мугьман жедай,
Са сефер рагъ акун патал.
Гатфар бере руьгь шадардай,
Цуьк авур багъ акун патал.
Ашукь язва тежер кьадар,
Тlебиатдин сегьнейрал зун.
Цуьквед багълар, саз билбилар,
Шад жечни бес вири акун?!
Дуьнья я вун гьакьван гуьзел,
Вири алем я вахъ цlигел.
Руьгьда шадвал, хъверни сивел,
Яшамиш хьун бахт я чилел.
Гьуьрмет ая тlебиатдиз,
Дуьнья къалур ви дидедиз.
Сажда ая Сад Аллагьдиз ﷻ,
Халкьнавай гьакl гуьзелдиз.
Вил вегьейла и дуьньядиз,
Гуьзел я ам юкъуз-йифиз.
Вал ашукь хьай гьар са касдиз,
Туькьуьл хьайид я валай хъфиз.
Дидед хайи гьар са касдиз,
Дуьнья язва мугьманхана.
Арза мийир на Худадиз,
Дуьньядикай хатур хана.
Аллагьдин ﷻ кьадар я, уьмуьрдин къанун,
Нефесар акьалтlна ажал агатун.
Гьар са кас мажбур я фагьум-фикирун,
Фана дуьньяда мугьманар тирди чун.
Вахтунал дуьньяда язватlа мугьман,
Багьа тир уьмуьрни хуьх ваз масан.
Я намус, я гъейрат квадармир жуван,
Нефсинизни гьакl тербет це жуван.
Лайихлу яз твах кьегьал хьиз, инсан.
Гьамишалугъ жериди туш мугьманда,
Эхир са къуз нефесар чи акьалтlда,
Худади чун хабарсуз яз хутахда,
Руьгьериз чи Женнет жеда цавара,
Беденар чи ферикъатда лакьанда.
Уьмуьр вацl хьиз я авахьна физвай,
Югъ-йиф, кьуьд-гад хьиз дегиш жезвай,
Гуьне къузада хьиз чими сериндай,
Хиялрин зинбилдай къум хьиз авахьдай.
Кlул гайи кьуьзекни рехи тир чуру,
Жегьил-жаванни хъуьхъвер тир яру,
Гел галачиз фида фана дуьньядай,
Зулуз пешер хьиз, тухудай гару.
Гьар гьикl ятlани лугьун за квез гьакъикъат,
Аллагьди ﷻ ганвай уьмуьр вич я чаз савкьват,
Зайиф тахьуй садрани ви руьгьдин къуват,
Сад Аллагьди ﷻ Вичи гурай чаз такьат.
Тlалабна лугьунал уьмуьр дегиш жеч,
Кьисмет тавур емиш гьич садани неч,
Кьисметдал рази хьухь, масакlа дуьз къвеч,
Уьмуьрдин камалдай кьил акъудиз жеч.
Дикъетдив яб це, эй инсаният!
Алахъа михьиз хуьз куьне куь жасад,
Квадарайтlа, эгер намус ва гъейрат,
Ялавра жеда даим эхират.
Дуьнья куьз я вун и тегьер гьахъсуз?
Кесиб халкь вучиз я и тегьер ажуз?
Икl яшамиш хьун нагьахъ я, шаксуз,
Садбур табий яз, садбур яз ягьсуз.
