Нефсиниз
Етим Эминан дафтардай, 2-пай
На ийирди вуч къал-къил я?
Сабур ая, акъваз, я нефс.
Мягьтел я ви ван хьайибур,
Чаз вун ширин акваз, я нефс.
Куьтягь тежер эбед кIвализ
ЗатI авани къалаз, я нефс?
Гьич са тадарак авачиз,
Квел ийида на наз, я нефс?
И къасават эляй валай,
Аллагь, Аллагь лугьуз-лугьуз,
Пелтек тир мез акъвазармир,
Са легьзеда йифиз-юкъуз.
Гьа шейтIандиз лянет ийиз,
Гьич рахамир виниз-агъуз,
Икьван гьахъар гардандамаз,
Бес гьикI фида мичIи суруз?
Чин цаваллаз къекъвемир вун,
Сабур ая, чилиз килиг.
Вилик чарх ква, аватда вун,
ТIимил агъуз-виниз килиг.
Гьар дередай сел къвезава,
Авахьна фир хвалаз килиг,
Вилер аваз буьркьуь жемир,
Вун фир харапI кIвализ килиг.
Гьар патахъай гьарайзава,
Ван жезвачни бес ваз, я нефс?
Фана дуьньядай экъечIна,
Эбед кIвализ фидачни бес?
Лацу кафан либас цвана,
МичIи суруз фидачни бес?
Дар лакьанда эцигайла,
Мункар-Некир къведачни бес?
Икьван шириндиз хвейи чан,
Акьрабари недачни бес?
Имни сад фикир тийидай,
Жемир вун ярамаз, я нефс.
Гьиниз фида, нихъай катда,
Гзаф кIандай рикIин мурад?
Диде-буба гьикI къакъатда,
Акьван фикир мийир вуна.
Вун геж ахварай аватда,
Уьмуьр асивиле фена.
Чилин кIаник гьикI акатда,
Гьич вахкудай затI авачиз?
Раббид(ин) вилик гьикI акъвазда,
Винел буржар алаз, я нефс?
Имни сад фикир тийидай,
Жемир вун аннамаз, я нефс.
Сидкьи тубадал элкъвена,
Ая гьарай, Сад, лагьана.
Валай гъейри сад авач чаз,
Халкь авур устад лагьана.
Гьам магьшердин азабдикай,
Ай аман, азад лагьана.
Ам регьимлу падишагь я,
Белки аф ийин, я нефс.
Им фана дуьнья я, валлагь,
Садни амукьдач, рекьида,
Рекьидай чIал гьам виридаз,
Чида, валлагь, ихласвилел.
Къуллугъ авур лукI Агъади
Хуьда валлагьи-биллагьи.
Эхир сад югъ дустагъ хьана,
МичIи суруз фида, валлагь,
Руьгь бедендай акъатайла,
Мез амукьдач рахаз, я нефс.
Уьмуьр асивиле фена,
Гила кьванни акъваз, залум.
Ихьтин зулум квез ийида,
Ви гъилелди на ваз, залум?
Чинеба туш, им ашкар я,
Вилиз акваз-акваз, залум.
Са легьзеда акъваздач вун,
Душмандивай чараз, залум.
Акьван кIевиз кьамир ява,
Валай кIевиз кьур ксариз
Гьич садазни хьанач чара.
Гьикьван гуьрчег акуртIани,
Агъу я дуьньядин гьава.
Ви насигьат кьан тийидай,
Низ лугьуда на бейниван?
Вун гьакъиниз инкар жемир,
Вилиз акваз-акваз я, нефс.
Етим Эмин, кьадач кьарай,
Вахт акъатна фида гъиляй.
----------------------------------------------------
Я руш, я хва авачирди Вун я хьи,
Я вах, стха авачирди Вун я хьи,
Мирес, арха авачирди Вун я хьи,
Имам Азам халкь авур, Сад Илагьи.
Ирид чилер, ирид цавар Вид я хьи,
Вири шейэр, вири халкьар Вид я хьи,
Абу лейсан, живер, ятар Вид я хьи,
Абу замзам халкь авур, Сад Илагьи.
Илагьи, Ваз эвел-эхир авач,
Ваз таквар, я батIин-загьир авач,
Гьар са касдиз Вун хьтин къадир авач,
Кулли аям халкь авур, Сад Илагьи.
Эмин аси лукI я Ви ядигар,
Регьим, рагьмет пара я, авач кьадар,
Шукур хьуй Ваз, чаз шафаат устадар,
Эвел аям халкь авур, Сад Илагьи.
