Етим Эминан дафтардай

Дуьнья

Гьар са кас вал шаддиз ава,

Вун са затI туш, фана дуьнья,

Шад рикIер зи барбатI жезва,

Вакай гуьгьуьл хана, дуьнья.

Уьмуьр фида гьар са къалди,

Алдатмишда дуьньяд малди,

Гьар са касдин вун паталди,

Иман зайиф хьана, дуьнья.

Шукур хьуй Ви Сад Тирвилиз,

И дуьньяда я чун дилиз,

Гьар са хъсан иманэгьли,

Вакай катна, фана дуьнья.

Гьич Етим рахач алачиз,

Мецин марифат авачиз,

Эхир жеда касни амачиз,

Махлукьатни кьена, дуьнья.

Фана дуьнья

Вил вегьейла и дуьньядиз,

Фида валлагьи, биллагьи.

Бязибуру дуьнья кIевиз

Кьада валлагьи, биллагьи.

Чан къачуз атайла нубат,

Иблис жеда хьи гьавалат.

Гьа чIавуз кIеви хажалат,

Жеда валлагьи, биллагьи.

Яраб гьикI жедатIа чи гьал,

ЧIулав чилик расайла кIвал,

Мункар-Некир ийиз суал,

Къведа валлагьи, биллагьи.

Къурмишайла терез-мизан,

Арасатда ийиз дуван,

Жегьеннемда хьайтIа аман,

Куда валлагьи, биллагьи.

Етим Эмин, вун тубадиз.

Худа, Гьам яхъ ваз мукьвадиз.

Къуллугъ авур лукI Агъадиз

Хуьда валлагьи, биллагьи.

Я, Рабби

Рабби, дуьньядикай хьанач заз вафа,

Эхир къияматда тагайтIа, гьикIда?

Чан къачудай бере я хьи гьам жафа,

Ажугъ аваз малаик атIайтIа, гьикlда?

И дуьньядал хьана гьал зи сефил яз,

Балаламиш хьана чан зи залил яз,

Бала На заз гана сабур тIимил яз,

Рагьметдикай зи пай атIайтIа, гьикIда?

Кьиникь са затI туш хьи, Илагьи, пара,

Дуьньядикай эхир жедач хьи чара,

Агъади къаншарда кьейила сура,

Вахъ вуч жаваб ава лагьайтIа, гьикIда?

Гьикьван хифет ийин мидагь датIана,

Хажалатди кана зин рикI атIана,

Келима шагьадатни рикIел татана

Ажал пияла зи ацIайтIа, гьикIда?

Етим Эмина тIимил хажалатнани?

Дуьньядин гъам тIимил гьавалат хьанани?

Дуьнья На заз ганач къияматдани,

Зи гунагьар залан хьайитIа, гьикIда?

Рабби

Рабби, гьар са дуьньяда,

Авай мидад, Вун я хьи,

Вири шейэр фана я,

Даим, абад, Вун я хьи.

Диде, дадаш авачир,

Велед, юлдаш авачир,

Бажи, къардаш авачир,

Вагьид, Агьад, Вун я хьи.

Бине, макан авачир,

Маскан, магъдан авачир,

Гьаким, султIан авачир,

Даим азад, Вун я хьи.

Рабби завал авачир,

Тагъайру гьал авачир,

Тешпигь, жамал авачир,

Гьаким, Самад, Вун я хьи.

Халикь, шерик авачир,

Тешпигь, малак авачир,

Девлет, уьскуьк авачир,

Малу Абад, Вун я хьи.

Вилер авачиз аквар,

Мез авачиз рахар,

РикIин сирдикай хабар,

Раббил ибад, Вун я хьи.

Руьгь авачиз дириди,

Яб авачиз ван жериди,

Я Рабб, лам ялид

Ва лам юлад, вун я хьи.

Ирид чилер цаварин,

Ирид икьлин гьуьлерин,

Тамам буьтуьн эллерин,

Халикь устад, Вун я хьи.

Эвел буба Адаман,

Ахпа эхир хатаман,

Вири жумла алемдин,

Зикир фейрад, Вун я хьи.

Вири шейэрин Халикь,

Гьар са марзукьдин Разикь,

Гьам магъбудвилиз лайих,

Агъа Тек Сад, Вун я хьи.

Я Рабби, Вун я Вадуд,

Гьар са гьамиддин Магьмуд,

Етим Эминан Макьсуд,

РикIин мурад, Вун я хьи.

Нефсиниз

Я нефс, вун заз хьана душман,

Иблисдив дуствал ава ви.

Акваз-акваз алдатмишдай

Душмандив хуш гьал ава ви.

На рикIел гъваш: чIулав чилик

Са дар мичIи кIвал ава ви,

Гьа дар кIвализ гьазур авур

Вуч хъсан амал ава ви.

На хиялда и дуьньяда

Ажалдиз мажал ава ви.

Нефесар тамам хьайила,

Гьич са гьеле ваз амукьдач.

Гьа вахтунда гьич са касди

Я гъил, я пел кьаз амукьдач,

Мез сивин къава акIана,

Гьич са чIал рахаз амукьдач.

Руьгь акъатна куьтягь хьайла,

Гьич са затI акваз амукьдач,

Фикир ая рекьидай къуз,

Вилерлай фир сел ава ви.

Вуч мецел атайтIа рахаз,

Им вид вуч къал-макъал я?

Шикет-гъибет кьуна пеше,

Рахадайди чIуру чIал я.

Гьа мичIи сура ви юлдаш,

Дуьньядал авур амал я.

Ви амалар пис хьайитIа,

Дар лакьанда вид вуч гьал я?

Мункар-Некир ваз атайла,

Вуч жаваб, вуч чIал ава ви?

Гьарам, гьалал хкуд тийиз,

Дуьнья гъиле гьатуй лугьуз,

Ийидайди гьа фикир я,

Маса затI туш йифиз-юкъуз.

Фикир ая валай вилик

Дуьньядилай кьейибуруз.

Дуьнья кIевиз кьуна гъиле,

Эхират рикIелай ракъуриз.

Дуьнья гъиляй акъатайла,

Ахпа вуч хиял ава ви?

Гьар мусурман стха кьуна,

РикIелди дуствал ая на,

Я кесиб хьуй, я девлетлу,

Виридав хуш гьал ая на.

Хъсан крар вилик кутур

Эхиратдиз мал ая на,

Гьар са пис кар терг авуна

Хъсан кардиз ял ая на,

На хиялмир и фанада

Я девлет, я мал ава ви.

Дуьньядилай вун хьтинбур

Нече шумуд фена, юлдаш.

Гьич са касдиз куьмек хьанач

Диде-буба, я дуст къардаш.

Хиялар яргъал тухумир.

Рекьидай югъ на рикIел гъваш.

Гъилевайди тIимил акваз

Масадан затI мийир тараш.

И дуьньядин мал патахъай

ЧIехи къал-макъал ава ви.

Дуьнья лугьуз вуч бала я,

Вил вегьейла са затI туш вун,

Ви кар чидай акьуллудаз,

Мусибат я вун кIевиз кьун.

Ви дарман я ви ширинвал

Агъудилай туькьуьл акун,

Эхиратдиз килигайла

ТIветIрен лувай вун такьун.

Кепекдайни вун такьадай

Хъсан касдив къал ава ви.

Дуьньядал магърур хьайи кас

Эхиратда жеда пашман.

МичIи сурай къарагъайла,

Акьул фена, жеда гьейран.

Гунагьдин пар далудаллаз,

Акурла ваз терез-мизан,

Ви Халикьди ваз лугьуда:

- Гунагь суваб чIугу инсан.

Ви гунагьар залан хьайитIа

ХупI кIеви шел-хвал ава ви.

Ваз Аллагьди ﷻ важиб авур

Важибатар ада я на,

Нече шумуд къайгъу такьаз

Фейи ферзер къаза я на.

Аллагь ﷻ сад я, пайгъамбарар

Гьахъ я лугьуз гьарая на,

Азиз уьмуьр зая мийир

Тубадиз фад чара я на,

Гунагьрилай гъил къачудай

Агъа, Зул Жалал ава ви.

Магърур – ягъалмиш

ТIеатдиз муьтIуьгъ хьайитIа,

ШейтIандиз лянет гайитIа,

Аллагьдиз ﷻ табий хьайитIа,

Мугьаммад ﷺ дарман жедалда.

Нефсериз амал авуртIа,

Халикьдиз шел-хвал авуртIа,

Эхиратдиз ял авуртIа,

Куьн Аллагьдиз ﷻ кIан жедалда.

Етим Эмина кьадач кьарай,

Къизилгуьл – майвад тарар,

Безетмишна Женнетда багълар

Гьана чаз девран жедалда.

Етим Эминан дафтардай