Вири мусурманриз талукь яз…
Хвейи сивер мубаракрай!
Я гьуьрметлу мусурман халкь,
Аллагь ﷻ Сад я, Пайгъамбар ﷺ гьахъ,
ЧIехи Ислам галаз хьуй чахъ,
Хвейи сивер мубаракрай!
ЧIехи Аллагь ﷻ мецел алаз,
Сиверин варз рикIе аваз,
Исламдивай тежез яргъаз,
Хвейи сивер мубаракрай!
Я къурбанд хьай варз Рамазан,
Вуч ширин я азандин ван,
Лезги халкьдиз хьурай вун кIан,
Хвейи сивер мубаракрай!
Я ишигълу Меккедин къван,
Чан сиверин варз Рамазан,
Лезги халкьдиз хьурай вун кIан,
Хвейи сивер мубаракрай!
Сивер хуьнихъ ава метлеб,
Куьруь жеда гунагьрин еб,
Аллагьдикай ﷻ хьуй квез себеб,
Хвейи сивер мубаракрай!
СиратIал муьгъ язва гуьтIуь,
Сив хвейидаз жеда гьяркьуь,
Куь гунагьар квахьда накьан,
Хвейи сивер мубаракрай!
ЗатIни туша дуьньядин мал,
Валлагь, фида туна мал-кIвал,
РикIел гъана Женнетдин гьал,
Хвейи сивер мубаракрай!
Карвансара дуьнья я им,
Эхиратда рахадай сим,
Сад Аллагьдиз ﷻ хьурай куьн чим,
Хвейи сивер мубаракрай!
Сираждинан хуьр я Кукваз,
ПIирер, Шейхер кIанда акваз,
Аллагьдивай ﷻ жемир яргъаз,
Хвейи сивер мубаракрай!
Сиражудин Расулов
Икрам ая!
Гадра рикIяй, акъуд иблис,
Мурдар я ам виридалай пис.
Адаз яб гуз жемир авам,
Сад Аллагьдиз ﷻ ая икрам.
Эй инсанар, ая фикир,
Шадвилихъни гала шийир.
Чи уьмуьр жедайвал давам,
Сад Аллагьдиз ﷻ ая икрам.
Диндал ша куьн, кваз лап гьевес,
Ширин хьухь квез азандин сес.
Гъилел кьуна Калам Къуръан,
Сад Аллагьдиз ﷻ ая икрам.
Ислам диндихъ ава делил,
Къе-пака я, мукьвал мензил.
Сурун суал жервал кьезил,
Сад Аллагьдиз ﷻ ая икрам.
На къачурла пара гунагь,
Никай хьурай ахпа панагь.
Гъана рикIел эхират-гъам,
Сад Аллагьдиз ﷻ ая икрам.
Гьелбетда, квез аквазва гуж,
Вад кьил капI вугайла квев бурж.
Вахтар амаз хьухь мусурман,
Дар тежервал сурун лакьан.
Вири дердерин дарман,
Сад Аллагьдиз ﷻ ая икрам.
И дуьньядал ийир шел-хвал,
Туькьуьл затI я кьиникьин тIал.
Чаз чирнавач мус ятIа ажал,
Дин Исламдал ая амал.
Иблисдив гъил вугумир, дуст!
Масадал гьич жемир пехил,
Рази хьухь ви утагъдал.
Гъил вугана иблисдив на,
Къекъвемир вун дуьньядал.
Дуьнья михьиз гайитIани,
Нефсиниз ам жедач бес.
Гьикьван пара хьайитIани,
Артух жеда мад гьевес.
Къакъуд вавай иблис-завал,
ЧIуру фикир къерех ая.
Агъа дуьнья экуь жервал,
Вахтундамаз тIеат ая.
Жезвай уьмуьр и дуьньядал,
Са куьруь тир ахвар я.
Таб эцигмир на Каламдал,
Вири жедай крар я.
Шукур Аллагь ﷻ, я Иеси
Цаваринни чилерин.
Пайгъамбарди ﷺ тунва веси,
Финиф рекьиз камалдин.
Кар-кеспияр хъийид лугьуз,
Яргъи я чи фикирар.
Ярх жеда чун эхир са къуз,
Мукьвал хьана мензилар.
Вил вегьена килига вун,
Шегьер хьанвай сурариз.
Эхир са къуз рекьида чун,
Килиг тийин яшариз.
Фикир ая!
Четин жеда лакьан яз дар,
Винел хьайила накьварин пар.
Ахкван тийиз вилериз экв,
Генани вун жеда гьелек.
Къиямат къал эцигмир таб,
РикIе чIуру фикир туна.
И дуьньядал къачу суваб,
Гунагьривай яргъа хьана.
Кьиникьикай фикир тийиз,
И дуьньядал вун жемир суст,
Вилер буьркьуь, япар биши,
Хьайилахъди вучда на, дуст?
Вун сурарал феначирни,
Кучуддайла мукьвал мирес?
Бес ви кьилиз атаначни,
Куьруь уьмуьр жедайди бес?
Са куьнуьхъни ахгакьдач вун,
Рагъ алатна - мичIи я йиф.
Квез герек я мад буш рахун,
Гила вуна чIугу гьайиф.
Чир хьанач ваз икI жедай кар,
КIвалахнач дуст, ви буш кьили.
Ярх хьайила лакьандиз дар,
Цавни такваз, чил яз кIеви.
Жедач дуст ваз ана ахвар,
Суру чуькьвез лап заландиз.
Ахквадач мад ракъар, варцар,
За лугьузва ваз аяндиз.
Кьиникьикай ийизва на,
Югъди-йифди фикир, фагьум.
Аллагьдивай ﷻ тIалаб чара,
И чIал кхьей, Гьажикьасум.
Аллагьди ﷻ кхьейвал жеда
Аватзава таралай пеш,
Ам я хьи Аллагьдин ﷻ кьадар.
Фикир тийиз жемир пелеш (сефил),
Худадин я вири гьунар.
Чи уьмуьр я гзаф куьруь,
Вил акьална ахъайдай кьван.
Ферзер ада тийиз вири,
Эхирдай чун жеда пашман.
Каламдавай гьар са аят,
Метлебар я чун паталди.
Абур чирун ая ният,
Геж тавуна рекьидалди.
Вун ксунни, къарагъунни,
Сад Аллагьдин ﷻ ава гъиле.
Буржи я чи тIеатунни,
Расулуллагь ﷺ туна рикIе.
Чи Аллагьдиз ﷻ муьтIуьгъзава,
Вири чиллер, цавар кьакьан.
Чаз виридаз килигзава,
Тесниф ийиз писни хъсан.
Аллагьди ﷻ негь ийида вун!
Вуна яб це, дуст, гила,
Дикъетдивди иердиз.
Дуьзвал чна гъиле кьуна,
Вегьедайвал терездиз.
Ужагъар чи сад-садавай,
Са шумуд верс яргъа я.
Вучда чна и къалдикай,
Ислягьвал чаз багьа я.
КукIварайла къуншидин вар,
РикIиз зи лап тIар хьана.
Гьикьван кIанда ваз чIуру кар,
Яргъал тир яшар хьана.
ЧIуру фикир кьиле туна,
Вучиз гана вуна зарар?
Инсанвал гьич квачиз зерре,
Экъисзава чаз сарар.
Яргъал дустар хъсан я хьи,
Арада гьуьрмет аваз.
Къачунва хьи вун нефсини,
Ийизвай туьгьмет такваз.
Жугъунарни вар кукIвариз,
Вегьезва вуна саларал.
КIанзава ви алчах рикIиз,
Дуьньяд винел агъавал.
Гьажикьасум Гьажимегьамедов
Я факъир кас!
Я факъир кас, я чан инсан,
Квадармир на динни иман.
КпIунин вахтунин вядеда,
АкъвазатIун вун Кьибледа.
РикIел алаз сад Аллагь ﷻ,
Ля илягьа илляллагь.
Алуд мийир, гуз рикIелай,
ФитIр, закат на кIевелай.
ЧIуру рекьиз вун фимир,
Туба ая, гьарам немир.
РикIел алаз сад Аллагь ﷻ,
Ля илягьа илляллагь.
Кесиб-куьсуьбдизни куьмек,
Авун язва шаксуз герек.
Ислам дин яхъ жуван дирек,
РикIел алаз сад Аллагь ﷻ,
Ля илягьа илляллагь.
Вил ямир гьич патаз вуна,
Жуван гьалал кIвале туна,
Дуьз рекьел ша, туба авуна,
РикIел алаз сад Аллагь ﷻ,
Ля илягьа илляллагь.
Сив хуьх, ая иман михьи,
Куьмек ая жемир кIеви.
Гьаждин рекье хьуй вун дири.
РикIел алаз сад Аллагь ﷻ,
Ля илягьа илляллагь.
Эй инсан!
Бес тушни ваз залум инсан,
Квадариз на динни иман,
Кьвед-пуд йикъан я чун мугьман,
Гьа къе-пака вахкуда чан.
Виш рушни ваз хва хьайитIан,
Дуьнья вири ваз гайитIан,
- Масадаз це, заз я гзаф,
Акъатдач ви мецяй са гаф.
Шумуд кас на ви гъилералд,
Накъвар алаз гьакI вилерал,
Лагь тIун – тунва такIанз сура,
Авачиз гьахъ, тежез чара.
Садавайни хьанач тухуз,
Жувахъ галаз чIулав суруз,
Къизил, гимиш, мални девлет,
Амукьда гьакI, алаз лянет.
Са шей ава жедай тухур:
Я кьезил туш, я ам агъур,
Чилел гьуьрмет я ви девлет,
Гваз фидайди тек са рагьмет.
