Пайгъамбардин ﷺ тарифар
Пайгъамбардин ﷺ тарифар
Осман Мегьамедрагьимов
Расулюллагь, я Мугьаммад ﷺ!
Сифте халкьна ви гуьзел нур,
Лавгьу-ль-магьфузди хиве кьур.
Аллагьдиз ﷻ ви кIандай хатур,
Расулюллагь, я Мугьаммад ﷺ.
Адам бубадин вилин нини,
Ибрагьим пайгъамбардин неве.
Чаз ачухай гуьзел Мекке,
Расулюллагь, я Мугьаммад ﷺ.
Вишни къанни кьуд агьзурди,
Гуьзетайла вун къвериди.
Ви дин гьакъикъат жериди,
Расулюллагь, я Мугьаммад ﷺ.
Вун хайила чкIана нур,
Малаикри къужахда кьур.
ЧIехи бубад мавлид авур,
Расулюллагь, я Мугьаммад ﷺ.
Гьахъ уммат я ваз кIаниди,
Эхир шафаат хъийирди.
Чазни хьуй ви пай жериди,
Расулюллагь, я Мугьаммад ﷺ.
Гьам екез Аллагьди ﷻ гун я,
Келима-шагьадат гъун я.
Чахъ авайди вири вун я,
Расулюллагь, я Мугьаммад ﷺ.
Ви руьгь ава чи рикIера,
На гъай Калам чи гьилера.
Ви дин девлет я кIвалера,
Расулюллагь, я Мугьаммад ﷺ.
Вун я дуьз рехъ къалурайди,
Гьахъ муъминар жагъурайди,
Къацу пайдах акIурайди,
Расулюллагь, я Мугьаммад ﷺ.
На гай шартIар тамамарда,
Са-сад муъмин имамарда.
Аваздалди азанарда,
Расулюллагь, я Мугьаммад ﷺ.
Чаз играми тир, Аллагь Сад,
Вахъ муьгьтеж хьун я чи мурад.
Зикирдалди къачуда дад,
Расулюллагь, я Мугьаммад ﷺ.
Айдаев Фазил
Мугьаммад Пайгъамбардиз ﷺ
Мусурманар я ви уммат,
Къазанмишна вуна гьуьрмет.
Алазва вал еке къимет,
ЧIугуна дин патал зегьмет.
Сифте хьана буба Адам ,
Вунни я чи Эхир-Хатам.
Эвел Адам я пайгъамбар ,
Гьадахъ галаз я барабар.
Къуръан гваз атай Пайгьамбар ﷺ,
Мецел хьана Аллагьу акбар.
Меккевийри ийиз тикрар,
Вакай хьана чи Пайгьамбар ﷺ.
Чи Халикь - Аллагь я Сад,
Медина диндал атана фад.
Алцурарна Суфьяна мад,
Ваз аксибур хьана фасад.
Эхир Суфьян пашман хьана,
Кьил агъузна дин кьабулна.
Вуна адлай гъил къачуна,
Чан играми чи Пайгъамбар ﷺ.
Хашпараяр гъана диндал,
Умар, Али тур ериндал.
Инсанар къвезва ви диндал,
Зияратдиз ви мискIиндал.
Вун я чи умматдин агъа,
Медина я чавай яргъа.
Гьамиша чи ваз я дуьа,
Шафаатдик ви умуд ква.
Сиражудин Расулов
Пайгъамбар ﷺ!
Чи Ислам дин гужлу авур,
Ягьни намус берекат тур.
Мусурман халкь азад хъувур,
Я Мугьаммад ﷺ, Аллагьдин нур!
Вуна туна къанун-къайда,
Ви гафар фенач гьавайда.
Ислам динда хьана пайда,
Я Мугьаммад ﷺ, Аллагьдин нур!
Ислам диндал чIугур зегьмет,
Ви руьгьдизни жеда гьуьрмет.
Ви Къуръандиз ава къимет,
Я Мугьаммад ﷺ, Аллагьдин нур!
Сад Аллагьдин я вун векил,
Мягькем авур мусурман чил.
Шейхери фад кьунай ви гъил,
Я Мугьаммад ﷺ, Аллагьдин нур!
Пайгъамбаррин я Пайгъамбар ﷺ,
Ислам диндин гайи хабар.
Мягькем авур Исламдин вар,
Я Мугьаммад ﷺ, Аллагьдин нур!
Салам-калам авур мягькем,
Вун тушни бес чирагъни шем.
Арафат дагъ - Мекке я, дем,
Я Мугьаммад ﷺ, Аллагьдин нур!
Мусурманри ийиз тариф,
Ви руьгьни гьич тахьуй зайиф.
Чи къуьнерал малаик-лиф,
Я Мугьаммад ﷺ, Аллагьдин нур!
Ислам диндин Меккедин къван,
Сад Аллагьдиз хьанай вун кIан.
Михьи Къуръан тир ваз масан,
Я Мугьаммад ﷺ, Аллагьдин нур!
Вад капI авуна къанун,
Чи халкьдиз вун кIандай акун.
Ви гуьмбетдал нур алаз хьун,
Я Мугьаммад ﷺ, Аллагьдин нур!
Сиражудинан салам я квез,
Меккедай мад ви руьгь хъуьрез.
ЧIехи Аллагь ви мецел жез,
Я Мугьаммад ﷺ, Аллагьдин нур!
Гьажикьасум Гьажимегьамедов
Дин Ислам кIевиз яхъ!
Экуьнахъ фад къарагъ кIвачел,
Шукур Аллагь ﷻ алаз мецел.
Иблисди вун тавуй энгел,
Ахвар гзаф ширин хьана.
Шукур Аллагь ﷻ, Вид я гьунар,
Халкь авунвай чилер цавар.
Къалурзавай мусибатриз,
Фикир це на зигьин хьана.
Вун диндал ша, гъваш салават,
Сад Аллагьдиз ая капI-тIеат.
Чи каламдин и гьакъикъат,
Яхъ вуна ам йигин хьана.
Вахт атайла чи чан къачуз,
Гьазур жеда мичIи суруз.
Аллагь, Аллагь, лугьуз-лугьуз,
Ферз я финиф муъмин хьана.
Шад я чун
Гунуг тушни чун Вав рахун,
Чун халкь авур Халикь я Вун.
Я Рабби, я Сад Аллагь,
Шукур Ваз, альгьамдулиллягь,
Мусурманар, ая сужда,
Сад тир Аллагь рикIел алаз.
Салават гъваш, зикир ая,
Мугьаммад-нур ﷺ мецел алаз.
Амина дидеди хайи,
Расулюллагь ﷺ диндин багъри.
Виридалайни пак тир михьи,
Квез и мавлид мубарак хьуй.
Ислен йикъан экуьн бере,
Савкьват жедан адалай еке?
Чи Пайгъамбар ﷺ хайи диде,
Фирдавусда хьуй ви бине.
Терг авуна ниятар пис,
Ша, къакъудин чавай иблис.
Шад келима авуна гьисс,
Зикир ая, жемир куьн кис.
Эхир Къияматдин юкъуз,
Гъилерни хкажна цавуз.
Мусурманрихъ рикI куз,
Ишез жеда уммат лугьуз.
