Жуван мусурманвал хуьх!

Мугьаммад Расулуллагь

Агакьна чал са шад хабар,
Ахъайнава регьимдин вар,
Кlватl хьанва малаикар,
Ваз килигиз, Расулуллагь.

Цlикьвед лагьай йикъан йифиз
Вацран Рабиуль-аввалдиз,
Нур чукlуриз цавуз, чилиз,
Ханай вун, чи Расулуллагь .

Буба тир иер Абдуллагь,
Диде Амина, ма ша Аллагь.
Акур туш вун хьтинди, Валлагь,
Алемдиз, я Расулуллагь .

Мугьаммад тариф алай тlвар,
Вал къведалди тушир хабар.
Ваз я салам, салаватар,
Виридан, я Расулуллагь .

Гъвечӏи чlавалай тир Амин,
Лайихлу тlвар къачур вичин,
Вун къекъведайла атирдин.
Ни чкlидай, Расулуллагь .

Саламат тир вав вугай затl,
Хуьдай на гаф тавуна гъалатl.
Къилихар ви гьарма акьалтl
Тир тамамбур, Расулуллагь .

Ракъин винел къведай ви зар,
Нурлу ийиз муъминрин чинар.
Иервилихъ ви агъзур варцар,
Къведач ацlай, Расулуллагь .

Чlулав тир йиф хьиз ви чlарар,
Са цlерид тир квай рехи чlар,
Лацу якlар ви, акъатнавай яр,
Ипек хьтин, Расулуллагь .

Кlватlайтlани вири алем,
Жеч ана вахъ къверди бегьем.
Вун я чи рикlериз мелгьем,
Сагъардай чун, Расулуллагь .

Хьайила ви яхцlур яшар,
Жабраил гваз атана хабар:
- Кlела, - лугьуз, сифте гафар,
Къуръандив эгечIа, Расулуллагь .

Хьанай ваз акси мидяяр,
Эвер гун ви ийиз инкар.
Вун я гьакъикъат пайгъамбар
Эхиримжи, Расулуллагь .

Хаинрикай Меккедин йифиз,
Куьч хьанай вун Мединадиз,
Абубакр кьуна юлдашвилиз,
Гьатнай рекье, Расулуллагь .

Кlанчl ишехьнай вахъ яз цlигел,
Хкаж хьайила минбардин винел.
Таб хьайи туш гьич ви мецел,
Гьахъ рахадай, Расулуллагь .

Варз кьве падна агъун патал,
Текъвезвайбур ви гьахъ чlалал,
Кьакьанарна аламатдал,
Дережа ви, Расулуллагь .

Тамам тир къанни пуд йисуз,
Дин агакьриз, йифиз-юкъуз,
Ялвардай на: «Уммат», - лугьуз,
Сад Аллагьдиз, Расулуллагь .

Эвердал ви хьана уях,
Гьар садаз вун я хьи даях.
Кlандай уьмуьр ийиз уртах,
Вахъди санал, Расулуллагь .

И дуьньядал атана абур,
Иервал вич авур чlагур,
Алем эцигна къимет чlугур,
Къведач вахъ, я Расулуллагь .

РАСУЛ АГЬМЕДОВ

Чаз бубайри веси туна

Пакам кьиляй экъечIдалди рагъ,
Бала, вун месикай къарагъ.
КапI ая вуна, лежберни пачагь, —
Чаз бубайри веси туна.

 Куьчедал кам къачудалди эвел,
БапIах алукI жуван кьилел.
Намус я ам, вегьемир чилел, —
Чаз бубайри веси туна.

Яракь хуьх михьи яз на ви,
Тапанчи ва я гапур хци.
Тахсирсуздан экъичмир иви, —
Чаз бубайри веси туна.

 Ви ракIарихъ атайла мугьман,
Тадиз эвер суфрадихъ жуван,
Ядни фу це, тухара инсан, —
Чаз бубайри веси туна.

БалкIанни чуру итимдиз лазим
Шейэр я чIаварилай къадим.
Рухвайриз чира кIелун, кхьин, —
Чаз бубайри веси туна.

Къуншидиз вуна ая, хва, гьуьрмет,
Хъсан къуншидиз авач гьич къимет,
Фитнечийриз хьурай чи лянет, —
Чаз бубайри веси туна.

Гъурбатда

Аквазмач къе хайи макан,
Бубадин кIвализ хьана мугьман.
Дуланажагъ гъурбатда аваз,
Сувун паталай кьуд цал акваз.

Азандин ванцихъ хьана цIигел,
Муэдзиндин ширин ванцел.
ТIили фахъни булахдин цихъ,
Жуван хайи лезги чилихъ.

Куьчедал япариз хьайила ван
Икьван ширин лезги чIалан.
Галат яз, тирлани сефил,
Гьасятда хкажда авачир гуьгьуьл.

НИЗАМИ ЖАЛАЛДИНОВ

Хуш туш рикlиз

Цаварай рахадай вич алаз чилел,
Тарифар ийидай гъил тухуз рикlел,
Лавгъавал, таб алай гьамиша мецел,
Инсанар хуш туш хьи, дустар, зи рикlиз.

Чир тежер авунвай гьуьрметни хатур,
Чlагуриз алахъдай вакъиа такур,
Дуьньядал зун шагь я - гатазвайбур хур,
Инсанар хуш туш хьи, дустар, зи рикlиз.

Мецелди рахадай винелай верцlи,
Кьулухъай дабандиз кlас ядай къучи,
Инсафсуз хесетрин, рикl чlулав вагьши,
Инсанар хуш туш хьи, дустар, зи рикlиз.

Пlузаррал хъвер алаз сарари атlуз,
Халкьарив гьуьжетдай вич хан я лугьуз,
Гафуналди гъил ийир мурз алай якlуз,
Инсанар хуш туш хьи, дустар, зи рикlиз.

Гьажилеглегри хьиз хкажна кьилер,
Зайифда кьулухъай эцядай кьуьлер,
Намусдал, гьаядал ийизвай алвер,
Инсанар хуш туш хьи, дустар, зи рикlиз.

Девлетда тунвай гьамиша вилер,
Пулунихъ дидени гудай, кьаз кьинер,
Гьа гъвечlи рикlера цанвай зегьер,
Инсанар хуш туш хьи, дустар, зи рикlиз.

Алчах тир мецери турунал гъида,
Экв квахьай вилери ялавдал гъида,
Кьадарсуз нефсери кьурунал гъида,
Инсанвал хуьз алахъ, хуш жервал рикlиз!

Зи ахвар

Акуна йифиз заз диде ахварай,
Пелел гъил эцигна, заз эверзавай,
Тамарзу сесини акъудна гьарай,
Ахварай аватна зун дидедин ванцел…

Туьтуьна гьатай хьиз са кIеви мерез,
Гаф акъат тийиз зай, кьуранвай нефес,
Тамамдиз накъвари кьежирнаваз мес,
Ахварай аватна зун дидедин ванцел.

Давам хьана кIан тир ахвар заз яргъал,
Лугьурвал дидедиз жуван рикIин тIал,
Ацукьиз кIан хьанай заз адан къвалал,
Ахварай аватна зун дидедин ванцел…

Гьалал ая лугьуз хьанач гайи нек,
Вичи чал чIугур кьван азиятар тек,
Дердерив ацIанвай рикI хьана гьелек,
Ахварай аватна зун, дидедин ванцел.

Шехьмир, рикI

РикI, шехьмир, элкъвез кьулухъ килигиз,
Алатнавай йисар элкъуьр хъжедач.
РикI, шехьмир, вил вегь экуь дуьньядиз,
За сабур гуз, вун къуватдай вегьедач.

Чун кьвед сад я, санал я чи сузани,
Туькьуьл, ширин санал дадмиш авуна.
Ша кьведани чими ийин къузани,
За вахъ галаз кам къачузва агъуна.

Чун кьвед сад я, къакъуд тежер рекьидалд,
Йигин камар зайифармир вуна зи.
Гьикьван вахт я кIвалахиз са ивидалд,
Хаз алахъмир гьевес, квайла лувар зи.

Шехьмир, рикI, белки, дердер алатна,
Гьа йисарихъ галаз санал лув гана,
За кьабулдач къене вун бейкеф хьана,
Зун къуватсуз и чилерал амукьна.

Шехьмир рикI, йисар ийиз тупIалай,
Къуй дердерин нагъв тахьурай вилерал,
Садакьа гуз цIийиз къвезвай йикъалай,
Къуват гуз чун къекъведа чи кIвачерал.

ФАТIИМАТ ОСМАНОВА