Сад Аллагьди гъанватIа вал чан
Сад Аллагьди гъанватIа вал чан
Инсан я вун чlехи бахт авай
Вун дуьньядал туштIа гьакIан къван,
Сад Аллагьди гъанватIа вал чан,
Ваз Халикьди ﷻ ганватIа сагъ чан,
Инсан я вун чIехи бахт авай.
АквазватIа ви вилериз рагъ,
Агуд мийир пашманвилин нагъв.
Ви хайибур, дустар ятIа сагъ,
Инсан я вун чIехи бахт авай.
ГанватIа ваз кар ийир гъилер,
ТуькIуьрдайвал бул иервилер,
На рикIера тазватIа гелер,
Инсан я вун чIехи бахт авай.
ШадзаватIа ви рикI акунри,
Гатун йифиз церин рахунри,
Гьам гатфарар, зулар атунри,
Инсан я вун чIехи бахт авай.
АватIа ваз хкянавай рехъ,
А рекье вун туштIа эгер тек,
КъекъвезватIа рикIе аваз экв,
Инсан я вун чIехи бахт авай.
Ви бицIекди вилер квай дуру,
Ваз бахшнамаз са темен хару,
Лагь вуна ам агудна хурув:
- Инсан я зун чIехи бахт авай!
Инсан ава
Инсан ава, агатнамаз ви патав,
Ви вилера гатфар зул хьиз ишеда.
Шегьре рекьер жеда налагь, вири дав,
Вун запабра гьатда ахъа тежедай.
Алугарда ви мурадрин генг лувар,
Ван атIуда ви манидин рикIевай.
Вили ятIан, рагъул аквад(а) ваз цавар,
Ракъинин нур къвазда налагь, рекьевай.
Инсан ава, агатнамаз ви патав,
Цуьк ахъайда гуьгьуьлда ви мурадри.
Агъзурни са гъед куькIуьрна гуда цав,
Чан гуда ви гуьгьуьлдавай "ярабри".
Ацукьнава зун ялгъуз
Ацукьнава зун ялгъуз,
Таран кIаник гар галай.
Гатун шагьвар рахазва
Зав, ракъинин зар галай.
Нисин я югъ. Чимила
Рекьер ава муьргуьда.
Агь, гатун югъ, ви гуьгьуьл
Вуч захада, гьяркьуьда!
Цав михьи я, вили я,
Урус рушан вилер хьиз.
Мили туьмер шагьвардин
Зи дидедин гъилер хьиз.
Нурар пайиз къекъвезва
Рагъ, таватни цаварин.
Аван адаз цIигелвал
Заз хьиз фейи чIаварин?
Гуьгьуьлда зи гелер таз
Камиз физва геренар.
Шагьвар рахаз чинеба
Ийиз уьмуьр ширинар.
Агь, и гатун геренар!
Къвазва цавай чилел зар.
Вуч хъсан тир эбеди
ЖедайтIа куьн акъвазар!
Ацукьнава зун ялгъуз
Тарцин кIаник гар галай.
Гатун шагьвар рахазва
Зав ракъинин зар галай...
Зулни зун
Ягъана хьиз, элкъвена чахъ экуь вил,
КIватIна гату гьяркьуь ценер гваз фена.
Алукьна зул, тIушуниз вил ахвар квай,
ТIебиатдин, цуькверин ранг – къаз фена.
Галчукна шал... акъвазнава зунни зул,
Акурбур хьиз мягьтел хьана чин-чинал.
Кьазва хабар зулу завай секиндиз:
-Я руш, лагь заз, акурди я вун гьинал?
- Чирхчир я лап кIевелай зунни вун,
Захъ пел чIуру шумуд гатфар, гад хьана.
Зи гуьгьуьлдин гатфарарни зулар гьич,
ТIебиатдив дуьз атанач, сад хьанач.
Гьалтна гзаф чун сад-садал уьмуьрда,
Шумуд гатфар, гад хьана заз зул хьтин.
Гатун цикIиз даварна рикI къаяри,
Агажна зун тIалди сурун фул хьтин.
Гьадак я зун гуьгьуьл – рикIе зул авай.
Кьамир хабар: "акурди я вун гьинал?"
Къуьнерик шал...акъвазнава зунни зул,
Акурбур хьиз мягьтел хьана чин-чинал...
Тек тар
Лугьуда хьи, тама тарни тек тахьуй,
Гьахъ я жеди и гаф лагьай бубаяр.
Анжах, вучиз гуьгьуьл, вун рази туш,
ЧIехибуру эцигнавай тубадал?
Зун ашукь я иервилел, акунрал,
Чуьлда, тама ялгъуз, тек тир тарарин.
Игитар хьиз хура къваздай, уьмуьрди
Ракъурзавай гараринни харарин.
Тек тар – абур я чуьллерин, уьруьшрин,
Акъвазнава хиялдавай тават хьиз.
Илагьиди тIебиатдин пак хурал
АкIурнавай иервилин тIаратI хьиз.
Анжах инсан... Инсан ялгъуз тахьурай,
Тай жагъурай рикIиз туькIвей гьар садаз.
Пуч я уьмуьр небгетарин къвалал фир,
Текни хъсан ялгъузвилин тIвар алаз.
Гьикl я куьн
Хайи хуьруьн жигъирар.
Зун яргъава, гьикI я куьн?
Кьакьан пелер гар галай,
Гьа сифте хьиз тик я куьн...
Зи хайи хуьр, гьикI я вун?
Атанван гваз йикъар хуш,
Чина мили хъвер авай
Гатфар дедин Яран руш?
Галчукнаван къацу шарф
Чи гуьнейри, дерейри?
Чубарукри мугнаван
Бубад кIвалин чIерейрик?
Хъверзавани ракъини
Чуьлдин хару цуьквериз?
Туьмерзаван гарари
Къацу, генг тир никIериз?
Илигнаван манидал
Чи багълара къушари?
Яру-цIару алукIна
Дамахнаван рушари?
Нур гузаван акьаз рагъ
Пак экуьнин берейри?
Селемаяр чразван
Чи къуларал дидейри?
Зи хайи хуьр, хайи эл,
Зун яргъава, гьикI я куьн?
Фикир-хиял квев гва зи
Зи чан я куьн, рикI я куьн...
Римма Гьажимурадова
Дуьнья
За ви дердер низ ахъайин,
Цуькведивди дигай дуьнья,
Ашкъиди кай Керемакай,
Эслидиз пай тагай дуьнья?
Пашман я ви билбилдин ван,
Етимдин фу гьамиша яван,
Фагьум тийиз жегьил, жаван,
ЧIулав суруз ракъай дуьнья.
Яс туькIуьрна мехъер гъенел,
Велед гана дидед гъилел,
Балад магьфе бубад къуьнел,
Жегьилзамаз ягъай дуьнья.
Эвел шадвал, эхир женжел,
Гъиле теспягь, кьула хенжел,
Диде туна гъенин куьнжел,
КIвал сусарив вугай дуьнья.
Вун дуст яни, душман яни?
Къудузбуруз майдан яни,
Иблис яни, шейтIан яни,
Жагъур жедач ваз тай, дуьнья!
Вучиз я?
Гьар четинвал эхи авур,
Веледар хуьз чIехи авур,
ЧIулав чIарар рехи авур,
Дидеяр пашман вучиз я?
Сад багьа я, сад я пулсуз,
Сад къиметлу, сад я ужуз,
Сад зайиф я, сад я къудуз,
Къудуздаз майдан вучиз я?
Чаз гай паяр масан гана,
Бязибуруз хъсан гана,
На дуьньядиз инсан гана,
Иблисни шейтIан вучиз я?
Дерт кесибда эхиз хьайла,
Сад гужлу, къад ажуз хьайла,
Стхад стха рекьиз хьайла,
Дуьньяда инсан вучиз я?
Дердер еке, мурад гъвечIи,
Хизан пара, суфра ичIи,
Акьуллудаз дуьнья мичIи,
Ахмакьдаз девран вучиз я?
Намуссузди къудузарна,
Диде-буба ужузарна,
Кьуьзуь кьиляй ажузарна,
Ажал къвердал тан вучиз я?
