Фикир гудайбур патал

Са зун-зунбегаз

И мукьвара са сефер,
Са зун-зунбег гьалтна зал.
Уф алатна са тегьер,
Ивидални алай звал.

Гьисаб авачир адаз,
Баку, Хачмаз, Къубани.
Бегенмиш тушир адаз,
Вичин хайи бубани.

- Чи бубади чун патал
Гьич са шейни авур туш.
Аялризни – са гапIал,
Вилин ишигъ акурд туш.

- Гьич са шейни тавурда,
Вун арадал гъаначни?
Мус вун гьатда гъавурда,
Куьн хуьз дагъда хьаначни?

Йикъарикай са юкъуз,
Азарлу хьана буба.
Вун зи кIвализ, ша, лугьуз,
Гара авай адан хва.

Женжелд фикир ам тир хьи,
Бубадин къул чIугваз тун.
Йифиз, юкъуз гъам тир хьи,
Бубад кIвалер жуваз тун.

Къул чIугвадалди – «Чан буба»
Ийиз хьана гьуьрметар.
Къул чIугурдалай ахпа,
Башламишна туьгьметар…

Са истикан гьар юкъуз,
Нек хъухъ лагьанва духтурди.
Минетна чан хва лугьуз,
АватIа вахъ хатур зи.

- Къуншид кали хайила,
Нек гъида за ваз буба
Экуьн ярар хьайила,
Хци язава Баку-Москва.

«Нек гьикI хьана?» - лагьайла,
Суса къуьнер чуькьвена.
«Бес вучиз икI» - рахайла,
Бирдан вилер экъисна.

Буба гъавурда гьатна,
Вил вегьена багълариз.
Мажбур хъхьана катна,
Гьа вич хайи дагълариз.

Са тIимил вахт алатна,
Ван хьана буба кьейи.
Мукьва кьили агатна,
Хабарна хциз хайи.

«Минет хьуй квез пара кьван,
Кучукмир куьне гьеле
Пара ваъ, са пуд йикъан
КIвалах ама зи гъиле…»

Са гьафте хьана рекье,
Шехьдай кьван гьал амачиз.
- Вучиз кучукна куьне,
Зи буба зун галачиз?

- Я мирес, мад хьанач хьи,
Авайди я адетар.
Кьил тIарармир вуна чи,
Ахъайиз чаз хкетар.

Гьар са инсандиз къимет
Гудайди туш гафари.
Гьам туьгьметни, гьам гьуьрмет
Терезда твада крари.

Эрекьдиз

Путулкадин къеневай «жин»,
Пара завал шей я якъин,
Русвагь ийиз итимдин чин,
Вуч чIуру шей тушни эрекь?!

ГьакI акъудда акьул кьиляй,
Зегьердин ни къведа сивяй,
РикIелай физ лагьай-талгьай,
Вуч чIуру шей тушни эрекь?!

Эрекь хъваз кIватI жеда дустар,
Гъиле рюмка, кефчи тостар,
Пиян хьайла, ийиз къалар,
Вуч чIуру шей тушни эрекь?!

Садбур шехьиз, садбур хъуьрез,
Ата-пата куьчедай къвез,
Тикдиз кIвачел акъваз тежез,
Вуч чIуру шей тушни эрекь?!

Терхи-перхи чIалар рахаз,
Сеперар гуз къуншид папаз,
ГьакI кьасухдай аял гатаз,
Вуч чIуру шей тушни эрекь?!

Гьуьжетар ийиз жеда садбур,
Хъваз алахъда «мурцаринбур»,
Эхир кьиляй квахьда абур,
Вуч чIуру шей тушни эрекь?!

Гагь аквада къубуд къене,
Палчухда кьил, лухъад-чене,
Сефигь гафар жеда сиве,
Вуч чIуру шей тушни эрекь?!

Хъвана эрекь яру сифет,
Квадарда намус, гъейрат,
КIвале-къецел къачуз туьгьмет,
Вуч чIуру шей тушни эрекь?!

Куьтягь хьайла жуван суьрсет,
Масабуруз ийиз минет,
Алудиз на алай къимет,
Вуч чIуру шей тушни эрекь?!

Эрекь хъванва, хьана «аслан»,
Мукьварилай гьатда душман,
Эхир кьиляй жеда пашман,
Вуч чIуру шей тушни эрекь?!

Дяве ийиз гъенел къведа,
Алчах гафар мецел жеда,
Вич акурла ишел къведа,
Вуч чIуру шей тушни эрекь?!

Чида лугьуз вичиз кьадар,
Сада зи кьил авунай тIар,
Экуь дуьнья авур заз дар,
Вуч чIуру шей тушни эрекь?!

Фагьум ая вуна инсан,
Эхир кьил ви жеда пашман,
Терг ая ам, хьухь ваз зи ван,
Вуч чIуру шей тушни эрекь?!

Лекь хьухь, къаргъа жемир!

Къафкъаздин дагъларин кукIушра кьакьан,
Лекьерин жемятди кутуна ватан.
Гьар са лекьрехъ игитдин къилих хьана,
ВикIегь халкьдихъ чIехи тир тарих хьана.

Атана алатна вядеяр-вахтар,
Дуьньядин гьар патаз куьч хьана халкьар,
Гьар са патахъай къвез хьана ванер,
Лайихлу лекьери кутунва хуьрер.

Акьул, зигьин, сабур аваз къалурна,
Пагьливанри дуьнья тирвал машгьурна.
Гьар са рекьяй абур вилик алатна,
Ватандин тIвар цавун аршдиз акъатна.

Гьайиф гагь-гагь чаз лекьерин юкьва,
Лайихлу тушир къушар аквада,
Чебни жеда абур хкатна цава,
Лацу къаргъайриз ухшар аквада.

Лекьерин патав ятIани чеб кьезил,
Амма гьунарриз агъурвал кIанда,
Лекьерин лувуник хуьзвайдаз кьил,
Къушарин юкьва машгьурвал кIанда.

Амма тарцелай ич атIун паталди,
Адав агакьдай буй хьана кIанда.
Ви тариф халкьди авун паталди,
Хъсан къилихдин суй хьана кIанда.

Лекь хьиз тухвайтIа жеда вахъ гьайбат,
Вунни лекь хьиз дагъдин кьакьанда жеда,
Амма къаргъадихъ жедач а къуват,
Адан лув гунар аскIанда жеда.

Девирдин папариз

Вахтар хьанва, цIийи хьанва девир къе,
Папан гафар хьанва дустар къе вине,
Итимдин гаф хквезмач гьич виже,
Агъзур жуьре сесер къвезва япариз,
Гила дустар девран хьана папариз.

Мярекатрин мехъер-межлисрин кьиле,
Аквада квез дишегьлияр гьар жуьре,
Вучиз икI дегиш хьанва дуьнья къе?
Мад итимри яб хгузмач крариз,
Гила дустар майдан хьанва папариз.

ИкI хьайитIа пуч жедачни итимвал,
Гьиниз фенва дагъвидиз хас лигимвал?
ГьакI са тIвар яни аламайди «итимвал»,
Гьикьван и гьал жеда таквар кьасариз?
Гила дустар майдан хьанва папариз.

Азиз дустар, тавакъу хьуй, дад-бидад,
Эвел къимет, ша, бармакдал хкваш мад,
АкI тахьайтIа, чи гележег я барбатI,
Герек гьуьрмет хкведайвал кIвалериз,
Берекатар хгудайвал чилери.

Вучда вакай?

Диде-бубадиз гьуьрмет тийизвай,
Багърияр патал хатур течизвай,
Куьмекдин гъил гьич яргъи тийизвай,
Вучда вакай и дуьньядал, я инсан?

Ви хизанар, ви багърияр сефил я,
На виридан чIурзавайди гуьгьуьл я,
Шак алачиз на кьунвай рехъ гъафил я,
Вучда вакай и дуьньядал, я инсан?

Пиян хьайла аялни паб куьчеда,
Уфулариз ина-ана къекъведа,
И гьал акваз кIусни регъуь тежедай,
Вучда вакай и дуьньядал, я инсан?

Уьмуьрдикай са менфятни тахьайла,
Хизан патал са куьмекни тагайла,
Хуьруьнвияр хъуьруьнариз рахайла,
Вучда вакай и дуьньядал, я инсан?

Хийир-шийирдик садрани пай хьанач,
Къецел-кимел вак кутугай тай хьанач,
РикI кайибуру эверайла, гьай ганач,
Вучда вакай и дуьньядал, я инсан?

Са юкъузни къуллугъ тавур ватандиз,
Вуж паталди азаб гана на чандиз?
Къагьар хьайла жуван хайи хизандиз,
Вучда вакай и дуьньядал, я инсан?

Муьфтехурар на патарив агудда,
Гьахъ лугьудай кас на жувавай къакъудда,
Гьикьван вуна ихьтин уьмуьр акъудда,
Вучда вакай и дуьньядал, я инсан?

Аси жемир, ша, акьулдив агат вун,
Гила яш я, ша, ахварай ават вун,
Туба авуна, ша, дуьз геле гьат вун,
Чнани вал дамахдайвал, я инсан!

НЕБИ ПАНАГЬОВ