Вуч паталди халкьнава инсан?
Вуч паталди и дуьньядал халкьнава инсан?
АкIура жуваз тар, кутур хизан.
Тарцикай ваз кIвал жеда, къулани ви цIай,
Лезет хкуд михьи гьавадикай дуьньяда дигай.
Гьар са жегьил-жавандин везифа я гьелбет,
Чандик намус кутуна, чIугуна зегьмет,
Дараматда гьалалдин артухра девлет,
Суваб жеда кесибдиз гайила куьмек.
Пул къведай рехъ жагъурун, гьам я куь гьунар,
Гьадахъни хьана кIанда вичин са кьадар.
Жезмай кьван куьне квек кутамир гунагьар,
Сад Аллагьди ﷻ квадардач куь хъсан крар.
Девлетлуни кесибни, чубан ва векил,
Виридаз чаз кьисмет жезвайди я кьве метри чил.
ЦIуд шегьерда ахъайна нефс, жезва цIуд кIвале,
Вуж фена и дуьньядилай гваз вичин чилер.
Са куьруь уьмуьр я гузвайди чилел,
Вири туна фида чун дуьньядин винел.
Дамахдайвал балайри хкиз чун рикIел,
Кьегьал тIварцIин иеси хьухь куьн халкьдин мецел.
