МискIинда гьуьжетар авун, маса гун ва ихьтин маса крар авун карагьат тирдакай

1. Абу Гьурайради агакьарайвал, адаз ван хьана Аллагьдин Расулди ﷺ икI лугьуз: «Са инсан мискIинда квахьай затIунихъ къекъвезвайди ван хьайи касди къуй лугьурай: «Аллагьди ﷻ ам вав вахкун тавурай!», - вучиз лагьайтIа, гьакъикъатда, мискIинар а крар патал эцигнавайди тушир!» (Муслим).

2. Абу Гьурайради агакьарайвал, Аллагьдин Расулди ﷺ лагьана: «Нагагь квез мискIинда са шей маса гузвайди ва я маса къачузвайди акуртIа, лагь: «Аллагьди ﷻ ви алвер хийирдикай магьрум авурай!» Эгер квахьай затIунихъ къекъвезвайди акуртIа, лагь: «Аллагьди ﷻ ам вав вахкун тавурай!» (Ат-Тирмизи).
3. Бурайдади лагьана: «Квахьай затIунихъ мискIинда къекъвезвай са инсанди хабар кьурла: «Зи яру деве жагъуриз заз ни куьмек гуда?», - Аллагьдин Расулди ﷺ кIевиз лагьана: «Ваз ам жагъун тавурай, вучиз лагьайтIа, гьакъикъатда, мискIинар анжах а кар патал эцигнавайди я хьи, вуч патал абур эцигнаватIа!» (Яни, абур анжах кпIар, зикир авун, чирвилер раиж авун патал эцигнава ва мад са кар патални) (Муслим).
4. Ас-Сайиб бин Язид асгьабди лагьана: «Садра зун мискIинда авайла, зал сада бицIи къван гьалчна. Элкъвена килигайла, заз ам Умар бин аль-ХатIтIаб тирди акуна. Ада заз лагьана: «Алад ва атIа кьвед зи патав гъваш». За абур адан патав гъана. Ада абурувай хабар кьуна: «Куьн гьинай я?» Абуру жаваб гана: «Чун ТIаифдин агьалийрикай я». А чIавуз Умара лагьана: «Куьн и шегьердин (яни Мединадин) агьалияр тиртIа, куьне Аллагьдин Расулдин ﷺ мискIинда сес хкажунай за квез жаза гудай (яни бедендин жаза)!» (Аль-Бухари)

«Риязу-с-Салигьин» ктабдай.