Акъажзавайбур… ва стхаяр…
Акъажзавайбур… ва стхаяр…
Азаддиз кьуршахар кьунай олимпиададин чемпион американви Кайл Снайдерахъ галаз хьайи суьгьбет
Кайл Снайдер – азад къайдада кьуршахар кьадай американви, дуьньядин чемпион, 97 килограммдин заланвилел къведалди авай спортсменрин арада 2016-йисан Олимпиададин къугъунрин чемпион, дуьньядин Кубокдин гъалибчи – кьуршахар кьадайла вичихъ галаз акъажунар ийизвай ва, кьуршахар кьан тийидайла дуст тир, кьве сеферда олимпиададин чемпион тир Абдулрашид Садулаеван патав дуствилин гуьруьшмиш хьун яз ва гьар йисуз тухузвай кесерлу Умаханован кьуршахар кьунай турнирда иштиракун патал Дагъустандиз атана. Америкадин пагьливандин гьиссериз килигайла, медени программади адаз таъсир авуна. Гьадакай ва гзаф маса крарикай ада чи газетдиз авур суьгьбетда ахъайна.
- Кайл, буюр, Дагъустанди авур эсердикай ахъая.
- Лап иер я (таржумачи галачиз), лап хъсан инсанар я. Абурухъ галаз гуьруьшмиш хьунал зун гзаф шад я. Ихьтин кар уьмуьрда анжах садра жедайди хьиз за гьиссзава.
- ТIебиат, тIуьнар, мад вуч рикIел аламукьна? Белки, адетдин тушир са затI?
ТIебиат хъсанди я, мад афарарни (таржумачи галачиз) (хъуьрезва). Шурадинбур лап бегенмиш хьана, гила ам зи рикI алай тIуьн я! Къене маса затIар авай афарарни лап дадлубур я.
- Гьакьван дадлу хуьрекрилай кьулухъ турнирда кьуршахар кьаз квез четин жедачни?
- Исятда ам заз четин месэла жеда; кIвале авайла за садрани акьван гзаф незвайди туш.
- Куьн адетдин инсанрихъ галаз гзаф акахьна. Квез россиянвидинни американвидин арада тафават акунани?
- Ухшар крар гзаф ава, чIехи тафават акунач. Виринра хъсан инсанар гзаф ава.
- Кьуршахар кьадай жегьилар гьазурун патал США-да гьихьтин шартIар ава? Абур квез Дагъустанда акурбурухъ галаз гекъигиз жедани?
- Заз ина акур хьтин шартIар Америкада авай аялриз авач. Пешекарриз (профессионалриз) – эхь, чаз лап хъсан шартIар ава.
- Куьне Абдулрашид Садулаеваз куь ватандиз жавабдин гуьруьшмиш хьун гьазурзавани?
- Гилалди заз чизвач, ина заз тешкилай хьтин лап хъсан кьабулун завай гьикI тикрар хъийиз жедатIа. Заз лап четин жеда, амма бязи фикирар гьеле авазва!
- Америкадин халкьдин патай квез россиянвийриз гьихьтин мурадар агакьариз кIандай?
- Мурадрин патахъай исятда лугьуз жедач, амма гьакI къейд ийиз кIанзава хьи, зун лап шад я чи халкьарин арада алакъаяр хьунал ва миллетдиз килиг тавуна, за виридахъ галаз сад хьтин рафтарвал ийизва.
РУСЛАН ТУЛЯКОВ
