Шейхдин берекат
И мукьвара Мегьарамдхуьруьн райондин Ярагъ-Къазмайрин хуьруьн жуьмя мискlиндин гьаятда гурлу межлис кьиле фена. Мярекат Дагъустандин гьафиз (Къуръан хуралай чизвай) аялрин арада кьиле фейи акъажунра сад ва пуд лагьай чкаяр кьур Гьамидов Гьасанан, адан гъвечlи стха Абдулмежидан агалкьунар къейд авун патал тешкилнавай.
Абур кьведни зурба шейх Ярагъ Мугьаммад эфендидин невеяр я. Абуруз шейхдин берекатдикай тамам пай кьисмет хьанвайди чаз и арада ачухдиз малум жезва. Гьакlни лугьуз кlанзава хьи, абурун буба – Гьамидов Мурад Мегьарамдхуьруьн районда яшамиш жезвай кесиб ва муьгьтеж инсанриз куьмек гузвай «Инсан» фондунин регьбер я. Мугьаммад Пайгъамбардин ﷺ гьадисда лагьанва: «Аллагь Таалади куьмек гузва лукlраз (мусурмандиз), та ада (лукlра) вичин мусурман стхадиз (вахаз) куьмек гузмай кьван» (Муслим). Икl хьайила, халкьдиз куьмек гузвай касдин веледриз Халикьди ﷻ Вичи куьмек гана. Веледдин гъалибвал – бубадин гъалибвал я.
Межлисдал Мегьерамдхуьруьн райондин имам Сефиханов Алихан, Кьурагь райондин имам Бабаев Агьмад, Ахцегь районда РД-дин диндиз эвер гунин хилен регьбер Ашуралиев Гьуснудин, Избербаш шегьердин имам Салимов Абдуллагь, Ярагъ-Къазмайрин имам Мегьамедов Агьмад, «Каспийск шегьер» депутатрин кlватlалдин регьбер Жаватов Абдулвагьид ва масабур рахана. Абуру Къуръандин ва Исламдин чирвилерин фазилатлувилкай, жегьилри вахтуниз къимет гуникай, Ярагъ Мугьаммад эфендидин берекатдикай, Исламдиз табий хьунин чарасузвиликай насигьатар авуна.
Насигьатрин арайра Заур Салигьова гуьзел нашидар, мавлидар кlелна.
Эхирдай Гьамидов Гьасаназ жемятдин патай цlийи «Лада Гранта» машин пишкешна. Гьамидов Абдулмежидаз ва Ярагъ-Къазмайрилай тир амай мутааллимриз (диндин чирвилер къачузвайбур) умра ийиз Кябедал фидай путёвкаяр пишкешна. Гьакlни Гьамидоврин хизандиз Мегьарамдхуьруьн райондин регьбер Агьмедов Фарида Мегьарамдхуьре кlвалер эцигдай чил пишкешна.
Къуй Аллагьди кьабулрай и межлис! Къуй чи халкьдихъ генани гзаф алимар, гьафизар ва жумартлу инсанар хьурай!
