Гьажи Рамазан эфенди рикlел хкана
15-августдиз Кьурагь райондин Ашахуьре шейх Гьажи Рамазан эфенди рикlел хкуниз талукьарнавай мавлид-межлис кьиле фена. Мярекат Кьурагь райондин имамрин Советдин председатель Аливердиев Абубакра райондин жемятдин куьмекдалди тешкилна. Межлисда иштирак авун патал Гьажи Рамазан эфендидин пlирел ирид виш кьван кас кlватl хьанвай.
Мярекат адет тирвал Къуръандин аятар кlелуналди ачухна. Ам кьиляй-кьилиз Кьурагь райондин имам Аливердиев Абубакра кьиле тухвана.
Межлисдал рахайбурукай сад Дагъустандин Муфтиятдин председателдин куьмекчи Омаров Шамил хьана. Ада шейх Гьажи Рамазан эфендидин уьмуьрдин рекьикай ахъайна.
Гьакlни инал Кьиблепатан Дагъустанда РД-дин Муфтиятдин векил Рамазанов Къурбаназ гаф гана. Ада тавассулдикай, яни хъсан инсанрин ва я амалрин гьуьрметдай Аллагьдивай ﷻ тlалабунин хийирдикай насигьат авуна.
Мад мятрекатдал Стlал-Сулейманан райондин имамрин Советдин председатель Рагьманов Шамил рахана. Ада Пайгъамбардин ﷺ мавлиддикай авай менфятдикай насигьат авуна.
Гуьгъуьнлай Докъузпара райондин Усугъчай хуьруьн имам, РД-дин Муфтиятдин Ахцегь ва Докъузпара районра диндиз эвер гузвай хилен (отделдин) регьбер Ашуралиев Гьуснудиназ гаф гана. Ада Исламдин чирвилерин важиблувиликай вяз гана.
Насигьатрин арайра Стlал-Сулейманан райондин Вини Стlалрин имам Гьамидов Ислама мавлидар-нашидар кlелна.
Межлисдал атайбурун арада пуд умра (путёвка) чип вегьена.
Эхирдайни вирида санал дуьа авуна ва кlватl хьанвайбуруз садакьаяр пайна.
Къуй Аллагьди ﷻ кьабулрай и берекатлу межлис!
