«Хъсан инсанрин къилихар»
«Хъсан инсанрин къилихар»
И мукьвара Махачкъалада авай «Россия – моя история» лугьудай тарихдин паркда лезги чlалал цlийи ктаб акъатуниз талукьарнавай зурба мярекат кьиле фена.
Межлис Ярагъ Мегьамеданни Алкьвадар Гьасанан неве, гьафиз, Къуръандай Дагъустан республикадин дережада аваз хьайи акъажунра сад лагьай чка кьунвай Гьамидов Абдулмежида кlелай Къуръандин аятралди ачухна.
Сифте гаф РД-дин правительстводин заместитель, чилерин ва эменнидин алакъайрин министр Эминов Заураз гана. «И «Хъсан инсанрин къилихар» ктабди халис мусурмандин диндин ва ахлакьрин бинейрикай ахъайзава», - къейдна Эминов Заура.
Ахпа Кьиблепатан Дагъустанда РД-дин Муфтиятдин векил Гьажиев Гьуьсейн рахана. Ада «Хъсан инсанрин къилихар» ктабдикай авай менфятдикай ахъайна.
Гуьгъуьнлай милли сиясатдин ва динрин кlвалахрин министр Муслимов Энриказ гаф гана. «За и ктаб са тlимил кlелна ва ам заз гзаф бегенмиш хьана. Таржумани лап регьятдиз, гъавурда акьадай тегьерда авунва. Ам кlелун за виридаз меслят къалурзава», - къейдна министрди.
Адалай кьулухъ Мегьарамдхуьруьн райондин кьил Агьмедов Фаридаз гаф гана. Ада халкьдин араяр хъсан гьалдиз гъунин важиблувиликай ахъайна.
Гьакlни инал Докъузпара райондин кьил Шамилов Мегьамед, Стlал Сулейманан райондин имамрин председатель Шамил Омаров, «Каспийск шегьер» округдин депутатрин Собранидин председатель Абдулвагьид Джаватов, Дагъустандин исламдин университетдин проректор Шамил Алиханов рахана. Абуру инсанвиликай, хъсан къилихрикай ва тербиядикай ихтилатар авуна.
Гьакlни межлисдал кlватl хьанвайбуруз «Хъсан инсанрин къилихар» ктабдикай ва ам таржума ийидай чlавуз Гьасан Амаханова ва Къазимегьамед Дженетова зегьмет чlугур къайдадикай видеороликар къалурна.
Куьруь къейд
Чапдай акъуднавай ктабдин тlвар «Хъсан инсанрин къилихар» я. Ам Дагъустандин Муфтий ва шейх Агьмад эфенди Абдулаева араб чlалал кхьенвай «Риязу ахлякъи-с-салигьин» (урус чlалал «Благонравие праведников») ктабдин таржума я. Лезги чlалал акъатзавай «Ас-Салам» газетдин редактор Гьасан Амаханован фикирдиз и ктаб лезги чlалаз таржума авун атана. Ада ктабдин автордивай вичиз ам таржума ийидай ихтияр гун тlалабна. Шейх Агьмад эфендиди ихтияр гана ва алава хъувуна: «Лезги чlалаз араб чlалал акъатай «Риязу ахлякъи-с-салигьин» ктаб тажума ая (яни урус «Благонравие праведников» бине яз кьамир)».
Муфтийдин чlалаз килигна, ада ктаб таржума ийиз гатlумна. Ахпа Амаханов Гьасаназ и карда адан халу Дженетов Къазимегьамеда куьмек гана. Гьа икl абуру кьведани санал и ктаб таржума авуна, гьазурна ва чапдай акъуддайвал ам Дагъустандин Муфтиятдиз агакьарна. Ктаб акъуддай такьатар Кьиблепатан Дагъустанда РД-дин Муфтиятдин векил Гьажиев Гьуьсейна жагъурна. Адаз куьмек гайибурукай сад республикадин депутатрин Собранидин депутат Алиханов Мегьамед тир. Адазни мярекатдин эхирдай чухсагъулдин чар ва савкьват гана. Гьакlни чухсагъулдин чар ва савкьват Дженетов Къазимегьамедаз багъишна. Амаханов Гьасаназ умрадал фидай путёвка савкьват яз гана.
Къуй Аллагь Таалади «Хъсан инсанрин къилихар» ктаб вири лезгияр патал хийирлуди авурай!
Чи мухбир.
