Шад хабар

И мукьвара Дагъустандин Муфтиятди лезги чlалал «Хъсан инсанрин къилихар» лугьудай ктаб чапдай акъуднава.

Ам Дагъустандин Муфтий, шейх Агьмад гьажи Абдулаева араб чlалал кхьенвай «Риязу ахлакъи-с-салигьин» ктабдин таржума я. Ам лезги чlалаз «Ас-Салам» газетдин редактор Гьасан Амаханова ва Стlал-Сулейманан райондин Эминхуьруьн юкьван мектебдин муаллим Къазимегьамед Дженетова таржума авуна.

«Хъсан инсанрин къилихар» ктабда мусурманри чеб инсанрихъ ва Аллагьдихъ ﷻ галаз тухудай къайдадикай хабар гузва, нефсинин начагъвилерин гьакъикъат, абурукай нефс сагъардай тегьер чирзава. И ктабдай инсанриз чпихъ авай гзаф суалриз жавабар жагъидайдак чна умуд кутазва. Ам мусурман жемятдин вири къатар патал, гьатта мусурман тушир инсанар патал хийирлуди жеда.

Чи играми Мугьаммад Пайгъамбар ﷺ хъсан къилихралди вири инсанрилай тафаватлу тир. Пак Къуръанда алемрин Халикьди ﷻ адалай ихьтин тариф авуна: «Гьакъикъатда ви къилихар зурбабур я» («Къалам» сурадин 4-аят). Мугьаммад Пайгъамбардиз ﷺ ухшар жез кlанзавай инсанри чарасуз «Хъсан инсанрин къилихар» ктабдикай чпиз менфят къачун лазим я.

Къуй и ктаб чи халкь патал менфятлуди хьурай, ам акъудунин кардик пай кутур инсанрилайни Аллагь ﷻ рази хьурай! Амин.

Чи мухбир.