Ахцегь районда дишегьлийрин межлис
И мукьвара Ахцегь райондин Луткун хуьре «Дишегьлидин рехъ» лугьудай диндин мярекат кьиле фена. Ам Дагъустандин Муфтиятдин Ахцегь районда диндиз эвер гунин кIвалах кьиле тухузвай отделди тешкилнавай. Межлисда пуд вишелай артух дишегьлийри иштиракна.
<figure><img src="//as-salam.press/storage/_content/2023/01/31/1675161443_63d8ef630635d.jpg"></figure>
Мярекатдал Ахцегь районда Дагъустандин Муфтиятдин векил Узаир Шамилов, СтIал-Сулейманан райондин имам Шамил Омаров, Дагъустандин ЦIаяр шегьердин имам Мугьаммадрамазан Рамазанов ва Луткунрин имам Эмир Султанбеков рахана. Абуру аялриз диндин тербия гунин важиблувиликай, гъуьлуьнни папан арада гьуьрмет хуьнин лазимвиликай ва абур чара хьунин хаталувиликай, хъсан къилихрин ва диндин чирвилерин къиметлувиликай ахъайна.
Насигьатрин арайра Усман Бутаева гуьзел нашидар кIелна.
Районда кьиле физвай диндин мярекатрик чпин пай кутазвай ва хуьрерин мискIинра рушариз тарсар гузвай дишегьлийриз инал чухсагъулдин чарар гана.
Эхирдайни кIватI хьайибуру вирида санал район ва вири мусурманар патал хушбахтвилин дуьа авуна. Къуй Аллагь Таалади кьабулрай!
<figure><img src="//as-salam.press/storage/_content/2023/01/31/1675161459_63d8ef7376500.jpg"></figure>
