Гилидал мавлид-межлис

Гилидал мавлид-межлис

11-октябрдиз Мегьарамдхуьруьн райондин Гилийрин хуьруьн жуьмя-мискlинда диндин межлис кьиле фена.

Инал сифте Къуръан кlелна ва гуьгъуьнлай Мегьарамдхуьруьн райондин имам Сефиханов Алихана мярекат кьиле тухвана. Ада Мугьаммад Пайгъамбар ﷺ жувалай гзаф кlан хьун лазим тирдакай ахъайна.

Гьакlни межлисдал Махачкъалада авай са мискlиндин имам Ханмегьамедов Ислам, Мегьарамдхуьруьн имам Бидирханов Муъмин, лезги «Ас-Салам» газетдин редактор Амаханов Гьасан, Стlал-Сулейманан районда Дагъустандин Муфтиятдин диндиз эвер гунин хилен регьбер Рагьманов Шамил, Гилийрин имам Демиров Жабраил рахана. Абуру чпин насигьатра Исламдин везифаяр кьиле тухуникай, динда ихтияр авай ва къадагъа тир муьгьуьббатдикай, хъсан крарихъ эвер гуникай ва писбурувай инсанар яргъа авунин важиблувиликай, жемятдалди мискlинда кпlар авурла жезвай сувабрикай ихтилатар авуна.

Мярекатдал атанвай аялризни шадвал хьана, гьикl хьи абуру чпиз гайи диндин суалриз жавабар гана ва пулдин савкьватар къачуна. Суалриз жавабар гуз тахьайбуру чпиз Къуръандай чидай сураяр кlелна ва савкьватар къачуна. Са гафуналди, межлисдилай гьич са аялни бейкефдиз кlвализ хъфенач.

Къуй Аллагьди ﷻ кьабулрай!